San̄a Kpere Abasi
“O Jehovah, Afo . . . Omonyụn̄ Ọfiọk Mi”
“IDỤHE se isibiakde inyụn̄ isọn̄de ndiyọ nte owo ndifiọk ke idụhe eke ekerede aban̄a imọ m̀mê eke ọfiọkde nte etiede imọ ke idem.”a Ndi akanam etie fi ntem ke idem? Ndi akanam etie fi nte ke idụhe eke ekerede aban̄a fi m̀mê eke ọfiọkde se iwọrọde fi, man okodu eke ọfiọkde nte etiede fi ke idem? Edieke edide ntre, da emi dọn̄ idem fo esịt: Jehovah enen̄ede ekere aban̄a mme asan̄autom esie tutu enye ọfiọk kpukpru se ikade iso ke uwem mmọ. Se David eketịn̄de ke Psalm 139 ọsọn̄ọ emi.
David ama enịm ke Abasi ekere aban̄a imọ tutu ọdọhọ ete: “O Jehovah, afo omodụn̄ọde mi, omonyụn̄ ọfiọk mi.” (Ufan̄ikọ 1) Enyene se David an̄wanade ndinam nnyịn ikụt mi. Ikọ Hebrew oro ẹkabarede ‘dụn̄ọde’ ekeme ndiwọrọ owo ndidọk isọn̄ nyom ọsọn̄urua itiat (Job 28:3), owo ndidụn̄ọde isọn̄ nse nte enye etiede (Judges 18:2), m̀mê owo ndidụn̄ọde ikpe (Deuteronomy 13:14). Emi owụt ke Jehovah etịm ọdiọn̄ọ nnyịn tutu editie nte n̄kpọ eke enye odụn̄ọrede kpukpru se iban̄ade nnyịn. David ndidọhọ Abasi, “afo omodụn̄ọde mi,” anam ikụt ke Abasi enen̄ede ekere aban̄a mme asan̄autom esie. Enye odụn̄ọde mmọ onyụn̄ ọfiọk owo mmọ kiet kiet.
David etịn̄ nte Abasi enen̄erede ọfiọk owo, ete: “Afo ọmọfiọk ini emi nsụhọrede ntie ye ini emi ndahade nda. Afo emetie ke anyan usụn̄ ọfiọk ekikere mi.” (Ufan̄ikọ 2) Jehovah etie ke “anyan usụn̄” ke heaven, edi enye ọfiọk ini emi isisụhọrede itie ke ima ikokụre se ikanamde, onyụn̄ ọfiọk ini emi isidahade ida ke usenubọk itọn̄ọ ndinam n̄kpọ. Enye esinyụn̄ ọfiọk se imade, se ikerede, ye se iduakde. Ndi Abasi ndifiọk David ntem ama anam idem enyek enye? Baba, enye akakam ọdọdọhọ Abasi odụn̄ọde imọ. (Ufan̄ikọ 23, 24) Ntak-a?
David ama ọfiọk ke enyene eti ntak emi anamde Jehovah odụn̄ọrede mme asan̄autom Esie. Enye ọkọdọhọ ete: “Afo ọmọfiọk isan̄ mi ye ebiet nduọkodudu mi, omonyụn̄ emehe ye kpukpru usụn̄ mi.” (Ufan̄ikọ 3) Jehovah esikụt ‘kpukpru usụn̄ nnyịn,’ oro edi, kpukpru se inamde, edide eti m̀mê idiọk. Ndi enye esise eti n̄kpọ oro inamde m̀mê idiọkn̄kpọ nnyịn? Ikọ Hebrew oro ẹkabarede ‘fiọk’ ke ufan̄ikọ emi ekeme ndiwọrọ owo ‘ndifri ikpọk nsio ke n̄kpọ’ nte emi ọtọin̄wan̄ esifride mbio osio ke ibokpot esie. Ikọ Hebrew oro ẹkabarede ‘mehe’ ekeme ndiwọrọ “ndinen̄ede mma n̄kpọ.” Ntre, ke ini Jehovah odụn̄ọrede se mme asan̄autom esie ẹtịn̄de ẹnyụn̄ ẹnamde kpukpru usen, enye esinen̄ede ama nti n̄kpọ oro mmọ ẹtịn̄de ẹnyụn̄ ẹnamde. Ntak-a? Sia enye enen̄erede ama nte mmọ ẹsịnde ukeme ndinem imọ esịt.
Psalm 139 anam ifiọk ke Jehovah esinen̄ede ekere aban̄a mme asan̄autom esie. Enye esidụn̄ọde mmọ onyụn̄ ekpeme mmọ ke usen ke usen. Ntem enye ọfiọk mme mfịna oro mmọ ẹsobode ye ubiak oro ukụt esinamde mmọ ẹkop. Ndi idọn̄ke fi ndituak ibuot nnọ Abasi emi ekerede aban̄a mme owo ntem? Edieke ọdọn̄de fi, fiọk ete ke tutu amama, Jehovah ‘idifreke utom fo ye ima eke afo owụtde enyịn̄ esie.’—Mme Hebrew 6:10.
Itie bible emi okpokotde ke September:
[Ikọ Idakisọn̄]
a Arthur H. Stainback eketịn̄ ikọ emi.