Kpep Nditọ Fo

Ẹkekot Mmọ “Nditọ Obuma”

EKEME ndidi emesikop obuma otopde ke ini ọkpọsọn̄ edịm. Ndi akanam obuma esịn fi ndịk ke idem?—a Jesus okot iba ke otu mbet esie “Nditọ Obuma.” Ẹyak ise se inamde enye okot mmọ ntem.

James ye John ke Jesus okot “Nditọ Obuma.” Mmọ ẹdi nditọeka. Ete mmọ ekere Zebedee, ndien eka mmọ ekere Salome. Etie nte Salome edi eyeneka Mary emi edide eka Jesus; ntre Jesus, James ye John ẹbuana n̄kpọ. Ndien ekeme ndidi mmọ mbita ẹketọn̄ọ ke n̄kpri ẹdi ufan.

Zebedee ete James ye John ekedi ọkọiyak, ntre n̄ko ye nditọ esie emi. Mmọ ẹsịne ke otu ata akpa mbon emi Jesus emekde ete ẹdi mbet imọ. Ke ini Jesus okotde mmọ, mmọ ẹkpọn̄ utom ukọiyak ẹtiene enye kpa idaha oro. Nte ini akade, Jesus osio owo 12 ke otu mme mbet emi enịm nte mme apostle esie. James ye John ẹsịne ke otu emi.

Ọfiọn̄ ifan̄ mbemiso ẹwotde Jesus, Jesus ye mme apostle esie ẹsan̄a ke obot emi odude ke Samaria ẹbe. Eyo ọtọn̄ọ ndikụt, idem onyụn̄ emem kpukpru mmọ. Edi mbon Samaria ẹdọhọ ke mmimọ iyomke Jesus ye mme apostle esie ẹdan̄ ke obio mmimọ? Ndi ọmọfiọk ntak?— Ẹyak ise ise.

Jesus ye mme mbet esie ẹdi mme Jew ndien ata ediwak mme Jew ẹsisọn̄ ido ye mbon Samaria. Edi Jesus itiehe ntem. Enye ọfọn ido ye mmọ, ndien nte James ye John ẹkpenyụn̄ ẹtiede edi emi. Edi mmọ ẹyat esịt ye mbon Samaria emi mîmaha ndidara mmọ ẹnyụn̄ ẹdọhọ Jesus ẹte: ‘Ndi omoyom idọhọ ikan̄ oto enyọn̄ edita mmọ owot?’ Afo ekere ke Jesus ọbọrọ mmọ nso?— Enye anam mmọ ẹfiọk ke se mmọ ẹtịn̄de oro ọdiọk etieti! James ye John ẹnyene ndikpep ndikop mme owo mbọm.

Mfịna en̄wen emi James ye John ẹnyenede edi ke mmọ ẹma uwọrọiso etieti. Esisịt ini mbemiso Jesus akpade, mmọ ẹdọn̄ eka mmọ ọkọdọhọ Jesus ete: “Nọ uyo man nditọiren mi iba emi ẹkpetie, kiet ke ubọk nnasia fo, kiet ke ufien, ke obio ubọn̄ fo.” Ke ini mme apostle eken ẹkopde se James ye John ẹnamde emi, mmọ ẹyat esịt etieti. Ndi afo akpayat esịt n̄ko?—

Ekeme ndidi akpayat. Nnyịn isimaha ndikụt mme owo ẹyomde ndidi akpa m̀mê ẹyomde ndidi n̄kpọ n̄kan mbon en̄wen. Nte ini akade, James ye John ẹdikụt ke utọ ido emi ifọnke; ntre mmọ ẹkpụhọde. Mmọ ẹtọn̄ọ ndifọn ido nnyụn̄ n̄wụt ima. Nso ke ikeme ndikpep nto emi?—

Se ikpepde ito Jesus edi ke nnyịn n̄ko ikpenyene ndifọn ido ye mme owo. Jesus ama esifọn ido ye mme owo, esịnede irenowo, iban ye nditọwọn̄. Ndi afo eyesidomo nditi uwụtn̄kpọ esie emi nnyụn̄ n̄kpebe enye?—

Kot ke Bible fo

Mark 3:17

Matthew 27:55, 56; Mark 15:40, 41

Matthew 4:18-22

John 4:4-15, 21-26; Luke 9:51-55

Matthew 20:20-24; Mark 10:35-37, 41

[Ikọ Idakisọn̄]