Abraham​—Owo Mbuọtidem

Abraham ọwọrọ ada ke an̄wa ke okoneyo. Nte enye osụk esede ikpaenyọn̄ emi ntantaọfiọn̄ ọyọhọde, enye eti nte Abasi ọkọn̄wọn̄ọde ke nditọ imọ ẹyewak nte ntantaọfiọn̄. (Genesis 15:5) Abraham ekesida ntantaọfiọn̄ eti un̄wọn̄ọ Jehovah emi. Mmọ ẹma ẹsinọ enye nsọn̄ọ nte ke Abasi oyosu un̄wọn̄ọ esie, koro edieke Jehovah ekemede ndibot utọ akaka ekondo emi ye kpukpru se idude ke esịt, ndi ndinọ enye ye n̄wan esie eyen ndien edisọn̄ enye? Emi ekenen̄ede anam Abraham enyene mbuọtidem.

NSO IDI MBUỌTIDEM? Bible ọdọhọ ke mbuọtidem edi ndinen̄ede nnịm n̄kpọ emi inyenede ata uyarade ke enye do kpa ye oro nnyịn mîkwe enye. Owo emi ọbuọtde idem ye Abasi esinen̄ede ekere nte mme un̄wọn̄ọ Abasi ẹdisude, onyụn̄ enen̄ede enịm mmọ ke akpanikọ tutu etie enye ke idem nte ke mme un̄wọn̄ọ oro ẹkam ẹsosu ẹma.

DIDIE KE ABRAHAM OKOWỤT KE IMENYENE MBUỌTIDEM? Abraham ama owụt ke imenịm ke se Abasi ọn̄wọn̄ọde oyosu. Enye ama ọkpọn̄ obio emana esie, enen̄ede enyene mbuọtidem ke Jehovah ayada imọ aka obio en̄wen nte enye ọkọn̄wọn̄ọde. Mbuọtidem akanam Abraham okodụn̄ ke nsio nsio itie ke Canaan, enyene idotenyịn ke nditọ imọ ẹyeda obio oro ẹnyene. Kpa mbuọtidem akanam enye ekpere ndiwa Isaac eyen esie nte Abasi ọkọdọhọde enye anam, enyene idotenyịn ke Jehovah ekeme ndinam enye eset.—Mme Hebrew 11:8, 9, 17-19.

Abraham ekekere aban̄a ini iso idịghe mme n̄kpọ emi enye ọkọkpọn̄de ke edem. Kpa ye emi etiede nte ke Abraham ye Sarah ikokopke inem uwem ke Canaan nte mmọ ẹkekopde ke Ur, ‘mmọ ikakaha iso iti ebiet oro mmọ ẹketode ẹwọn̄ọ.’ (Mme Hebrew 11:15) Mmọ ẹkekam ẹkere ẹban̄a nte Abasi edidiọn̄de mmimọ ye nditọ mmimọ ke ini iso.—Mme Hebrew 11:16.

Ndi Jehovah ama anam kpukpru se enye ọkọn̄wọn̄ọde ọnọ Abraham? Ih, ama anam. Nte ini akakade, nditọ Abraham ẹma ẹwak ẹkabade idụt oro ẹdiọn̄ọde nte Israel. Ekem mmọ ẹma ẹdidụn̄ ke Canaan, kpa isọn̄ oro Jehovah ọkọn̄wọn̄ọde ndinọ Abraham.—Joshua 11:23.

NSO KE EMI EKPEP NNYỊN? Nnyịn imenen̄ede inịm ke Jehovah oyosu mme un̄wọn̄ọ esie. Idem edieke ndusụk ẹtiede nte se mîkemeke nditịbe, nnyịn imenyene mbuọtidem ke “Abasi ekeme ndinam kpukpru n̄kpọ.”—Matthew 19:26.

N̄kpọ efen emi ikpepde ito Abraham edi ke akpana isitie ikere nte uwem edinemde ke ini iso utu ke nditie n̄kere se ima ikebebe. Se ete kiet emi ekerede Jason odomode ndinam edi oro. Enye ọdọn̄ọ idiọk udọn̄ọ emi mîyakke enye ekeme ndidaha nda. Enye ọdọhọ ete: “Ke nditịn̄ akpanikọ, enyene mme ini emi nsitiede n̄kere nte uwem ekesitiede. Esifịna mi ke emi mmen̄kemeke aba ndinam idem ata ekpri n̄kpọ nte edifat Amanda an̄wan mi.”

Kpa ye emi, Jason enen̄ede enyene mbuọtidem ke Jehovah oyosu kpukpru un̄wọn̄ọ esie, emi esịnede edinam isọn̄ emi akabade paradise ọnọ mbon n̄kopitem ndidu ke nsinsi nnyụn̄ n̄kop ọyọhọ nsọn̄idem.a (Psalm 37:10, 11, 29; Isaiah 35:5, 6; Ediyarade 21:3, 4) Jason ọdọhọ n̄ko ete: “Mmesiti idemmi ke uwem eyenem etieti ke ini iso. Ke ibịghike kpukpru afanikọn̄ ererimbot emi—nsịn̄ede uwem, editịmede esịt, mfụhọ, esịt ndimia owo ufen—ẹyebe efep.” Nso mbuọtidem ibiet eke Abraham ntem!

[Ikọ Idakisọn̄]