San̄a Kpere Abasi

“Owo Iditịghi Aba Mme Akpa N̄kpọ”

ESINEM owo nditi n̄kpọ. Nditi nte akadiade uwem ye owo emi amade esinem etieti. Edi odu n̄kpọ emi edide ama eti, enye obụhọde fi idịbi. Edieke ata idiọkn̄kpọ eketịbede ọnọ fi, utọ n̄kpọ oro edibabiak fi edieke afo etide. Ntre, emekeme ndikere m̀mê eyekeme ndifre utọ n̄kpọ oro tutu amama. Edieke utọ n̄kpọ oro afịnade fi, se idude ke n̄wed Isaiah emi ekeme ndidọn̄ fi esịt.—Kot Isaiah 65:17.

Jehovah aduak ndinam nnyịn ifre ubiak nnyịn ye kpukpru se isinamde nnyịn ikop ubiak. Didie ke enye edinam emi? Edi ke ndisobo idiọk ererimbot emi mfep, ntre kpukpru ufen oro ibọde mi, nnyụn̄ nnam ererimbot emi ọfọn. Jehovah ọn̄wọn̄ọ ete: “Ami mmọn̄ mbot mbufa enyọn̄ ye obufa isọn̄.” Nditịm mfiọk n̄kpọ mban̄a un̄wọn̄ọ emi ekeme ndinam nnyịn inyene idotenyịn.

Nso idi mbufa enyọn̄ emi? Bible owụt nnyịn n̄kpọ iba emi ikpadade idiọn̄ọ se enye edide. Akpa, owo iba emi ẹketienede ẹwet Bible ẹma ẹwet n̄ko ẹban̄a emi, ndien se mmọ ẹkewetde ẹkeban̄a ikpọ ukpụhọde oro Abasi edinamde man isọn̄ emi ọfọn. (2 Peter 3:13; Ediyarade 21:1-4) Ke adianade do, enyọn̄ m̀mê heaven esiwak ndida mban̄a ukara ke Bible. (Isaiah 14:4, 12; Daniel 4:25, 26) Mmọdo, mbufa enyọn̄ oro edi obufa ukara emi edinamde isọn̄ emi ọfọn. Ukara kiet kpọt ekeme ndinam kpukpru oro—kpa ukara Obio Ubọn̄ Abasi emi Jesus ekekpepde nnyịn ndibọn̄ akam mben̄e. Obio Ubọn̄ oro ayanam ẹnam uduak Abasi ke ofụri isọn̄.—Matthew 6:9, 10.

Nso idi obufa isọn̄? Bible owụt nnyịn n̄kpọ iba emi ikpadade idiọn̄ọ se enye edide. Akpa, ke Bible, isọn̄ esiwak ndida mban̄a mme owo, idịghe ata ata isọn̄ emi. (Genesis 11:1) Ọyọhọ iba, Bible ama etetịn̄ ete ke ini ukara Abasi edisịmde isọn̄ emi, ke ndinen owo ke ofụri isọn̄ ẹyekpep edinen ido. (Isaiah 26:9) Mmọdo, obufa isọn̄ ada aban̄a mbon emi ẹsụkde ibuot ẹnọ ukara Abasi, emi ẹnyụn̄ ẹdade ndinen edumbet esie ẹdu uwem.

Ndi emekeme ndikụt ndien nte Jehovah edinamde nnyịn ifre ubiak nnyịn ye kpukpru se isinamde nnyịn ikop ubiak? Jehovah ọmọn̄ ososu un̄wọn̄ọ esie emi, oro edi, ndibot mbufa enyọn̄ ye obufa isọn̄ man ererimbot emi ọfọn.a Kpukpru se isinamde owo okụt utọ ukụt emi owo mîsisọpke ifre ẹdidi n̄kpọ eset ke obufa ererimbot. Ndinen owo ẹyenen̄ede ẹdia uwem, ndien mmọ ẹyekop inem uwem kpukpru usen.

Edi nso kaban̄a kpukpru ubiak oro ikopde idahaemi? Jehovah akaiso ọn̄wọn̄ọ ke n̄wed Isaiah 65:17 ete: “Owo iditịghi aba mme akpa n̄kpọ, mmọ idinyụn̄ idụkke owo esịt.” Ubiak ekededi oro ikopde ke ererimbot emi eyebe efep ofụri ofụri. Ndi utọ uwem emi idọn̄ke fi? Edieke ọdọn̄de, mbọk kpep nte ekemede ndisan̄a n̄kpere Abasi emi ọn̄wọn̄ọde utọ inem inem ini iso oro ọnọ nnyịn!

Itie Bible emi okpokotde ke March:

◼ Isaiah 63-66–Jeremiah 1-16

[Ikọ Idakisọn̄]

[Se ẹwetde ke ikpọ abisi ke page 19]

Jehovah aduak ndinam nnyịn ifre ubiak nnyịn ye kpukpru se isinamde nnyịn ikop ubiak