Bible Okpụhọde Mme Owo

NSO ikanam ete kiet afiak okodụk ikọ Abasi emi enye ọkọwọrọde ọkpọn̄? Akparawa kiet akanam didie okụt orụk ete emi enye okoyomde ke ofụri eyouwem esie? Kop nte mmọ ẹbụkde mbụk idemmọ mi.

“Akana mfiak nnyọn̄ mbịne Jehovah.”—ELIE KHALIL

N̄KAMANA KE 1976

NTO CYPRUS

N̄KEDI IDIỌK UDỌ

NTE UWEM MI EKETIEDE: N̄kamana ke Cyprus, edi n̄kokpon ke Australia. Ete ye eka mi ẹdi Mme Ntiense Jehovah, ndien mmọ ẹma ẹsịn ofụri ukeme ndinam mi mma Jehovah nnyụn̄ mma Ikọ esie kpa Bible. Edi mma ntọn̄ọ ndisọn̄ ibuot ke ini n̄kedide eyenọwọn̄. Mma nsidịbe n̄wọrọ ke ufọk okoneyo man n̄kodu ye mme uyen eken. Ima isiyịp moto inyụn̄ isịn idem ke ediwak mfịna.

Ke nsonso oro, n̄kesidedịbe nnam mme n̄kpọ emi mbak ete ye eka mi ẹdiyat esịt. Edi nte ini akakade, n̄kokopke ndịk aba. Mma nnam ufan ye mme owo emi ẹkenen̄erede ẹsọn̄ọ mi edi oro mîkamaha Jehovah, ndien mmọ ẹma ẹtọn̄ọ ndibiat mi. Ke akpatre, mma ndọhọ ete ye eka mi nte ke nyomke ndisitiene mmọ n̄ka ufọkabasi mmọ aba. Mmọ ẹma ẹdomo ndin̄wam mi, edi n̄kenyịmeke. N̄kpọ emi ama abiak mmọ tutu.

Ke mma n̄kọkpọn̄ ufọk, mma ntọn̄ọ ndin̄wọn̄ ikọn̄ekpo, ntọtọ nnyụn̄ nnyanyam. Mma mma iban nnyụn̄ mma ndika unek. Esịt ama esisọp ayat mi n̄ko. Edieke owo eketịn̄de m̀mê anamde n̄kpọ oro nsuade, esịt ama esifụt mi etieti, mma nsiduat owo nnyụn̄ ntọ owo ita. Ke nditịm ntịn̄, mma nsinam kpukpru n̄kpọ oro ẹkedọhọde n̄kûnam.

NTE BIBLE OKOKPỤHỌREDE UWEM MI: Mma ntọn̄ọ ndụk ye akparawa kiet emi ete esie akakpade ọkpọn̄ enye toto ke ini emi enye ekedide ata ekpri. Ima isitie ntre ineme nneme tutu eyo ọsọn̄. Enye ama osio ofụri esịt esie etịn̄ nte n̄kpa ete imọ abiakde imọ. Sia mma n̄kekpep ke Bible toto ke ata ekpri ke Abasi ayanam mme owo ẹset, mma ntọn̄ọ nditịn̄ n̄kpọ mban̄a Jesus nnọ enye. Ndọhọ enye ke Jesus ama esinam mme akpan̄kpa ẹset ye nte ke enye ọn̄wọn̄ọ ke iyafiak inam oro ke ini iso. (John 5:28, 29) Mma ndọhọ enye nte: “Kere nte edifiakde ikụt ete fo. Kpukpru nnyịn imekeme ndidu uwem ke nsinsi ke Paradise isọn̄.” N̄kpọ emi ama otụk ufan mi etieti.

Ke mme ini en̄wen, ufan mi emi ama obụp mi n̄kpọ aban̄a mme akpatre usen onyụn̄ obụp m̀mê Abasi edi ita-ke-kiet. Mma n̄wụt enye nsio nsio itien̄wed emi ẹwụtde owo emi Jehovah Abasi edide, ye owo emi Jesus edide, ye mme itien̄wed emi ẹtịn̄de ẹban̄a mme akpatre usen. (John 14:28; 2 Timothy 3:1-5) Nte n̄kosụk ntịn̄de n̄kpọ mban̄a Jehovah nnọ ufan mi emi, ami ke idemmi mma ntọn̄ọ ndikere mban̄a Jehovah.

Sụn̄sụn̄, n̄kpasịp akpanikọ emi ete ye eka mi ẹketọde ke esịt mi—emi eketiede nte ama akpa—ama ọtọn̄ọ ndifiak n̄kọri ke esịt mi. Ke uwụtn̄kpọ, ndusụk ini ekesidi mma ntie ye mme ufan mi n̄n̄wọn̄ ikọn̄ekpo, ntọn̄ọ ndikere mban̄a Jehovah. Ediwak mme ufan mi ẹkedọhọ ke imama Abasi, edi mmọ ikodụhe uwem nte nditọ Abasi. Sia mmen̄koyomke nditie nte mmọ, mma ndiọn̄ọ se n̄kpanamde. Akana mfiak nnyọn̄ mbịne Jehovah.

Edi akpanikọ nte ke owo ndifiọk se akpanamde itiehe nte ndinanam n̄kpọ oro. Ikenen̄ekede isọn̄ mi ndinam ndusụk ukpụhọde, utọ nte nditre ikọn̄ekpo. Mma nnyụn̄ ndian̄ade nsan̄a ye n̄kani ufan mi, ndien ebiowo kiet ama ọtọn̄ọ ndikpep mi Bible.

Edi ikememke utom ndinam mme ukpụhọde eken. Ama enen̄ede ọsọn̄ ndimụm esịt n̄kama ke ini ẹnamde se iyatde mi. Ndusụk ini mma nsikeme ndinam emi ndien ke mme ini en̄wen n̄kesikemeke. Emi ama esinam idem emem mi. Ntre, usen kiet mma mbịne ebiowo emi ekesikpepde mi Bible n̄ketịn̄ n̄kpọ emi nnọ enye. Nte enye esinamde, enye ama enyene ime okop kpukpru se n̄kenyenede nditịn̄ onyụn̄ ọsọn̄ọ mi idem. Isan̄ kiet, enye ama ọdọhọ n̄kot ibuotikọ kiet ke Enyọn̄-Ukpeme emi aban̄ade ntak anade ika iso inam n̄kpọ Abasi ikûkpa mba.a Ima ineme mme n̄kpọ emi anade nnam ke ini esịt ayatde mi. Mma mbọn̄ akam etieti nnọ Jehovah mban̄a emi, ndien akam emi ye ibuotikọ oro n̄kokotde ke Enyọn̄-Ukpeme oro ẹma ẹn̄wam mi ndimụm idem n̄kama ke ini ẹnamde se iyatde mi. Ke akpatre, ke April 2000, mma nna baptism nte kiet ke otu Mme Ntiense Jehovah. Ete ye eka mi ẹma enem esịt etieti.

UFỌN ORO MBỌDE: Ndifiọk ke mmodu eti uwem idahaemi anam esịt ana mi sụn̄. Mmokop inemesịt idahaemi ke kpukpru se nnamde—edide nnam utom, ndụk mbono esop, m̀mê nduọk odudu. Nnyụn̄ nda uwem nte uwem etiede.

Mmọkọm Jehovah nte ete ye eka mi mîkefreke mi. Mmekere n̄ko mban̄a ikọ Jesus emi odude ke John 6:44. Itien̄wed emi ọdọhọ ete: “Baba owo kiet ikemeke nditiene mi ibọhọke Ete, emi ọkọdọn̄de mi, odụri enye edi.” Enem mi etieti nte Jehovah odụride mi ada anam n̄keme ndifiak nnyọn̄ mbịne enye.

“Mma nnen̄ede nyom ete.”—MARCO ANTONIO ALVAREZ SOTO

N̄KAMANA KE 1977

NTO CHILE

N̄KESITIENE MBRE ATA IDIỌK IKWỌ

NTE UWEM MI EKETIEDE: Eka mi ọkọbọk mi ke Punta Arenas, ediye obio emi odude ekpere akpa Magellan ke n̄kan̄ utịt utịt edem usụk South America. Ete ye eka mi ẹkedian̄ade ndọ ke ini n̄kedide isua ition kpọt, ndien emi ama anam n̄kop ndobo etieti. Mma nnen̄ede nyom ete.

Eka mi ama ekpep Bible ye Mme Ntiense Jehovah, ndien enye ama esimen mi aka mme mbono esop ke Ufọkmbono Obio Ubọn̄. Edi n̄kamaha mme mbono esop emi, ntre mma nsitịbe n̄kpọ nnam ke usụn̄ man n̄kûka. Ke ini n̄kedide isua 13, mma ntre mbono esop ofụri ofụri.

Mma ntọn̄ọ ndima ikwọ ini oro, ndien mma ndiọn̄ọ ke n̄kada okịm ke Abasi. Ke ini n̄kesịmde isua 15, mma nsibre ata ndiọi ikwọ ke mme itie usọrọ, itie un̄wọn̄ n̄kpọ, ye ke mme itie mboho eken. N̄kesidụk ndụk ye mme akwaikwọ, ndien emi ama anam ndinem ikwọ ẹsidọn̄ mi ndibre. Mma n̄kekpep ikwọ ke ufọkn̄wed oro okodude ke obio nnyịn. Ke ini n̄kedide isua 20, mma n̄wọrọ n̄kodụn̄ ke Santiago emi edide ibuot obio oro man n̄ka iso n̄kpep ikwọ. Mma nnyụn̄ n̄ka iso ndibre ndiọi ikwọ ye nsio nsio n̄ka ubre ndiọi ikwọ.

Ofụri emi, n̄kosụk n̄kopke inem ke isọn̄ esịt mi. Mma nsikpa mmịn nnyụn̄ n̄n̄wọn̄ ikọn̄ekpo ye mbon mbre ikwọ nnyịn emi n̄kadade nte nditọeka mi, sia n̄kekerede ke emi ayanam mi n̄kop inemesịt. N̄kedi ata owo nsọn̄ibuot, ndien ẹma ẹkeme ndikụt emi ke nte n̄kesisịnede n̄kpọ nnyụn̄ n̄kamade idem. N̄kesisịne mbubịt ọfọn̄, n̄kwatke ntan̄ebek, nnyụn̄ nyak idet ibuot mi ẹniọn̄ ẹsịm isịn.

Mma nsin̄wana en̄wan ediwak ini nnyụn̄ ndụk mfịna ye mme bodisi. Ini kiet ke mma n̄kakpa mmịn, mma n̄kan̄wana ye mme anyam ikọn̄ekpo emi ẹkefịnade mi ye mme ufan mi. Mmọ ẹma ẹmia mi tutu ẹbụn̄ mi ọkpọ mban̄.

Se ikenen̄erede ibiak mi edi ami ndifiọk nte ke ufan mi an̄wan ama esika akana ye ata ufan mi ke ediwak isua, ndien idụhe ufan mi ndomokiet emi eketịn̄de se ikade iso inọ mi. N̄kpọ emi ama ọdiọk mi esịt tutu.

Mma mfiak nnyọn̄ Punta Arenas n̄kebre ikwọ nnyụn̄ n̄kpekpep mme owo ikwọ. N̄kosụk mbebre ata ndiọi ikwọ. Mma nsobo ediye n̄kaiferi emi ekerede Sussan, ndien nnyịn ima itọn̄ọ ndidụn̄ kiet. Nte ini akade, Sussan ama edikụt ke ami nnịmke ke Abasi edi ita-ke-kiet nte eka imọ enịmde, ntre enye ama obụp mi m̀mê Abasi idịghe ita-ke-kiet. Mma ndọhọ enye ke Abasi idịghe ita-ke-kiet edi ke ndiọn̄ọke mme itie N̄wed Abasi emi n̄kpadade nsọn̄ọ emi. Mma ndọhọ enye ke Mme Ntiense Jehovah ẹkeme ndiwụt enye ke Bible ke Abasi idịghe ita-ke-kiet. Ekem mma nnam se mmen̄kanamke ke ediwak isua—mbọn̄ akam nnọ Abasi nte enye an̄wam mi.

Usen ifan̄ ke emi ebede, mma n̄kụt ete kiet emi okosụk etiede nte mmọdiọn̄ọ enye, nnyụn̄ mbụp enye m̀mê enye edi kiet ke otu Mme Ntiense Jehovah. Okposụkedi emi nte n̄ketiede ekenyekde enye idem, enye ama osụk ọbọrọ kpukpru se n̄kobụpde enye mban̄a usen ye ini emi ẹsinịmde mbono esop ke Ufọkmbono Obio Ubọn̄. Mma ndiọn̄ọ ke ibọrọ akam oro n̄kọbọn̄de nnọ Abasi edi emi. Ntre, mma n̄ka Ufọkmbono Obio Ubọn̄ oro, n̄ketie ke ata edem mbak owo ẹdikụt mi. Edi ediwak owo emi ẹkesikụtde mi mi ke ini n̄kedide ata ekpri ẹkesụk ẹdọdiọn̄ọ mi. Mmọ ẹma ẹfat mi ẹnyụn̄ ẹdara mi ndien esịt ama enem mi etieti. Eketie mi nte mmọnyọn̄ ndi ufọk. Mma n̄kụt ete emi ekesikpepde mi Bible ke ini n̄kedide eyenọwọn̄ nnyụn̄ ndọhọ enye ọtọn̄ọ ntak ekpep mi Bible.

NTE BIBLE OKOKPỤHỌREDE UWEM MI: Usen kiet, mma n̄kot Mme N̄ke 27:11 emi ọdọhọde ete: “Eyen mi, nyene ọniọn̄, nyụn̄ dat mi esịt.” Ama enen̄ede otụk mi ndifiọk ke owo nte ami ekeme ndinam Andibot ofụri ekondo adat esịt. Mma ndifiọk do ndien ke Jehovah edi Ete oro n̄koyomde ke ofụri eyouwem mi.

N̄koyom ndinam esịt adat Ete mi eke heaven emi nnyụn̄ nnam uduak esie, edi ikọn̄ekpo ye mmịn emi n̄kodụkde ufụn nnọ ke ediwak isua ikayakke. Mma ndi ndikụt ke se Jesus eketịn̄de ke Matthew 6:24 edi ata akpanikọ, nte ke “baba owo kiet ikemeke ndidụk ufụn nnọ eteufọk iba.” Nte n̄kosụk ndomode ndinam ukpụhọde, se ẹwetde ke 1 Corinth 15:33 ama enen̄ede otụk mi. Itien̄wed oro ọdọhọ ete: “Idiọk nsan̄a ababiat eti ido.” Mma ndifiọk ke ndikemeke nditre ndiọi uwem oro n̄kesidude edieke n̄kade iso ndụk nsan̄a ye mbon oro n̄kesidụkde nsan̄a. Mma nnam se Bible etemede nnyụn̄ ntre kpukpru n̄kpọ emi ẹkesinamde ntuak ukot nduọ.—Matthew 5:30.

Ama enen̄ede ọsọn̄ mi nditre ndiọi ikwọ sia mma nnen̄ede mma ikwọ. Edi mbufa ufan oro n̄kenyenede ke esop Mme Ntiense Jehovah ẹma ẹn̄wam mi ntre ndiọi ikwọ. Mma ntre ikọn̄ekpo n̄ko nnyụn̄ ntre ndin̄wọn̄ mmịn mbe ubọk. Mma mfat idet, n̄kwat ntan̄ebek, nnyụn̄ ntre ndisịne mbubịt ọfọn̄. Ke ini n̄kọdọhọde Sussan ke mmọn̄ mfat idet mi, enye ama oyom ndifiọk se ikpanamde mfat idet, onyụn̄ ọdọhọ ete, “Mmọn̄ ndi ndise se ẹsinamde ke Ufọkmbono Obio Ubọn̄ oro!” Enye ama edi, ndien se enye okokụtde ama enem enye etieti, ntre enye ama ọtọn̄ọ ndikpep Bible. Ekem ami ye Sussan ima idọ ndọ. Ke 2008, nnyịn mbiba ima ina baptism nte Mme Ntiense Jehovah. Esịt enem nnyịn nditiene eka mi n̄kpono Jehovah.

UFỌN ORO MBỌDE: Mmọbọhọ ndiọi nsan̄a ererimbot ye inuaokot inem uwem. Ke mmama ikwọ, edi nsasat ikwọ mi idahaemi. Mmada kpukpru se n̄kụtde ke uwem emi n̄n̄wam ubon mi ye mbon en̄wen, akpan akpan mme uyen. Nyom ndinam mmọ ẹfiọk ke inyeneke se idude ke ererimbot emi; ke se ededi oro owo enyenede ke ererimbot ẹtie “nte mbio.”—Philippi 3:8.

Mmedinyene nti ufan ke esop Mme Ntiense Jehovah; mmọ ẹnen̄ede ẹma kiet eken ẹnyụn̄ ẹtie emem emem. Se ikam inemde mi ikan edi ke nte nsan̄ade n̄kpere Jehovah, mmedi ndikụt ke enye edi Ete oro n̄koyomde ke ofụri eyouwem mi.

[Ikọ Idakisọn̄]

[Se ẹwetde ke ikpọ abisi ke page 13]

‘Se inamde n̄keme ndifiak nnyọn̄ mbịne Jehovah edi ke enye odụri mi ada’