Kpep N̄kpọ to Ikọ Abasi

Nso ke Abasi Aduak Ndinam Ido Ukpono?

Ibuotikọ emi ọbọrọ mme mbụme emi ẹkemede ndidi emesibụp onyụn̄ owụt n̄ko ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Ndi kpukpru ido ukpono ẹfọn?

Mbon emi ẹnyenede eti esịt, emi ẹyomde ndinem Abasi esịt, ẹdu ke ediwak ido ukpono. Abasi okụt onyụn̄ enen̄ede ama mmọ. Edi, ndusụk owo ẹnam ediwak ndiọi n̄kpọ ke enyịn̄ ido ukpono. Ke eset, mme adaiso ido ukpono ẹma ẹsikam ẹtụhọde mbon oro mîdaha ye mmọ. (2 Corinth 4:3, 4; 11:13-15) Mbụk n̄kpọntịbe eyomfịn anam ifiọk nte ke ndusụk mme adaiso ido ukpono ẹsisịn udọn̄ ẹnọ ikọt mmọ ndinam ibak, nduọk bọmb, nnyụn̄ n̄n̄wana ekọn̄. Mme adaiso ido ukpono n̄ko ẹsisabade nditọwọn̄.—Kot Matthew 24:3-5, 11, 12.

Bible ekpep nte ke orụk ido ukpono iba ẹdu—ido ukpono akpanikọ ye nsunsu ido ukpono. Nsunsu ido ukpono ikpepke akpanikọ iban̄a Abasi. Edi Jehovah Abasi oyom mme owo ẹdiọn̄ọ akpanikọ ẹban̄a imọ.—Kot 1 Timothy 2:3-5.

2. Nso ke Abasi aduak ndinam ido ukpono?

Odu mme ido ukpono emi ẹdọhọde ke imama Abasi edi inamke n̄kpọ esie; Abasi iyomke mmọ ẹbian̄a mme owo. Ke akpanikọ, mme andibuana ke utọ ido ukpono emi ẹma ndidi ufan ye ererimbot emi Satan kpa Devil akarade. (James 4:4; 1 John 5:19) Ikọ Abasi ọdọhọ ke mme ido ukpono oro ẹdade ẹnọ ukara utu ke ndida nnọ Abasi ẹbiet akpara. Bible okot akpara emi “Akwa Babylon.” Nsunsu ido ukpono ọkọtọn̄ọ ke Babylon ke Ukwọ eyo Noah ama ekebe. Ke mîbịghike, Abasi ọmọn̄ ososobo mme ido ukpono emi ẹbian̄ade ẹnyụn̄ ẹfịkde mme owo.—Kot Ediyarade 17:1, 2, 5, 17; 18:8, 23, 24.

3. Nso ke Abasi edinam man ofụri ererimbot ẹkop inemesịt?

Nsobo emi ẹdisobode nsunsu ido ukpono mi edi eti mbụk. Emi ayanam ofụri ererimbot ẹbọ emem. Nsunsu ido ukpono idifiakke ibian̄a mme owo m̀mê nditọ ubahade ke otu ubonowo. Kpukpru owo ẹyediana kiet ẹtuak ibuot ẹnọ ata Abasi kierakiet.—Kot Isaiah 11:9; Ediyarade 18:20, 21; 21:3, 4.

4. Nso ke mbon oro ẹnyenede eti esịt ẹkpenam?

Jehovah ifreke mbon oro ẹnyenede eti esịt, oro ẹsụk ẹdude ke mme nsunsu ido ukpono ke ofụri ererimbot. Enye ke atan̄ mmọ obok ọtọkiet idahaemi onyụn̄ ekpep mmọ akpanikọ.—Kot Micah 4:2, 5.

Jehovah esidara mbon oro ẹyomde ndinam n̄kpọ esie onyụn̄ ada mmọ nte nditọ esie. Ọkpọkọm mme ufan ye iman nnyịn inemke esịt ke ini itọn̄ọde ndinam n̄kpọ Jehovah, inyeneke se itakde nnyịn. Ndinam n̄kpọ Abasi anam nnyịn idi ufan Abasi inyụn̄ isịne ke ubon esie emi ẹdidude uwem ke nsinsi.—Kot Mark 10:29, 30; 2 Corinth 6:17, 18.

Edieke oyomde ndifiọk n̄kpọ en̄wen, mbọk kot ibuot 15 ye 16 ke n̄wed Nso ke Bible Enen̄ede Ekpep?, emi Mme Ntiense Jehovah ẹsiode.

[Ebiet Ẹdade Ndise Ẹto ke page 16]

The Complete Encyclopedia of Illustration/J. G. Heck