San̄a Kpere Abasi

Andinọ Kpukpru Mbon Emi Ẹnamde N̄kpọ Esie Utịp

ANIE mîsinemke esịt ke ini ẹkọmde enye ke eti n̄kpọ emi enye anamde m̀mê ke enọ emi enye ọnọde owo? Esinem kpukpru nnyịn ke ini mbon oro imade ẹkọmde nnyịn ke se nnyịn inamde. Ke akpanikọ, nnyịn imama Jehovah Abasi nnyịn ikan owo efen ekededi. Ndi enye esiwụt esịtekọm aban̄a se inamde inọ enye? Ẹyak idụn̄ọde se enye akanamde ye Ebed-melech emi akanamde se ikoyomde ndida enye ibuot ọnọ mme prọfet Abasi.—Kot Jeremiah 38:7-13 ye 39:16-18.

Anie ke Ebed-melech ekedi? Etie nte enye ekedi adaidaha ke okụre ufọk ubọn̄ Edidem Zedekiah ke Judah.a Enye okodu uwem ke eyo Jeremiah, emi Abasi ọkọdọn̄de ete ọkọdọhọ Judah emi ẹkedide mbon nsọn̄ibuot ke ẹmọn̄ ẹsobo obio mmọ. Ebed-melech ama enen̄ede abak Abasi onyụn̄ enen̄ede okpono Jeremiah kpa ye oro enye okodude ye mbọn̄ emi mîkabakke Abasi. Ini emi ẹkenen̄erede ẹkụt ke Ebed-melech ekedi ata owo Abasi ekedi ke ini ndiọi mbọn̄ emi ẹkedọhọde ke Jeremiah oyom iduọ obio ẹketopde enye ẹsịn ke obube emi eketiede okpụk okpụk man esịne do akpa. (Jeremiah 38:4-6) Nso ke Ebed-melech akanam?

Ebed-melech ama adaha uko uko eketịn̄ ọnọ Edidem Zedekiah ke se mbọn̄ esie ẹnamde ifọnke, ifeheke m̀mê nso ke mmọ ẹdinam imọ. Anaedi enye akanyan mbọn̄ emi ubọk ke iso ke ini enye ọkọdọhọde ete: ‘Mbon emi ẹmenam Jeremiah idiọk.’ (Jeremiah 38:9) Edidem Zedekiah ama okop se Ebed-melech etịn̄de, onyụn̄ ọdọhọ enye ada owo 30 okosio Jeremiah ke obube.

Ebed-melech ama anam n̄kpọ en̄wen emi owụtde ke enye ekedi ata owo Abasi. Enye ama “okosion̄o ntaha ọfọn̄ ye mbai ọfọn̄ . . . ada urụk osụhọde mmọ esịn ke obube udọn̄ mmọn̄ oro ọnọ Jeremiah.” Ntak emi enye akanamde emi? Enye okoyom Jeremiah emen ọfọn̄ emi esịn ke n̄kpafaha mbak urụk oro edibụp enye ke ini ẹdụride enye ẹsio ke obube.—Jeremiah 38:11-13.

Jehovah ama okụt se Ebed-melech akanamde. Ndi Jehovah ama ama se enye akanamde emi? Abasi ama ọdọhọ Jeremiah ọkọdọhọ Ebed-melech ke imọn̄ isosobo Jerusalem, edi ke ‘iyanyan̄a enye, idiyakke enye isịn ke ubọk mbon oro enye okopde ndịk aban̄a, ye nte ke imọ iditreke ndinam enye ọbọhọ, idinyụn̄ iyakke enye ọduọ ke akan̄kan̄, ye nte ke iyọnọ enye ukpọn̄ esie nte n̄kpọ mbụme.’ Ntak emi Jehovah ọkọn̄wọn̄ọde ndinyan̄a Ebed-melech? Jehovah ọkọdọhọ enye ete: “Koro afo ọbuọtde idem ye ami.” (Jeremiah 39:16-18) Abasi ama ọfiọk ke Ebed-melech akanam n̄kpọ emi sia enye ọkọbuọtde idem ye imọ, idịghe n̄kukụre ke ntak emi enye akamade Jeremiah.

Akpan n̄kpọ emi ikpepde ke mbụk emi edi ke Jehovah ama se nnyịn inamde inọ enye. Bible owụt ke Jehovah esiti ọkpọkọm ata ekpri n̄kpọ emi inamde inọ enye ke ntak emi ibuọtde idem ye enye. (Mark 12:41-44) Ndi inemke fi ndisan̄a n̄kpere Abasi emi esiwụtde esịtekọm ntem? Edieke asan̄ade ekpere enye, Enye iditreke ndinọ fi utịp sia Bible ọdọhọ ke enye edi “andinọ mbon oro ẹnen̄erede ẹyom enye utịp.”—Mme Hebrew 11:6.

Itie Bible emi okpokotde ke May:

◼ Jeremiah 32-50

[Ikọ Idakisọn̄]