Ntọt Mbono Ofụri Isua
Mbono Oro Ẹkenemede Edidianakiet ye Mme Ndyọ Ndyọ N̄kpọ Oro Ẹduakde
MBONO ofụri isua eke Watch Tower Bible and Tract Society of Pennsylvania esisan̄a ye nduaidem. Ntem ke okonyụn̄ edi ye mbono ofụri isua ọyọhọ 127, emi ẹkenịmde ke Saturday, October 1, 2011! Mbon oro ẹkekotde ke ofụri ererimbot ẹma ẹsop idem ke Ufọk Mbono Mme Ntiense Jehovah ke Jersey City ke New Jersey ke U.S.A.
Gerrit Lösch emi edide owo Otu Ukara ama ọkọm otuowo oro ẹkekopde inemesịt do ete ẹmedi-o. Enye ama asian mme andidụk emi ẹketode n̄kpọ nte idụt 85 ẹdi ete ke idụhe mme owo ke ofụri ererimbot emi ẹdianade kiet nte mmọ. Utọ edidianakiet emi ọnọ eti ikọ ntiense onyụn̄ ọnọ Jehovah ubọn̄. Ke nditịm ntịn̄, ẹkenen̄ede ẹneme edidianakiet ke mbono emi.
ETI MBỤK EMI OTODE MEXICO
Akpa n̄kpọ ke mbono oro ama enen̄ede owụt nte ikọt Jehovah ẹdianade kiet. Baltasar Perla ama anam ndụn̄ọde ye owo ita emi ẹdude ye enye ke Bethel Mexico aban̄a editan̄ n̄kọk itieutom itiokiet ke mme idụt Ufọt Ufọt America ndian kiet ye n̄kọk itieutom Mexico. Emi anam mme owo emi ẹnyenede nsio nsio ido edinam ẹnyụn̄ ẹtode nsio nsio idụt ẹdidu ke ubon Bethel Mexico. Nditọete ndito nsio nsio idụt ntem ndi emesịn udọn̄ ọnọ kpukpru owo. Etie nte n̄kpọ eke Abasi onụkde adan̄a mme idụt ọduọk.
Mfịna kiet oro ẹkenyenede ke nditan̄ ndusụk n̄kọk itieutom ndian kiet ekedi nte ẹkpen̄wamde mme asuanetop ẹkụt ke owo idian̄akede mmimọ ikpọn̄ esop Jehovah kpa ye oro n̄kọk itieutom mîdụhe aba ke idụt mmọ. Ke ntak emi, ẹnọ esop kiet kiet e-mail emi mbon en̄wen mîkemeke ndidụk man otodo idem mbon emi ẹdude nsannsan ẹkpekeme ndinyene nneme nnennen nnennen ye n̄kọk itieutom.
NTỌT EMI ABAN̄ADE SE IKETỊBEDE KE JAPAN
James Linton emi otode n̄kọk itieutom Japan ama etịn̄ nte unyekisọn̄ emi eketịbede ye ata akwa mbufịt inyan̄ibom emi ọkọtọde ọdọk obot ke March 2011 ẹkenọmọde nditọete nnyịn ke idụt oro. Ediwak Mme Ntiense ẹma ẹtaba mme owo ye inyene mmọ. Mme Ntiense emi ẹdude ke mme ebiet oro afanikọn̄ emi mîkesịmke ẹma ẹnọ se ibede ufọk 3,100 ye ediwak ubomisọn̄. Nditọete ẹma ẹdiana ye Kọmiti Ubọpufọk Eke Ikpehe ke Ikpehe ẹnam utom okoneyo ye uwemeyo man ẹdiọn̄ ufọk nditọete mmọ. Se ibede owo 1,700 ẹma ẹnyịme ndinam utom ke ebiet ekededi oro ẹkeyomde mbonutom. Owo 575 ẹkenọ idemmọ unyịme unyịme ndifiak ndiọn̄ Ufọkmbono Obio Ubọn̄, ndien ediwak owo ẹma ẹto United States ẹditiene ẹnam utom emi.
Ẹmenen̄ede ẹdọn̄ mbon oro ẹkesobode unọmọ emi esịt ẹnyụn̄ ẹsọn̄ọ mbuọtidem mmọ. Se ibede mbiowo 400 ẹmenam utom ubọkerọn̄ ke ebiet oro oyomde ẹnam. Ẹma ẹkụt nte Otu Ukara ẹkerede ẹban̄a mbon emi ke ini mmọ ẹkenọde esenyịn zone iba ẹto ibuot itieutom ofụri ererimbot ẹka ebiet oro afanikọn̄ emi ẹketịbede ẹkesịn udọn̄ ẹnọ mme owo. Nte Mme Ntiense ke ofụri ererimbot ẹwụtde ke imetiene ikere iban̄a mmọ enen̄ede ọdọn̄ mmọ esịt.
MME IKPE ORO IKANDE
Otuowo ẹma ẹnen̄ede ẹkpan̄ utọn̄ ke ini Stephen Hardy emi otode n̄kọk itieutom Britain ekenemede aban̄a mme ikpe oro nnyịn ikande ke ndondo emi. Ke uwụtn̄kpọ, ukara France ọkọdọhọ n̄ka oro nnyịn idade inam utom ke France ekpe tax miliọn dollar 82. Ẹma ẹbiere mfịna emi ke ini Esopikpe Europe Oro Esede Aban̄a Unen Owo (ECHR) ẹketebede nnyịn ikpe ẹnyụn̄ ẹdọhọde ke ukara France abiat Ọyọhọ Ibet 9 ke Ediomi Europe, emi ọnọde mme owo ifụre ndimek ido ukpono. Ubiereikpe oro ẹkenọde owụt ke idịghe okụk akakam edi ntak ikpe emi, koro ẹkedọhọ ẹte: “Ndisịn ndinyịme n̄ka ido ukpono, ndiyom usụn̄ ndisuan mmọ, nditịn̄ ikọ nsụhọde mmọ itie—kpukpru emi ẹdi usụn̄ ndibọ owo unen emi Ọyọhọ Ibet 9 ke Ediomo Europe ọnọde.”
ECHR ẹma ẹtebe nnyịn ikpe emi ikenyenede ye Armenia n̄ko. Ọtọn̄ọde ke 1965, ECHR ẹma ẹbiere ke Ediomi Europe inọhọ owo unen ndisịn utom ekọn̄ ke ini ukara ẹkotde enye. N̄kponn̄kan Ikpehe ke Esopikpe Europe Oro Esede Aban̄a Unen Owo ama ebiere ete ke Ediomi Europe ọnọ owo unen “ndisịn utom ekọn̄ edieke ukpepn̄kpọ ido ukpono esie mînyịmeke enye anam.” Ubiere emi enyene ndinam Armenia ye mme utọ idụt nte Azerbaijan ye Turkey ẹnọ mbon idụt mmọ unen emi n̄ko.
UTOM UBỌPN̄KPỌ
Guy Pierce emi edide owo Otu Ukara eketịn̄ ikọ ke oro ebede, onyụn̄ ọdọhọ ke imọfiọk ke kpukpru owo ẹkpema ndifiọk n̄kpọ mban̄a utom ubọpn̄kpọ oro ikamade ke ubọk ke Stet New York. Enye ama osio vidio emi owụtde se ikade iso ke Wallkill, Patterson, ye obufa itie oro ẹdepde ke Warwick ye Tuxedo ke New York. Ke ẹbọp obufa ufọkidụn̄ emi enyenede se ibede ubet 300 ke Wallkill, ndien ẹdikụre utom emi ke 2014.
Ẹduak n̄ko nditọn̄ọ utom ke isọn̄ oro ẹdepde ke Warwick; isọn̄ emi edi hectare 100. Brọda Pierce ọkọdọhọ ete: “Okposụkedi emi nnyịn mîfiọkke kan̄a se idide uduak Jehovah kaban̄a Warwick, nnyịn imọn̄ itọn̄ọ ndibọp ufọk ke isọn̄ oro, ndien iduak ndisio ibuot itieutom ofụri ererimbot eke Mme Ntiense Jehovah n̄ka do.” Ke ẹnam ndutịm n̄ko man ẹkpebon n̄kpọutom ye n̄kpọ ubọpufọk ke isọn̄ oro edide hectare 20, emi edide kilomita duop ọtọn̄ọde ke edem edere Warwick. Brọda Pierce ọkọdọhọ n̄ko ete: “Ke ndondo oro ẹnyịmede ẹtọn̄ọ utom, nnyịn idori enyịn ndikụre ofụri utom emi ke ufan̄ isua inan̄. Ndien iyanyam mme ufọk nnyịn ke Brooklyn.”
Brọda Pierce ama obụp ete: “Ndi Otu Ukara ikereke aba ke akwa ukụt ekpere?” Enye ama ọbọrọ ete: “Baba-o. Edieke akwa ukụt edide edisịm utom emi, ọkpọfọn, ọkpọfọn etieti!”
KPEME IDEM YE EKPE EKE OKỤNIDE
Ke oro ebede, Stephen Lett emi edide owo Otu Ukara n̄ko ama eneme 1 Peter 5:8, emi ọdọhọde ete: “Ẹnyene ikike, ẹnyụn̄ ẹdu ke ukpeme. Asua mbufo, kpa Devil, ke oyoyo nte ekpe eke okụnide, oyom owo eke enye editade.” Brọda Lett ama ọdọhọ ke nte ekpe esinamde n̄kpọ anam uwụtn̄kpọ Peter enen̄ede odot ye nte Devil esinamde n̄kpọ.
Sia ekpe okopde odudu onyụn̄ ọsọn̄de idem akan nnyịn, ikpanaha idomo ndin̄wana ye enye m̀mê ndifehe n̄kan enye ke ukeme idem nnyịn. Nnyịn imoyom Jehovah an̄wam nnyịn. (Isa. 40:31) Ekpe esidedịbe ebet unam emi enye edimụmde ita, ntre ana ifep ekịm eke spirit sia Satan esidịbe ke ekịm emi omụm owo. Kpa nte emi ekpe esiwotde edop emi mîsidịgheke owo uwem m̀mê eyen ewere-n̄wed enan̄ ikọt emi edede idap, ntre ke Satan mîsituaha owo mbọm, onyụn̄ oyom usụn̄ ndiwot nnyịn. Ke ekpe ama akata unam oro enye okowotde oyụhọ, owo isifiọkke aba nte unam oro eketiede, kpasụk ntre “akpatre itie” mbon oro Satan omụmde ke n̄kan̄ eke spirit ‘esidiọk akan akpa.’ (2 Pet. 2:20) Ntre ana in̄wana ye Satan inyụn̄ itịn̄ enyịn itiene mme edumbet Bible oro nnyịn ikpepde.—1 Pet. 5:9.
MA ITIE ORO AFO ENYENEDE KE UFỌK JEHOVAH
Samuel Herd emi edide owo Otu Ukara n̄ko ekedi etịn̄ikọ oro eketienede, ndien enye ọkọdọhọ ete: “Kpukpru nnyịn imenyene itie ke ufọk Jehovah.” Kpukpru mme Christian ẹnyene itie ke “ufọk” Abasi—kpa temple esie eke spirit—oro edi, ndutịm oro ẹnamde man ẹtuak ibuot ẹnọ enye ke ntak uwa ufak Jesus. Akpana ida itie nnyịn nte ata akwa ifet. Ukem nte David, nnyịn iyom “ndidụn̄ ke ufọk Jehovah ke ofụri eyouwem [nnyịn].”—Ps. 27:4.
Brọda Herd ama etịn̄ n̄kpọ aban̄a Psalm 92:12-14 onyụn̄ obụp ete, “Didie ke Jehovah anam nnyịn isehe?” Enye ama ọbọrọ ete: “Abasi ọdọn̄ nnyịn esịt, ekpeme nnyịn, onyụn̄ ọnọ nnyịn edinem mmọn̄ akpanikọ ke paradise eke spirit. Ẹyak ikọm enye ke se enye anamde emi ọnọ nnyịn.” Brọda Herd ama ọdọhọ otuowo ete: “Akpakam ọdọn̄ nnyịn ndidu ke ufọk Jehovah—idịghe ke ibio ini, edi ke nsinsi.”
MME CHRISTIAN ẸKPONO IKỌ ABASI
David Splane emi n̄ko edide owo Otu Ukara ama ọdọhọ ke utịn̄ikọ oro eketienede ete ke mme Christian ẹkpokpono Ikọ Abasi kpukpru ini. Ke eyo mme apostle, mmọ ẹkeda Ikọ Abasi ẹbiere eneni oro ekedemerede aban̄a edina mbobi. (Utom 15:16, 17) Edi ndusụk inua-okot mme Christian ke n̄kpọ nte isua 1,900 emi ẹkebede, oro ẹkebọde ukpepn̄kpọ akwaifiọk Greece ẹma ẹtọn̄ọ ndikpep ifiọk ibuot mmọ utu ke ndikpep se N̄wed Abasi ekpepde. Nte ini akakade, mbon en̄wen ẹma ẹsikpep ekikere inua-okot Mme Ete Ufọkabasi ye mme akwa edidem Rome utu ke ndikpep se Bible ekpepde; ntre ke mmọ ẹkesuan nsunsu ukpepn̄kpọ.
Brọda Splane ama ọdọhọ ke Jesus ama ada uwụtn̄kpọ kiet owụt ke ata mme Christian oro ẹyetde aran ẹyeka iso ẹdu ke isọn̄ ẹnyụn̄ ẹda ẹnọ akpanikọ. (Matt. 13:24-30) Nnyịn ifiọkke m̀mê mmọ ẹkedi mmanie. Nte ededi, ke ediwak isua ikie oro ẹbede mi, ediwak owo ẹdu emi ẹsịnde mme ukpepn̄kpọ ye edinam oro mîkemke ye N̄wed Abasi. Ndusụk ke otu mmọ ẹdi Archbishop Agobard ke Lyons ke iduọk isua 800 E.N., Peter emi okotode Bruys, Henry emi okotode Lausanne, ye Valdès (m̀mê, Waldo) ke iduọk isua 1100 E.N., John Wycliffe ke iduọk isua 1300 E.N., William Tyndale ke iduọk isua 1500 E.N., ye Henry Grew ye George Storrs ke iduọk isua 1800 E.N. Mme Ntiense Jehovah mfịn ẹka iso ẹtiene mme edumbet N̄wed Abasi ẹnyụn̄ ẹda kpukpru se mmọ ẹkpepde ẹto Bible. Oro anam Otu Ukara emek John 17:17, emi ọdọhọde ete: “Ikọ fo edi akpanikọ” nte ibuotikọ isua 2012.
MME ADUAI-OWO-IDEM UKPỤHỌDE ORO ẸNAMDE ẸBAN̄A UNỌ UKPEP YE UTOM
Ntọt emi Anthony Morris emi edide owo Otu Ukara n̄ko ọkọnọde ama owụt mme ukpụhọde oro ẹnamde ẹnọ mme isụn̄utom ye mme akpan asiakusụn̄. Etisịm September 2012, ẹyenịm Ufọkn̄wed Ukpep Bible Eke Mme Christian Oro Ẹdọde Ndọ ke mme idụt oro ẹmekde. Ẹkpụhọ uduak Ufọkn̄wed Gilead. Ọtọn̄ọde ke October isua oko, kpukpru mbon oro ẹnọde ukpep ke Gilead ẹdidi mbon oro ẹdude ke san̄asan̄a utom uyọhọ ini—utọ nte mme isụn̄utom oro akanam mîkaha Gilead, mme akpan asiakusụn̄, mme esenyịn oro ẹsan̄ade-san̄a, m̀mê mbon Bethel. Ẹyenọ mbon oro ẹkụrede ukpep ke ufọkn̄wed emi ẹka ẹkesọn̄ọ ikọt Abasi idem, edide ke n̄kọk itieutom, ke utom emi ẹsan̄ade-san̄a, m̀mê ke mme ebiet oro mme owo ẹnen̄erede ẹwak man mmọ ẹkpesịn udọn̄ ẹnọ mme esop ẹnen̄ede ẹnam utom ukwọrọikọ.
Ẹyenọ mme akpan asiakusụn̄ en̄wen ẹka ẹketọn̄ọ utom ke mme ebiet oro ẹdude nsannsan. Etisịm January 1, 2012, ẹkenyene ndinọ ndusụk mbon oro ẹkụrede ukpep ke Ufọkn̄wed Ukpep Bible Eke Nditọete Iren Emi Mîdọhọ Ndọ ye Ufọkn̄wed Ukpep Bible Eke Mme Christian Oro Ẹdọde Ndọ ẹkenam utom nte mme akpan asiakusụn̄ ibio ini man ẹketọn̄ọ ẹnyụn̄ ẹtat utom ukwọrọikọ ke mme ebiet emi ẹdude nsannsan. Ẹkenyene ndimek mmọ mme akpan asiakusụn̄ ke ufan̄ isua kiet kiet tutu esịm isua ita ke n̄wak-n̄kaha. Ẹkeme ndimek mbon oro ẹnamde utom emi ọfọn nte mme akpan asiakusụn̄ uyọhọ ini.
Mbono ofụri isua eke 2011 ekedi ini idatesịt. Imodori enyịn ke Jehovah ọyọdiọn̄ mbufa ndutịm oro ẹnamde mi man ẹtetịm ẹnam utom ukwọrọikọ ẹnyụn̄ ẹnam nnyịn idọdiọn̄ idiana kiet sia emi ayada ubọn̄ ye itoro ọsọk enye.
[Ekebe/Ndise ke page 18, 19]
IMA INEN̄EDE IFIỌK MMỌ
N̄kpọ en̄wen emi ẹkenamde ke mbono oro ekedi ndụn̄ọde emi ẹkenamde ye ebeakpa ition ke otu usụkkiet emi mme ebe mmọ ẹkedide mbon Otu Ukara. Sista Marina Sydlik, Edith Suiter, Melita Jaracz, Melba Barry, ye Sydney Barber ẹma ẹtịn̄ nte mmọ ẹkebọde akpanikọ ẹnyụn̄ ẹdụkde utom uyọhọ ini. Kpukpru mmọ ẹma ẹtịn̄ se isinemde mmọ nditi, nti edu mme ebe mmọ, ye ndinem n̄kpọ oro mmọ ẹkedianade ye mme ebe mmọ ẹnam ke utom Jehovah. Man ẹda ndụn̄ọde emi ẹkeberi inem inem, otuowo ẹma ẹkwọ Ọyọhọ Ikwọ 86, emi ibuotikọ edide: “Mme Anam-Akpanikọ Nditọete Iban.”
[Ndise]
(Enyọn̄) Daniel ye Marina Sydlik; Grant ye Edith Suiter; Theodore ye Melita Jaracz
(Isọn̄) Lloyd ye Melba Barry; Carey ye Sydney Barber
[Ndise Obio ke page 16]
(Ama oyom ndikụt nte enye enen̄erede etie, se n̄wed)
Ẹma ẹtan̄ n̄kọk itieutom itiokiet ẹdian kiet, ndien n̄kọk itieutom Mexico ese aban̄a utom mmọ
MEXICO
GUATEMALA
HONDURAS
EL SALVADOR
NICARAGUA
COSTA RICA
PANAMA
[Ndise ke page 17]
Nte ibuot itieutom ofụri ererimbot eke Mme Ntiense Jehovah ke Warwick ke New York editiede