Ọyọhọ Mbụme Ita: Ntak Emi Abasi Ayakde Mbọ Ufen-e?
ETE Ian ekedi ọn̄wọn̄-n̄kpọ-owo. Okposụkedi emi Ian ekenyenede kpukpru se enye okoyomde, ete esie ikamaha enye nte enye okoyomde ama imọ. Ian ọdọhọ ete: “N̄kenen̄ekede mma ete mi ke ntak ọkpọsọn̄ un̄wọn̄ n̄kpọ esie ye nte enye ekesinamde n̄kpọ ye eka mi.” Nte Ian okosụk ọkọride, enye ama ọtọn̄ọ ndiyịk m̀mê Abasi odu. Enye ọdọhọ ete: “Mma nsikere nte, ‘Edieke Abasi okpodude, ntak emi enye ayakde mme owo ẹbọ ufen-e?’”
Nso isinam ẹbụp mbụme emi? Idem ọkpọkọm unyeneke ekese mfịna, anaedi esịt esiyat fi ndikụt nte mbon oro mîduehe ẹbọde ufen. Edi ini emi isinen̄erede ibụp ntak emi Abasi ayakde ibọ ufen edi ini emi nnyịn ibọde ufen nte Ian ọkọbọde, m̀mê ini emi owo ke ubon nnyịn ọdọn̄ọde m̀mê akpade.
Didie ke ndusụk owo ẹbọrọ mbụme emi? Ndusụk owo ẹkere ke Abasi esiyak nnyịn ibọ ufen man ekpep nnyịn ndisụhọde idem nnyụn̄ n̄kop mme owo mbọm. Mbon en̄wen ẹkere ke mme owo ẹbọ ufen ke ntak idiọkn̄kpọ oro mmọ ẹkenamde ke emana oko.
Nso ke ibọrọ mmọ ọwọrọ? Ọwọrọ ke Abasi idọn̄ke enyịn ke ufen oro mme owo ẹbọde, ndien emi esinam ọsọn̄ nnyịn ndima enye. Ọwọrọ n̄ko ke Abasi edi ibak.
Nso ke Bible ekpep? Bible etịn̄ in̄wan̄-in̄wan̄ ke idịghe Abasi anam mme owo ẹbọ ufen. Bible ọdọhọ ete: “Ke ini idomo esịmde owo, yak enye okûdọhọ ete: ‘Abasi odomo mi.’ Koro owo ikemeke ndida idiọkn̄kpọ ndomo Abasi, enye ke idemesie inyụn̄ idomoke owo ekededi.” (James 1:13) Ndidọhọ ke Abasi anam ibọ ufen ikemke ye se Bible etịn̄de aban̄a edu Abasi. Ntak emi idọhọde ntre?
Kiet ke otu akpan edu Abasi edi ima. (1 John 4:8) Man owụt adan̄a nte Abasi amade nnyịn, Bible emen Abasi odomo ye eka emi enyenede nsekeyen. Abasi obụp ete: “Nte n̄wan ekeme ndifre eyen esie emi awapde eba inyụn̄ ituaha eyen idịbi esie mbọm? Iban emi ẹkam ẹkeme ndifre, edi ami ndifreke fi.” (Isaiah 49:15) Ndi emekere ke edima eka ekeme ndikokoi nnam eyen esie ibak? Ete m̀mê eka oro amade eyen esie esikam ananam n̄kpọ mbak eyen esie edibọ ufen. Kpasụk ntre, idịghe Abasi esinam mbon oro mîduehe ẹbọ ufen.—Genesis 18:25.
Edi mbon oro mîduehe ke ẹbọ ufen. Afo emekeme ndibụp ete, ‘Edieke Abasi ekerede aban̄a nnyịn onyụn̄ enyenede akakan odudu, ntak emi enye mîmenke mme n̄kpọ oro ẹsinamde mme owo ẹbọ ufen ifep?’
Enyene ntak emi Abasi ayakde mme owo ẹbọ ufen tutu esịm emi. Ntak kiet edi: Mme owo ẹsiwak ndinam mbon en̄wen ẹbọ ufen. Ediwak mbon oro ẹsifiomode ẹsinyụn̄ ẹfịkde mbon en̄wen iyomke ndikpụhọde. Ntre, man Abasi osio akpan n̄kpọ oro esinamde mme owo ẹbọ ufen efep, ana enye osobo mme utọ owo oro.
Apostle Peter ama etịn̄ ntak emi Abasi mîsoboke kan̄a mme anamidiọk. Enye ekewet ete: “Jehovah inuọnke ke ndinam un̄wọn̄ọ esie, nte ndusụk owo ẹkerede ke enye ọnuọn, edi enye akam enyene ime ye mbufo koro enye mîyomke baba owo kiet atak edi oyom kpukpru owo ẹkabade esịt.” (2 Peter 3:9) Jehovah Abasi ndika iso mme ime owụt ke enye ama mme owo onyụn̄ atua mmọ mbọm.
Edi Jehovah Abasi ọmọn̄ anam n̄kpọ ke mîbịghike. Enye ayada ukụt osio mme owo oro ẹnamde mbon oro mîduehe ẹkụt ukụt, usiene. Mbon oro ẹtụhọrede mme owo ke idiọk usụn̄ “ẹyebọ ufen nsinsi nsobo.”—2 Thessalonica 1:6-9.
Ian oro iketịn̄de iban̄a ke ntọn̄ọ ama okop inemesịt ndinyene nnennen ibọrọ ke mme mbụme oro enye okobụpde aban̄a ntak emi mme owo ẹsibọde ufen. Se enye ekekpepde ama anam enye okpụhọde nte enye adade uwem. Kot mbụk esie ke page 13 ke magazine emi.
Edieke oyomde ndifiọk n̄kpọ efen mban̄a ntak emi Abasi ayakde ibọ ufen tutu esịm emi ye se enye edinamde aban̄a emi, se ibuot 11 ke n̄wed Nso ke Bible Enen̄ede Ekpep? N̄wed emi odu n̄ko ke ikpehe Intanet www.jw.org
[Ekebe ke page 9]
Nso ke Jesus Eketịn̄ Aban̄a Ufen?
Jesus ikọdọhọke ke Abasi edi ntak ufen oro mme owo ẹbọde. Utu ke oro, kop se enye ọkọdọhọde okonyụn̄ anamde mi:
Jesus ama owụt ke idịghe Abasi ọnọ mbon oro mîduehe ufen. Enye ama ọkọk mbon udọn̄ọ, mme mbụn̄ọ, ye mme nnan. (Matthew 15:30) Mme utịben̄kpọ oro enye akanamde ẹkpep nnyịn akpan n̄kpọ iba: Akpa, Jesus akada odudu oro Abasi ọnọde enye an̄wam mme owo utu ke ndida nnọ mmọ ufen. Ọyọhọ iba, enye ikọkọkke mme owo udọn̄ọ sia okonyụn̄ anade ẹkọk. Ke ini enye okokụtde nte mme owo ẹbọde ufen, ‘mbọm mmọ ama anam’ enye. (Matthew 20:29-34) Nte Jesus akanamde n̄kpọ ke ini mme owo ẹkebọde ufen enen̄ede owụt nte esitiede Jehovah ke idem ke ini mme owo ẹbọde ufen. Se Jesus eketịn̄de, okonyụn̄ anamde, anam ifiọk ke esibiak Abasi ndikụt mme owo ẹbọde ufen, ke Enye onyụn̄ oyom ndinam mme owo ẹbọhọ ufen.—John 14:7, 9.
Jesus ama anam ẹfiọk ke Satan kpa Devil anam mme owo ẹbọ ufen. Enye ọkọdọhọ ke Satan “ekedi owotowo toto ke editọn̄ọ.” (John 8:44) Jesus ama ọdọhọ n̄ko ke Satan kpa Devil edi “andikara ererimbot emi,” n̄ko ke enye ke ‘ada kpukpru mme andidụn̄ isọn̄ otụn usụn̄.’—John 12:31; Ediyarade 12:9.
Jesus ama ọdọhọ ke ini ke edi emi ufen mîdidụhe aba. Enye ama ekpep mme mbet esie ete ẹbọn̄ akam ntem: “Ete nnyịn emi odude ke heaven, . . . yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matthew 6:9, 10) Ke ini Obio Ubọn̄ Abasi edide, ufen ididụhe ke isọn̄ kpa nte mîdụhe ke heaven.
Ke ini Jesus akayararede se iditịbede ọnọ apostle John, enye ama etịn̄ nte uwem editiede ke Obio Ubọn̄ Abasi. Ke ini oro, Abasi “ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”—Ediyarade 1:1; 21:3, 4.