Kpep N̄kpọ To Ikọ Abasi
Ndi Abasi Ayanam Ukara Kiet Akara Ererimbot?
Ibuotikọ emi ọbọrọ mme mbụme emi ẹkemede ndidi afo emesibụp onyụn̄ owụt n̄ko ebiet emi edikụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.
1. Ntak emi ọkpọfọnde ukara kiet akara ererimbot?
Mfịna ererimbot mfịn isioho owo eto. Ke ndusụk idụt, ata ediwak owo ẹdi ubuene, ke ẹnyụn̄ ẹfịk mmọ. Ke mme idụt eken, etie nte ediwak owo ẹforo tutu inyeneke se ẹdade inyene mmọ ẹnam. Ukara kiet kpọt ekeme ndideme inyene isọn̄ nnọ kpukpru owo ukem ukem.—Kot Ecclesiastes 4:1; 8:9.
2. Anie ke ẹkpemek akara ererimbot?
Ediwak owo imaha-ma ndikop ẹtịn̄de ẹban̄a owo kiet ndikara ererimbot sia idụhe eke ekpekemede ndikara ọfọn. Idụhe andikara emi kpukpru owo ẹmade. N̄ko-n̄ko, anie ke odudu mîkemeke ndikịm enyịn anam idiọk? Ndikam n̄kekere nte owo kiet akpakarade kpukpru owo ke ererimbot ke ọkpọsọn̄ ubọk esinam ediwak owo ndịk.—Kot Mme N̄ke 29:2; Jeremiah 10:23.
Jehovah Abasi emek Jesus eyen esie ndikara ererimbot ke nsinsi. (Luke 1:32, 33) Jesus ọfiọk nte n̄kpọ etiede mi ke isọn̄. Ke ini enye okodude ke isọn̄, enye ama ọkọk mme owo udọn̄ọ, ekpep mbon nsụkidem n̄kpọ, onyụn̄ esima nditie ye nditọwọn̄. (Mark 1:40-42; 6:34; 10:13-16) Mmọdo, Jesus ke ẹkpemek nte Andikara ererimbot.—Kot John 1:14.
3. Ndi owo kiet ekeme ndikara ererimbot?
Abasi emek Eyen esie ete etie ke heaven akara isọn̄. (Daniel 7:13, 14) Kpa nte mîsiyomke andikara odu ke kpukpru itụn̄ ye inụk oro enye akarade, iyomde Jesus edi edidu mi ke isọn̄ mbemiso akarade kpukpru owo.—Kot Matthew 8:5-9, 13.
Ndi kpukpru owo ẹyenyịme Jesus edi Andikara? Baba. Mbon oro ẹmade eti n̄kpọ kpọt ẹdinyịme. Jehovah oyosobo kpukpru mbon oro mîmaha eti Andikara emi Enye emekde.—Kot Matthew 25:31-33, 46.
4. Nso ke Jesus edinam?
Ukem nte ekpemerọn̄ esitan̄de mme erọn̄ esie obok, Jesus ke atan̄ mbon nsụhọdeidem ke kpukpru idụt obok, ke onyụn̄ ekpep mmọ nte Abasi esiwụtde ima. (John 10:16; 13:34) Mmọ ẹnen̄ede ẹsọn̄ọ ẹda ye Jesus ẹnyụn̄ ẹnyịme ke enye edi edidem mmimọ. (Psalm 72:8; Matthew 4:19, 20) Ke ofụri ererimbot, mbon oro ẹnyịmede Jesus nte Andikara ke ẹdiana kiet ẹsian mbon en̄wen ke enye edidi Edidem.—Kot Matthew 24:14.
Ibịghike, Jesus ọmọn̄ osio idiọk ukara efep ke isọn̄. Enye ememek ndusụk ke otu mbon oro ẹnyịmede enye nte Andikara ete ẹditiene imọ ẹtie ke heaven ẹkara isọn̄. (Daniel 2:44; 7:27) Ukara Jesus ayanam ifiọk Jehovah ọyọhọ isọn̄ oyonyụn̄ anam isọn̄ afiak edi paradise nte ekedide ke editọn̄ọ.—Kot Isaiah 11:3, 9; Matthew 19:28.
Edieke oyomde ndifiọk n̄kpọ efen mban̄a emi, mbọk kot ibuot 8 ke n̄wed Nso ke Bible Enen̄ede Ekpep?, emi Mme Ntiense Jehovah ẹsiode.