Mmọ Ẹkụt N̄kpọ Emi Ọfọnde Akan Christmas
EDIWAK miliọn mme Christian isidiaha Christmas. Didie ke mmọ ẹse ubiere mmọ emi? Ndi mmọ ẹkere ke enyene se itakde mmimọ? Ndi nditọ mmọ ẹkere ke enyene se mmimọ inanade? Kop se Mme Ntiense Jehovah ke nsio nsio ebiet ke ererimbot ẹtịn̄de ẹban̄a n̄kpọ emi.
● Nditi Jesus Christ: “Mbemiso n̄kakabarede ndi kiet ke otu Mme Ntiense Jehovah, n̄kesiwakke ndika ufọkabasi. Edieke edide mma nsika ufọkabasi, n̄kesika ke ini Christmas m̀mê Easter kpọt. Kpa ye oro, n̄kesitịghi Jesus Christ ke mme ini oro. Ndiaha Christmas aba, edi mmesika mbono esop ikaba ke urua, mmesinyụn̄ n̄kpep mme owo se Bible etịn̄de aban̄a Jesus!”—EVE, AUSTRALIA.
● Ndikop inemesịt ndinọ owo enọ: “Esinen̄ede enem mi ke ini mme owo ẹnọde mi n̄kpọ ke ini mmendorike enyịn. Esinyụn̄ enem mi ndinam kad nnyụn̄ n̄wet mme ndise nnọ mme owo koro emi esinam mmọ ẹnen̄ede ẹkop inemesịt onyụn̄ anam mi n̄kop n̄ko.”—REUBEN, NORTHERN IRELAND.
● Ndin̄wam mbon oro ẹyomde un̄wam: “Imesikop inemesịt ndinam udia nnọ mbon udọn̄ọ. Ndusụk ini imesinọ mmọ flawa, cake, m̀mê ekpri enọ man idem enem mmọ. Esinem nnyịn ndinam emi koro imesikeme ndika n̄kese mbon udọn̄ọ ini ekededi ke isua.”—EMILY, AUSTRALIA.
● Ubon ndidu ọtọkiet: “Ke ini ubon nnyịn ẹsisopde idem ọtọkiet, nditọ nnyịn ẹsida ini oro ẹfiọk nditọeka ete ye nditọeka eka mmọ, ete ete ye eka eka mmọ, ye nditọ eyeneka ete ye nditọ eyeneka eka mmọ. Sia nnyịn mîsikaha ikese mmọ ke akpan ini ke isua, isitiehe nte n̄kpọ eke ẹnyịkde-nyịk nnyịn inam, ndien mbonubon nnyịn ẹfiọk ke isidi idise mmọ ke ntak emi imade mmọ.”—WENDY, CAYMAN ISLANDS.
● Emem: “Etie nte utom esikpon ke ini Christmas tutu ediwak owo itịghe-ti emem. Esịt ana mi sụn̄ ke emi mma n̄kedikpep ke Bible se Abasi edinamde ọnọ mme owo. Idahaemi mmedifiọk ke n̄kpọ ọyọfọn ye nditọ mi ke ini iso.”—SANDRA, SPAIN.
[Ndise ke page 9]
Eve
[Ndise ke page 9]
Reuben
[Ndise ke page 9]
Emily
[Ndise ke page 9]
Wendy
[Ndise ke page 9]
Sandra