MME MBỤME BIBLE ORO ẸBỌRỌDE

Ndi Bible ekeme ndin̄wan̄a owo?

Bible edi Ikọ Abasi. Enye etie nte leta emi edima ete ewetde ọnọ ẹsọk eyen esie. (2 Timothy 3:16) Abasi ada Bible etịn̄ se ikemede ndinam man inem enye esịt, etịn̄ ntak emi enye ayakde idiọkn̄kpọ etịbe, ye se enye edinamde inọ nnyịn ke ini iso. Edi mme ọkwọrọikọ ke ndusụk ufọkabasi ikpepke nnennen se Bible etịn̄de, emi anam ediwak owo ẹkere ke Bible ikemeke ndin̄wan̄a owo.—Utom 20:29, 30.

Jehovah Abasi oyom nnyịn inen̄ede idiọn̄ọ imọ. Ntak edi oro enye ọnọde nnyịn n̄wed emi ekemede ndin̄wan̄a nnyịn.—Kot 1 Timothy 2:3, 4.

Nso ke akpanam man Bible an̄wan̄a fi?

Ke adianade ye ndinọ nnyịn Bible, Jehovah ama osio Jesus ọdọn̄ ete edikpep nnyịn Bible man Bible an̄wan̄a nnyịn. (Luke 4:16-21) Jesus ama esida nsio nsio ufan̄ikọ ke N̄wed Abasi anam Ikọ Abasi an̄wan̄a owo.—Kot Luke 24:27, 32, 45.

Jesus ama asiak esop Christian emi edikade iso inam utom emi enye ọkọtọn̄ọde. (Matthew 28:19, 20) Mfịn, ata mme anditiene Jesus ẹsinam mme owo ẹfiọk se Bible ekpepde aban̄a Abasi. Edieke amade, Mme Ntiense Jehovah ẹyema ndinam Bible an̄wan̄a fi.—Kot Utom 8:30, 31.