Ndi Mme Oto-Obot Afanikọn̄ Ẹwụt ke Esidi Abasi Anam Eti Anam Idiọk?

SE NDUSỤK OWO ẸDỌHỌDE: “Sia edide Abasi akara, enye esinam oto-obot afanikọn̄ etịbe; ndi idịghe ibak edi oro?”

SE BIBLE ETỊN̄DE: “Ofụri ererimbot esịne ke idak odudu andidiọk.” (1 John 5:19) Anie edi “andidiọk” emi? Bible okot enye Satan. (Matthew 13:19; Mark 4:15) Se Bible etịn̄de emi anam ikụt ntak emi oto-obot afanikọn̄ esitịbede. Mbọk kere ise, ‘Edieke ofụri ererimbot esịnede Satan ke ubọk, oro ọwọrọ ke enye anam mme owo ẹdiọk itọn̄, ẹma idem mmọ kpọt, inyụn̄ ikereke iban̄a utịp edinam mmọ. Emi esinam mme owo ẹsion̄o se Abasi ọkọdọn̄de ke isọn̄ emi tutu isọn̄ itiehe aba nte Abasi okoyomde enye etie. Ediwak ntaifiọk ẹdọhọ ke emi esinam oto-obot afanikon̄ etịbe, mîdịghe ke enye esinam enye enen̄ede ọdiọk.

Edi ntak emi Abasi ayakde Satan ada mme owo anam kpukpru emi? Se iketịbede ke ini Adam ye Eve ẹkesọn̄de ibuot ye Abasi anam ifiọk emi. Tọn̄ọ ke ini oro, ata ediwak owo ẹtiene Adam ye Eve ẹsọn̄ ibuot ye Abasi. Emi anam ubonowo ọduọ odụk ubọk Satan emi edide asua Abasi. Jesus okokot Satan “andikara ererimbot emi.” (John 14:30) Ndi enye edikara ererimbot emi ke nsinsi? Ihih!

Abiak Jehovaha ndikụt kpukpru ufen emi Satan amiade nnyịn. Ke uwụtn̄kpọ, ke ini nditọ Israel ẹkedude ke nnanenyịn, Bible ọdọhọ ke ama abiak Abasi. (Isaiah 63:9) Mbọm nnyịn anam Abasi ebiere nditre ibak ibak ukara Satan emi ke mîbịghike. Enye emek Jesus Christ Eyen esie emi edide eti Andikara ete akara nnyịn ke nsinsi.

SE ANADE IFIỌK: Okposụkedi emi Satan mîkemeke ndikpeme nnyịn ke ini oto-obot afanikọn̄ etịbede, Jesus eyekpeme nnyịn ke ini enye edikarade isọn̄ emi. Jesus ama ekpeme mme mbet esie ke ini idat idat oyobio ekesịmde mmọ ke akpa. Bible ọdọhọ ete: “Enye . . . aduari ofụm onyụn̄ ọdọhọ inyan̄ ete: ‘Dobo! Na sụn̄!’ Ndien ofụm odobo, akwa ndobo onyụn̄ odu.” Ndien mme mbet ẹdọhọ ẹte: “Anie ededi emi, emi ofụm ye inyan̄ ẹkopde uyo esie?” (Mark 4:37-41) Se iketịbede emi anam idiọn̄ọ ke Jesus eyekpeme kpukpru mbon emi ẹkopde item Abasi ke ini enye edidide Edidem.—Daniel 7:13, 14.