Didie ke Ikpeti Jesus Christ?

December ama esesịm, mme owo ke nsio nsio itie ẹsiwụt ndise Jesus ke usịnudia ufene. Ndi ikpenyene ndida Jesus nte nsekeyen kpukpru isua?—a Yak ineme ata akpan usụn̄ emi ikpetide Jesus. Nso ke ikeme ndikpep nto se mme ekpemerọn̄ ke mbọhọ Bethlehem ẹkenamde okoneyo oro Jesus akamanade?

Angel kiet ama ọbiọn̄ọde mmọ ke iso onyụn̄ ọdọhọ mmọ ete: “Andinyan̄a, emi edide Christ Ọbọn̄, amana ọnọ mbufo mfịn emi.” Angel emi ọkọdọhọ ke mmọ ẹyekụt nte ẹwan̄de Jesus ke ọfọn̄ ẹnịm ke usịnudia ufene. Kpa idaha oro, ediwak angel ẹma ẹto heaven ẹdidiana ye angel emi “ẹtoro Abasi.”

Ekpetie fi didie ke idem edieke okpokopde nte mme angel ẹtorode Abasi?— Esịt enem mme ekpemerọn̄ emi tutu mmọ ẹdọhọ ete: “Ẹyak nnyịn isọp ika Bethlehem ikese n̄kpọ emi.” Ke ini mmọ ẹsịmde do, mmọ ẹkụt ‘Mary ye Joseph, ye nsekeyen mmọ ke usịnudia ufene.’

Ibịghike mbon en̄wen ẹdisịm Bethlehem. Mme ekpemerọn̄ ẹtịn̄ se mme angel ẹketịn̄de ẹnọ mmọ. Idem enen̄ede akpa mmọ. Ndi enem fi ndikop utịbe mbụk emi?— Utọ mbụk emi ikpetreke-tre ndinem owo ekededi emi amade Abasi. Idahaemi yak ise ntak emi mbụk emana Jesus enemde ntem. Edi yak ibem iso itịn̄ se iketịbede mbemiso Mary ọdọde ebe.

Usen kiet, angel Gabriel ama edi edise Mary. Angel emi ọkọdọhọ ke enye ayaman eyen, ke eyen emi “oyokpon, oyonyụn̄ ekere Eyen Ata Edikon̄.” Enye ọdọhọ n̄ko ke eyen emi ‘edidi edidem ke nsinsi.’

Mary ama ọdọhọ angel oro m̀mê emi edisan̄a didie itịbe sia imọ mîdọhọ ebe. Angel oro ama ọdọhọ ke ‘odudu Ata Edikon̄ oyofụk enye ndien ke eyen oro edimanade edikere edisana Eyen Abasi.’ Ekedi ata utịben̄kpọ Abasi ndisio Eyen Esie ke heaven ndisịn ke idịbi Mary man enye akpamana nte nsekeyen!

Ndi emesikụt ndise “mme ọfiọkn̄kpọ owo” ita ye mme ekpemerọn̄ ẹkade ẹkese Jesus?— Ẹsiwak ndiwụt utọ ndise emi ke ini Christmas. Se ẹsiwụtde ke ndise emi idịghe akpanikọ. Mbon oro ẹkotde “mme ọfiọkn̄kpọ owo” mi ẹkedi mme asiak ntantaọfiọn̄. Yak ise se iketịbede ke mmọ ẹma ẹkesịm. Bible ọdọhọ ete: “Ke ini mmọ ẹdụkde esịtufọk mmọ ẹkụt ekpri eyen oro ye Mary eka esie.” Omokụt do ke ini mme asiak ntantaọfiọn̄ emi ẹkekade ẹkese Jesus, mmọ ikekwe enye ke usịnudia ufene, edi ẹkekụt enye ke ufọk ye Joseph ye Mary. Jesus ikedịghe aba nsekeyen, edi ama amana okpon!

Mme asiak ntantaọfiọn̄ emi ẹkenam didie ẹkekụt Jesus?— Ntantaọfiọn̄ akada mmọ owụt usụn̄. Ntantaọfiọn̄ emi ikadaha mmọ ika Bethlehem edi ekebem iso ada mmọ aka ufọk Edidem Herod ke Jerusalem. Bible ọdọhọ ke Herod emi okoyoyom ndiwot Jesus. Afo ekere ke anie akanam se itiede nte ntantaọfiọn̄ ada mme asiak ntantaọfiọn̄ emi ekesịm ufọk Herod?— Satan emi edide asua Abasi akanam.

Satan oyom mme owo ẹkere ke Jesus osụk edi nsekeyen emi mîkemeke ndinam n̄kpọ ndomokiet. Edi angel Gabriel ọkọdọhọ Mary ke ‘Jesus edidi edidem ke nsinsi.’ Jesus ke akara idahaemi ke heaven ndien ibịghike enye oyosobo kpukpru mme asua Abasi efep. Nte ikpesitide Jesus edi emi, nte ke enye edi Akwa Edidem. Nnyịn ikponyụn̄ inyene ndinam mbon en̄wen ẹfiọk emi.