MME MBỤME BIBLE ORO ẸBỌRỌDE

Ntak emi ikpọbọn̄de akam?

Jehovah Abasi oyom isitịn̄ mfịna nnyịn inọ imọ kpukpru ini. (Luke 18:1-7) Enye esikpan̄ utọn̄ ọnọ nnyịn sia ekerede aban̄a nnyịn. Sia Ete nnyịn eke heaven ọdọhọde isibọn̄ akam inọ imọ, ọkpọfọn isinam ntre.—Kot Philippi 4:6.

Nnyịn ikpọbọn̄ke akam inọ Abasi n̄kukụre man enye an̄wam nnyịn. Utu ke oro, ikpọbọn̄ man isan̄a ikpere enye. (Psalm 8:3, 4) Edieke isitịn̄ke nte etiede nnyịn ke idem inọ Abasi, iyenen̄ede ikpere enye.—Kot James 4:8.

Didie ke ikpọbọn̄ akam?

Ke ini ibọn̄de akam, Abasi iyomke imomụm ikọ idọn̄ ke ibuot; iyomke itịn̄ ikọ n̄wụtidem. Abasi idọhọke ke enyene akpan usụn̄ emi anade ida m̀mê itie ibọn̄ akam. Jehovah oyom akam nnyịn esito nnyịn esịt. (Matthew 6:7) Ke uwụtn̄kpọ, Hannah emi ekedide eyen Israel ama ọbọn̄ akam aban̄a se ikenen̄erede ifịna enye. Ndien ke ini Abasi akanamde mfụhọ esie akabade idatesịt, enye ama ọbọn̄ akam ọkọm Abasi ke ofụri esịt.—Kot 1 Samuel 1:10, 12, 13, 26, 27; 2:1.

Akam edi ata akwa ifet emi Abasi ọnọde nnyịn. Imekeme nditịn̄ mfịna nnyịn nnọ Andibot. Imekeme n̄ko nditoro nnyụn̄ n̄kọm enye ke se enye anamde. Ikpanaha ida ọsọn̄urua ifet emi Abasi ọnọde nnyịn mi ibre mbre!—Kot Psalm 145:14-16.