MME MBỤME BIBLE ORO ẸBỌRỌDE
Ndi mme angel ẹkeme ndin̄wam nnyịn?
Nte mme angel ẹken̄wamde Daniel asan̄autom Abasi ke eset, mmọ ke ẹn̄wam mme owo ẹdia ufọn eti mbụk mfịn
Jehovah Abasi ama obobot mme angel anyan ini mbemiso obotde owo. Mmọ ẹwak etieti. (Job 38:4, 7) Mme angel ẹdi spirit ndien mmọ ẹnen̄ede ẹnyene odudu. Ndusụk ini, Abasi esidọn̄ mmọ ẹdikpeme mme asan̄autom esie mi ke isọn̄ ẹnyụn̄ ẹteme mmọ se ẹkpenamde. (Psalm 91:10, 11) Mme angel ke ẹn̄wam mme owo mfịn ẹdia ufọn eti mbụk oro mme anditiene Jesus ẹkwọrọde.—Kot Ediyarade 14:6, 7.
Ndi akpana isibọn̄ akam inọ mme angel? Ihih. Akam edi usụn̄ kiet emi isituakde ibuot, ndien Abasi kpọt ke ikpatuak ibuot inọ. (Ediyarade 19:10) Sia mme angel ẹdide mme asan̄autom Abasi, mmọ ẹsikop item Abasi, ikopke item owo. Ntre, akpana isibọn̄ akam inọ Abasi kpọt, ke enyịn̄ Jesus.—Kot Psalm 103:20, 21; Matthew 26:53.
Ndi mme idiọk angel ẹdu?
Ukem nte owo, ẹkebot mme angel ye ifụre ndimek ndinam se ifọnde m̀mê se idiọkde. Edi, ediwak angel ẹma ẹsọn̄ ibuot ye Abasi. (2 Peter 2:4) Akpa ke otu mmọ ekedi Satan; ekem mbon en̄wen ẹma ẹtiene enye ẹsọn̄ ibuot ẹnyụn̄ ẹkabade demon. Ke ntọn̄ọ ntọn̄ọ mme akpatre usen emi idude mi, ẹma ẹsio Satan ye mme demon esie ke heaven ẹduọn̄ọ mi ke isọn̄.—Kot Ediyarade 12:7-9.
Idiọkido ye afai okpon etieti ke ererimbot toto ke 1914. Emi owụt ke Abasi ọmọn̄ ọsọsọp osobo Satan ye mme demon esie. Ndien Abasi ayanam isọn̄ etie nte enye akaduakde.—Kot Ediyarade 12:12; 21:3, 4.