Ini Ewe ke Obio Ubọn̄ Abasi Ọkọtọn̄ọ Ndikara?—Akpa Ikpehe

‘KA ISO DỤN̄ỌDE’ BIBLE

Caleb: John, enem mi nte isinemede Ikọ Abasi ntem.a Isan̄ oko, enyene mbụme emi okobụpde aban̄a Obio Ubọn̄ Abasi; okobụp se inamde Mme Ntiense Jehovah ẹdọhọ ke Obio Ubọn̄ Abasi ọkọtọn̄ọ ndikara ke 1914.

John: N̄kokot n̄wed mbufo kiet, enye ọdọhọ ke Obio Ubọn̄ Abasi ọkọtọn̄ọ ndikara ke 1914. N̄kọdọhọ ke nyobụp fi sia mbufo ẹsidọhọ ke kpukpru se ẹkpepde ẹsịne ke Bible.

Caleb: Ntre ke edi.

John: Mmokot Bible nsịm akpatre, edi ntịghi itie ndomokiet emi ẹsiakde 1914. Mma n̄ka Intanet n̄koyom 1914 ke Bible, edi utọ isua oro idụhe.

Caleb: Amanam etieti nte okotde Bible esịm akpatre. Ọwọrọ emenen̄ede ama Ikọ Abasi.

John: Ọmọdiọn̄ọ nan̄a ke idụhe n̄wed en̄wen emi etiede nte Bible.

Caleb: Ata akpanikọ ke etịn̄ oro. Amanam etieti n̄ko nte esiyomde ibọrọ mbụme fo ke Bible. Ọwọrọ anam se Bible ọdọhọde inam, oro edi, ‘ika iso idụn̄ọde’ Bible man Ikọ Abasi an̄wan̄a nnyịn.b Enem mi esịt etieti nte afo esịnde idem odụn̄ọde Bible ntre.

John: Da, sọsọn̄ọ. Edi nsụk nyoyom ndika iso n̄kpep n̄kpọ. Mma nnam ekpri ndụn̄ọde mban̄a 1914 ke n̄wed emi isụk ikpepde mi. Etie nte ẹketịn̄ ẹban̄a ndap oro edidem kiet akadabade. Enye ama okụt nte ẹsịbede akamba eto kiet ekem eto oro afiak etịbe.

Caleb: Ntre ke edi. Prọfesi oro odu ke Daniel ibuot 4. Itie Bible oro aban̄a ndap oro Nebuchadnezzar edidem Babylon akadabade.

John: Emekịm ke imịn. Mmokot prọfesi oro ediwak ini, edi emi asan̄a nso ye Obio Ubọn̄ Abasi m̀mê 1914?

Caleb: Ọmọdiọn̄ọ ke idem prọfet Daniel emi ekewetde prọfesi emi, ke idịghe kpukpru se enye ekewetde akan̄wan̄a enye.

John: M̀mê akpanikọ?

Caleb: Kop mi se enye eketịn̄de ke Daniel 12:8: “Ndien ami n̄kop, edi mfiọkke.”

John: Ọwọrọ idịghe ami ikpọn̄ ke n̄kpọ emi mîn̄wan̄ake.

Caleb: Se idude edi ke ini ikekemke kan̄a Abasi ndinam prọfesi emi enen̄ede an̄wan̄a owo. Ntak edi oro prọfesi oro mîkan̄wan̄ake Daniel. Edi ke ini nnyịn emi, prọfesi emi ekeme ndinen̄ede n̄n̄wan̄a nnyịn.

John: Ntak ọdọhọde ntre?

Caleb: Ọfọn, se se Daniel 12:9 ọdọhọde mi: “Ẹmedịp ikọ emi ẹnyụn̄ ẹfịk ufịkn̄kpọ ke esịt tutu esịm utịt ini.” Ọwọrọ prọfesi emi ekenyene ndin̄wan̄a owo ke “utịt ini.” Ndien nte idikpepde ke mîbịghike, kpukpru se itịbede ke ererimbot ẹwụt ke nnyịn idu uwem ke utịt ini oro Bible eketịn̄de aban̄a do.c

John: Ọwọrọ emekeme ndinam prọfesi emi an̄wan̄a mi nan̄a.

Caleb: Yak ndomo ise.

NDAP NEBUCHADNEZZAR

Caleb: Yak mbem kan̄a iso ntịn̄ se Edidem Nebuchadnezzar akadabade, ekem iyetịn̄ iban̄a se ndap esie ọkọwọrọde.

John: Ọfọn.

Caleb: Ke ndap oro, Nebuchadnezzar ama okụt akamba eto emi ọniọn̄de esịm ikpaenyọn̄. Ekem enye ama okop isụn̄utom Abasi ọdọhọde ẹkek eto oro ẹduọk, edi yak ẹyak etak esie osụk odu ke isọn̄. Abasi ama ọdọhọ n̄ko ke eto emi edifiak ikọri ke “ini itiaba” ama ekebe.d Prọfesi emi ekebem iso osu Edidem Nebuchadnezzar ke idem. Okposụkedi emi enye ekedide akwa edidem—nte eto emi ọniọn̄de esịm ikpaenyọn̄—ẹma ẹsịbe enye ẹnịm ke isọn̄ ke “ini itiaba.” Emeti nte emi eketịbede?

John: Ihih, ntịghi.

Caleb: Ọfọn, Bible ọdọhọ ke Nebuchadnezzar ikọdiọn̄ọke idem aba ke “ini itiaba” m̀mê isua itiaba. Enye ikekemeke ndikara aba. Edi ke ini itiaba ama ekebe, Nebuchadnezzar ama afiak ọdiọn̄ọ idem onyụn̄ afiak ọtọn̄ọ ndikara.e

John: Kpukpru se etịn̄de an̄wan̄a mi. Edi se mîsụk in̄wan̄ake mi edi m̀mê prọfesi emi asan̄a nso ye Obio Ubọn̄ Abasi ye isua 1914.

Caleb: Ke nditịn̄ ibio ibio, prọfesi emi okosu ikaba. Akpa okosu ke ini emi ukara Edidem Nebuchadnezzar eketrede uken̄. Prọfesi emi ama afiak osu ke ini emi ukara Abasi eketrede uken̄. Enye emi akafiakde osu mi aban̄a Obio Ubọn̄ Abasi.

John: Asan̄a didie ọfiọk ke prọfesi emi ama afiak osu, ndien ke enye emi aban̄a Obio Ubọn̄ Abasi?

Caleb: Akpa kan̄a, enyene se ikụtde ke prọfesi oro, emi owụtke ke enye ama afiak osu. Daniel 4:17 owụt ke Abasi akanam ẹwet prọfesi emi “man mbon oro ẹdude uwem ẹkpefiọk ẹte ke Ata Edikon̄ edi Andikara ke obio ubọn̄ ubonowo ye nte ke owo ekededi eke enye amade ke enye emen ọnọ.” N̄kọ omokụt ke itien̄wed oro etịn̄ aban̄a “obio ubọn̄ ubonowo”?

John: Ih, ọdọhọ ke “Ata Edikon̄ edi Andikara ke obio ubọn̄ ubonowo.”

Caleb: Ọfọn, afo ekere ke anie edi “Ata Edikon̄”?

John: N̄kere ke Abasi edi.

Caleb: Ntre ke edi. Omokụt do ke itien̄wed emi owụt ke prọfesi emi iban̄ake Nebuchadnezzar kpọt; ke aban̄a n̄ko “obio ubọn̄ ubonowo”—oro edi, ukara Abasi emi edikarade ofụri ubonowo. Ndien edieke isede ofụri se ẹnemede ke n̄wed Daniel, oyokụt ke se itịn̄de emi esịne ifiọk.

John: Nso ke ikọ fo ọwọrọ?

AKPAN N̄KPỌ ORO ẸNEMEDE KE N̄WED DANIEL

Caleb: Enyene akpan n̄kpọ kiet emi n̄wed Daniel awakde nditịn̄ mban̄a. Enye awak nditịn̄ mban̄a ini emi Abasi edinọde Jesus Eyen esie odudu nditọn̄ọ n̄kara ke Obio Ubọn̄ Esie. Ke uwụtn̄kpọ, kụbọde ka Daniel 2:44. Mbọk kot itie oro ise.

John: Itien̄wed oro okot ntem: “Ke eyo ndidem oro, Abasi enyọn̄ oyowụk obio ubọn̄ eke owo mîdisoboke ifep tutu amama. Ndien idikpọn̄ke obio ubọn̄ oro inọ mbio efen. Enye ayanuak onyụn̄ osobo kpukpru mme obio ubọn̄ emi, ndien enye ayada ke nsinsi.”

Caleb: Sọsọn̄ọ-o. Ndi ukereke ke itien̄wed emi etịn̄ aban̄a Obio Ubọn̄ Abasi?

John: Nnen̄ekede mfiọk-o.

Caleb: Kûfre ke itien̄wed emi ọdọhọ ke Obio Ubọn̄ emi ‘edida ke nsinsi.’ Obio Ubọn̄ Abasi kpọt ekeme ndida ke nsinsi. Mîdịghe ndi emekere ke enyene ukara owo ekededi emi ekemede ndida ke nsinsi?

John: Idụhe.

Caleb: Se prọfesi en̄wen mi ke n̄wed Daniel emi aban̄ade Obio Ubọn̄ Abasi. Prọfesi emi odu ke Daniel 7:13, 14. Prọfesi emi etịn̄ aban̄a enye emi edidide edidem ke ini iso ete: “Ẹnọ enye ukara ye itie ukpono ye obio ubọn̄, ẹte kpukpru owo ye mme idụt ye usem ẹnam n̄kpọ ẹnọ enye. Ukara esie edi nsinsi ukara emi mîdibehe ifep, obio ubọn̄ esie onyụn̄ edi obio ubọn̄ oro owo mîdisoboke.” Ndi enyene se okopde mi emi ama okokokop?

John: Ih, obio ubọn̄.

Caleb: Emenen, edi idịghe obio ubọn̄ ekededi ke ẹtịn̄ ẹban̄a. Itien̄wed oro ọdọhọ ke Obio Ubọn̄ emi edikara “kpukpru owo ye mme idụt ye usem.” Ke nditịn̄ ke usụn̄ en̄wen, Obio Ubọn̄ emi edikara ofụri ererimbot.

John: Ikan̄wan̄ake mi ntre, edi nte nsede afo emenen. Se itien̄wed oro etịn̄de edi oro.

Caleb: Prọfesi oro ọdọhọ n̄ko ke “ukara esie edi nsinsi ukara emi mîdibehe ifep, obio ubọn̄ esie onyụn̄ edi obio ubọn̄ oro owo mîdisoboke.” Se ikotde ke itien̄wed emi aka nditie nte prọfesi emi ikokotde ke Daniel 2:44. Ndi idịghe ntre?

John: Ntre ke edi.

Caleb: Yak ifiak ise se inemede kan̄a. Abasi akanam ẹwet prọfesi Daniel ibuot 4 man mme owo ẹkpefiọk ẹte ke “Ata Edikon̄ edi Andikara ke obio ubọn̄ ubonowo.” Emi owụt ke prọfesi oro ikaban̄ake Nebuchadnezzar kpọt; ke enye ama afiak osu. Ndien ediwak prọfesi ke n̄wed Daniel ẹban̄a ini emi Abasi edinọde Jesus Eyen esie odudu nditọn̄ọ n̄kara ke Obio Ubọn̄ Esie. Ke ekerede aban̄a ofụri se inemede emi, ndi ukereke ke prọfesi Daniel ibuot 4 aban̄a Obio Ubọn̄ Abasi n̄ko?

John: Etie ntre. Edi nsụk n̄kwe nte emi asan̄ade n̄kpọ ye 1914.

“YAK INI ITIABA ẸBE”

Caleb: Ti ke eto oro ke prọfesi Daniel akada aban̄a Edidem Nebuchadnezzar. Ukara esie ama etre uken̄ ke ini ẹkekekde eto oro ẹnịm ke ini itiaba—oro edi, ke ini enye mîkọdiọn̄ọke idem aba. Ini itiaba oro eketre ke ini Nebuchadnezzar akafiakde ọdiọn̄ọ idem onyụn̄ afiak ọtọn̄ọ ndikara. Prọfesi emi ekenyene ndifiak nsu ke ini ẹtrede ukara Abasi uken̄ ke ndusụk ini; edi emi ikedịghe sia Abasi mîkemeke ndikara.

John: Ikọ fo ọwọrọ didie?

Caleb: Bible ọdọhọ ke ndidem Israel oro ẹkekarade ini oro ẹketie ke “ebekpo Jehovah.”f Ndidem oro ẹkekara ikọt Abasi ẹnọ enye. Ntre, ke ini mmọ ẹkekarade, okonyụn̄ etie nte Abasi ndikpakara. Edi nte ini akakade, ediwak ndidem emi ẹma ẹsọn̄ ibuot ye Abasi, ediwak owo ẹnyụn̄ ẹtiene mmọ edem. Ke ntak emi, Abasi ama ayak mbon Babylon ẹkan Israel ke isua 607 mbemiso Christ. Ọtọn̄ọde ke ini oro ka iso, idụhe edidem ndomokiet emi akakarade aba ọnọ Jehovah ke Jerusalem. Nte ukara Abasi eketrede uken̄ edi oro. Ndi se ntịn̄de emi an̄wan̄a fi?

John: N̄kere ntre.

Caleb: Ntre, ini itiaba, m̀mê ini oro ukara Abasi eketrede uken̄, ọkọtọn̄ọ ke isua 607 mbemiso Christ. Ke utịt ini itiaba oro, Abasi ekenyene ndimek owo en̄wen—isan̄ emi owo ke heaven—emi edikarade inọ Enye. Ini oro ke mme prọfesi eken oro ikokotde ke n̄wed Daniel okosu. Ntre, ini ewe ke ini itiaba oro eketre? Edieke ikemede ndibọrọ akpan mbụme emi, iyọdiọn̄ọ ini emi Obio Ubọn̄ Abasi ọkọtọn̄ọde ndikara.

John: Ọtọn̄ọ ndin̄wan̄a mi ndien. Okûdi ini itiaba oro eketre ke 1914?

Caleb: Nnennen.

John: Edi isan̄a didie ifiọk?

Caleb: Ini emi Jesus okodude ke isọn̄, enye ama owụt ke ini itiaba oro iketreke kan̄a.g Ntre, anaedi ini itiaba oro ọniọn̄ etieti. Ini itiaba oro ọkọtọn̄ọ ediwak isua mbemiso Jesus edide isọn̄, ama onyụn̄ aka iso ata ediwak isua ke Jesus ama akafiak ọnyọn̄ heaven. Kûfre n̄ko ke ẹkedọhọ ke mme prọfesi emi ẹdude ke n̄wed Daniel ẹdin̄wan̄a owo ke “utịt ini.”h Ke isua 1870, nditọ ukpepn̄kpọ Bible emi ẹnyenede eti esịt ẹma ẹtọn̄ọ nditịm ndụn̄ọde prọfesi emi ye mme prọfesi en̄wen ke Bible. Mmọ ẹma ẹkụt ke ini itiaba oro editre ke 1914. Ikpọ n̄kpọ oro ẹtịbede ke ererimbot tọn̄ọ ini oro owụt ke 1914 edi isua oro Obio Ubọn̄ Abasi ọkọtọn̄ọde ndikara ke heaven. Kpa isua oro n̄ko ke mme akpatre usen, m̀mê utịt ini, ọkọtọn̄ọ. Yak itre mi kan̄a sia edide akpa ini okopde kpukpru emi edi emi.

John: Ọkpọfọn ntre. Nyafiak n̄kokot n̄kpọ mban̄a se inemede emi man etịm an̄wan̄a mi.

Caleb: Kûfịna. Ama ada ini mbemiso prọfesi emi an̄wan̄ade mi. Edi mmekere ke se inemede emi anam okụt ke Mme Ntiense Jehovah ẹda kpukpru se mmọ ẹkpepde ẹto Bible.

John: Mmokụt. Esinem mi nte mbufo ẹsidade kpukpru se ẹkpepde ẹto Bible.

Caleb: Mmọdiọn̄ọ ke akpama nditie nte nnyịn. Edi nte mma n̄ketetịn̄, idịghe n̄kpọ usen kiet edi emi. Ekeme ndidi osụk enyenyene mbụme. Ke uwụtn̄kpọ, imokụt ke ini itiaba oro aban̄a Obio Ubọn̄ Abasi ndien ke enye ọkọtọn̄ọ ke isua 607 mbemiso Christ. Edi isan̄a didie ifiọk ke ini itiaba emi eketre ke 1914?i

John: Ọbọ mi ikọ ke inua!

Caleb: Bible an̄wam nnyịn ifiọk ini emi ini itiaba oro ọkọtọn̄ọde ye ini emi enye eketrede. Ndi akpama ineme iban̄a oro isan̄ en̄wen?j

John: Mfịna idụhe.