MME MBỤME BIBLE ORO ẸBỌRỌDE
Nso ikeme ndinam owo edi eti ete m̀mê eka?
Ndi emesikpep eyen fo ndima Abasi?
Edieke ete ye eka ẹmade ẹnyụn̄ ẹkponode kiet eken, esifiak emem utom nditọ mmọ ndikpon n̄wọrọ n̄kpọ. (Colossae 3:14, 19) Eti ete ye eka ẹsima nditọ mmọ ẹnyụn̄ ẹtoro mmọ ke ini mmọ ẹnamde ọfọn, kpa nte Jehovah Abasi okotorode Eyen esie.—Kot Matthew 3:17.
Ete nnyịn eke heaven esikpan̄ utọn̄ okop se mme asan̄autom esie ẹtịn̄de, onyụn̄ okop nte etiede mmọ ke idem. Ọkpọfọn mme ete ye eka ẹkpebe enye ẹsinyụn̄ ẹkpan̄ utọn̄ ẹkop se nditọ mmọ ẹnyenede nditịn̄. (James 1:19) Akpana mmọ ẹnam nditọ mmọ ẹfiọk ke imokop se mmọ ẹtịn̄de, idem ke ini mmọ ẹtịn̄de se mîkpetịn̄ke.—Kot Numbers 11:11, 15.
Nso ke akpanam man nditọ fo ẹkpon ẹkabade nti owo?
Abasi ọnọ mme ete ye eka odudu nditịn̄ se nditọ mmọ ẹkpenamde ye se mmọ mîkpanamke. (Ephesus 6:1) Abasi enịm eti uwụtn̄kpọ ọnọ mme ete ye eka ke n̄kpọ emi. Enye ama nditọ esie, ntre enye esinam ibet emi enye ọnọde an̄wan̄a mmọ onyụn̄ etịn̄ se iditịbede edieke mmọ mînịmke ibet oro. (Genesis 3:3) Enye isinyịkke-nyịk mme owo ẹkop uyo esie, esikam ekpekpep mmọ nte mmọ ẹkpenamde se ifọnde man ọfọn ye mmọ.—Kot Isaiah 48:18, 19.
Biere ke ayan̄wam nditọ fo ẹma Abasi. Mmọ ndima Abasi ayanam mmọ ẹnam n̄kpọ nte mme enyene-ibuot owo, idem ke ini afo mûdụhe ye mmọ. Abasi esikpep nditọ esie n̄kpọ ke ndinịm eti uwụtn̄kpọ nnọ mmọ. Kpasụk ntre, wụt ke afo amama Abasi, ndien nditọ fo ẹyekpebe fi.—Kot Deuteronomy 6:5-7; Ephesus 4:32; 5:1.