Sifen Nọ Owo ke Ofụri Esịt

ITEM BIBLE: “Ẹka iso . . . ẹfen kiet eken ke ofụri esịt edieke owo ekededi enyenede ntak nditọhọ ye owo. Kpa nte Jehovah ekefende mbufo ke ofụri esịt, ẹfen mbon en̄wen kpasụk ntre.”—Colossae 3:13.

Nso ke emi ọwọrọ? Ke Bible, ẹmen idiọkn̄kpọ ẹdomo ye isọn ẹnyụn̄ ẹmen ndifen nnọ owo ẹdomo ye ndisọhi isọn oro mfep. (Luke 11:4) N̄wed ndụn̄ọde kiet ọdọhọ ke ikọ Greek oro ẹkabarede nte ‘ndifen nnọ’ ke N̄wed Abasi ọwọrọ ‘ndifre mban̄a isọn oro ẹkamade nnyịn’ nnyụn̄ ntre ndikpak isọn oro. Ntem, ke ini ifende inọ owo emi eduede nnyịn, nnyịn isikereke ndisio enye usiene. Edi nnyịn ndifen nnọ owo iwọrọke ke nnyịn imama idiọkn̄kpọ oro enye akanamde inyụn̄ iwọrọke ke se enye akanamde ibiakke nnyịn. Utu ke oro, ọwọrọ ke nnyịn isịnke owo oro ke esịt, kpa ye oro edide imenyene eti “ntak nditọhọ.”

Ndi item emi ke osụk enyenyene ufọn? Sia nnyịn mîfọnke ima, kpukpru nnyịn imesinam idiọkn̄kpọ. (Rome 3:23) Ntem, ọfọn ndisifen nnọ owo, sia ebebịghi awawara nnyịn n̄ko iyoyom owo efen ọnọ nnyịn. N̄ko, nnyịn ke idem nnyịn imesidia ufọn ke ini ifende inọ mme owo. Nso utọ ufọn?

Edieke nnyịn mîmaha ndifen nnọ owo, edi ika iso iyat esịt ye owo inyụn̄ isịn enye ke esịt, nnyịn inam idem nnyịn ibak. Utọ ido emi idiyakke ikop inemesịt inyụn̄ iyakke esịt ana nnyịn sụn̄. Imakam ikeme ndidọn̄ọ ke ntak emi. Dr. Yoichi Chida ye Prọfesọ Andrew Steptoe ẹkewet ke n̄wed emi ẹkotde Journal of the American College of Cardiology, ẹte: “Ndụn̄ọde oro ẹnamde ndondo emi owụt ke iyatesịt ye usua ẹkeme ndinam owo ọsọp ọdọn̄ọ udọn̄ọ esịt.”

Kere n̄ko ban̄a ufọn emi edidiade edieke esifende ọnọ owo. Ke ini ifende inọ owo, emi ayanam idiana kiet inyụn̄ idu ke emem ye mme owo. Se ikam ifọnde ikan oro edi ke ndisifen nnọ owo owụt ke nnyịn ikpebe Abasi, sia enye esifen ọnọ mbon emi ẹkabarede esịt. Se enye onyụn̄ oyomde nnyịn inam edi oro.—Mark 11:25; Ephesus 4:32; 5:1.