Didie ke Abasi Ese Ekọn̄?

Afo ekere didie? Ndi Abasi enyịme ẹsin̄wana ekọn̄? Edieke edide ntre, enye ada ọnọ mmanie ke mme ekọn̄ oro ẹn̄wanade mfịn? Ibọrọ mbụme emi ekeme ndinam ọdiọn̄ọ nte ekpesede ekọn̄. Ke uwụtn̄kpọ, edieke ọkpọdiọn̄ọde ke Abasi enyịme ẹn̄wana ekọn̄ ndien ke enye ada ọnọ n̄kan̄ emi afo onyụn̄ adade ọnọ, esịt eyenem fi sia ọmọdiọn̄ọ ke n̄kan̄ emi afo adade ọnọ edikan. Edi ekpetie fi didie ke idem edieke ọdiọn̄ọde ke Abasi ada ọnọ mme asua? Ekeme ndidi akpafiak ekere n̄kan̄ emi akpadade ọnọ.

Edi enyene n̄kpọ en̄wen emi akam edide akpan n̄kpọ akan oro. Ndidiọn̄ọ nte Abasi esede ekọn̄ ekeme ndinam ama m̀mê asua Abasi. Edieke afo esịnede ke otu ata ediwak owo emi ekọn̄ ọnọmọde, etie nte ayama ndidiọn̄ọ nte Abasi esede ekọn̄. Ndusụk owo ẹkere ke Abasi amama ekọn̄, ke esinyụn̄ enenem enye ndikụt mme owo ẹbọde ufen ke ntak ekọn̄ mîdịghe ke enye idọn̄ke enyịn m̀mê ekọn̄ an̄wana m̀mê in̄wanake, m̀mê mme owo ẹnyụn̄ ẹbọ ufen m̀mê ibọhọ. Ndi oro edi akpanikọ?

Ekeme ndikpa fi idem ndifiọk se Bible etịn̄de aban̄a nte Abasi esede ekọn̄. Ke nditịm ntịn̄, nte enye esede ekọn̄ ikpụhọkede. Yak ise se Bible etịn̄de aban̄a nte Abasi ekesede ekọn̄ ke eyo nditọ Israel ye ke eyo mme apostle. Emi ayanam ifiọk nte enye esede ekọn̄ mfịn, oyonyụn̄ anam ifiọk m̀mê ekọn̄ ayaka iso an̄wana ke isọn̄ emi.