Ndi Mme Asiak Ntantaọfiọn̄ Ye Mme Etịn̄ Ini Iso Ẹfiọk Nte Ini Iso Editiede?

NDISIAK NTANTAỌFIỌN̄

Ndisiak ntantaọfiọn̄ esịne ke otu n̄kpọ emi mme ebreidiọn̄ ẹsinamde. Mme asiak ntantaọfiọn̄ ẹsidọhọ ke ntantaọfiọn̄, ọfiọn̄, ye mme ekondo eken ẹnyene ubọk ke nte mme owo ẹdude uwem. Mmọ ẹsidọhọ ke ebiet emi ntantaọfiọn̄ ye ọfiọn̄ ẹdude ke ini owo amanade edibiere nte owo oro edinamde n̄kpọ ye nte ini iso esie editiede.

Ẹdọhọ ke mbon Babylon eset ẹketọn̄ọ ndisisiak ntantaọfiọn̄. Edi edinam emi ke osụk omomụm isọn̄ mfịn. Ndụn̄ọde kiet oro ẹkenamde ke United States ke 2012 owụt ke owo kiet ke otu kpukpru owo ita oro ẹkebụpde mbụme ẹkedọhọ ke etie nte ndisiak ntantaọfiọn̄ edi n̄kpọ ntaifiọk, ndien owo kiet ke otu owo duop ẹma ẹnen̄ede ẹnịm ke ẹsida ifiọk ntaifiọk ẹsiak ntantaọfiọn̄. Ndi ntre ke edi? Ihih. Se ntak emi idọhọde ntre mi.

• Ntantaọfiọn̄ ye mme ekondo eken ikemeke ndibiere se mme owo ẹnamde nte mme asiak ntantaọfiọn̄ ẹdọhọde.

• Ediwak se mme asiak ntantaọfiọn̄ ẹsitịn̄de edi n̄kpọ emi ekemede nditịbe nnọ owo ekededi.

• Mme asiak ntantaọfiọn̄ ẹda ifiọk mmọ ẹto ekikere eset oro ẹkedọhọde ke mme ekondo eken ẹsisan̄a ẹkanade isọn̄. Edi ntaifiọk ẹdikụt ke mme ekondo eken ẹsisan̄a ẹkanade utịn.

• Se nsio nsio mme asiak ntantaọfiọn̄ ẹtịn̄de ẹban̄a owo kiet isidịghe ukem.

• Mme asiak ntantaọfiọn̄ ẹnyene nsio nsio idiọn̄ọ 12 emi ẹdade ẹnọ nsio nsio otu ntantaọfiọn̄. Mmọ ẹbahade mme owo ẹdọn̄ ke ikpehe 12 ẹtiene usen oro owo amanade. Edi sia isọn̄ ye mme ekondo eken mîsidaha itie kiet, mme ntantaọfiọn̄ emi ẹsịk ẹkpọn̄ itie emi mmọ ẹkesidade. Ntre mme usenọfiọn̄ oro mme asiak ntantaọfiọn̄ ẹkenọde idiọn̄ọ kiet kiet isan̄ake aba ye ntantaọfiọn̄ emi mmọ ẹkedade ẹnọ.

Ẹdọhọ ke ẹkeme ndida mme idiọn̄ọ emi mfiọk nte owo edidude uwem. Edi mbon emi ẹmanade ke ukem usenọfiọn̄ isinyeneke ukem edu. Emi owụt ke usenọfiọn̄ emi owo amanade isan̄ake n̄kpọ ye nte enye edidude uwem. Utu ke mme asiak ntantaọfiọn̄ ndida owo nte owo etiede, mmọ ẹsida ekikere idemmọ ẹbiere nte owo edidude uwem. Ndi idịghe asari edi oro?

NDITỊN̄ INI ISO

Toto ke eset, mme owo ẹsika ẹbịne mme etịn̄ ini iso. Ndusụk mme etịn̄ ini iso ẹkesida nte nsia unam m̀mê nsia owo etiede ẹtịn̄ se iditịbede ke ini iso, mîdịghe ẹda nte inuen ọkọn̄de udia ke isọn̄ ẹtịn̄. Ndusụk mmọ ẹma ẹsida mbuwed ikọn̄ tea ye mbuwed kọfi oro ẹkọkde ẹbon ẹtịn̄. Mfịn, mme etịn̄ ini iso ẹsida kad, itiat ndomo, dais, ye mme n̄kpọ ntre ẹtịn̄ ini iso owo. Ndi mme etịn̄ ini iso ẹkeme nditịn̄ nnennen se iditịbede? Ikemeke. Yak ineme ntak emi idọhọde ntre.

Sia mmọ ẹsidade nsio nsio n̄kpọ ẹtịn̄ ini iso, se mmọ ẹsitịn̄de isisan̄ake kiet. Idem ke ini mmọ ẹdade ukem n̄kpọ ẹtịn̄, se mmọ ẹtịn̄de isisụk idịghe ukem. Ke uwụtn̄kpọ, edieke owo obụpde etịn̄ ini iso iba ukem mbụme, ndien mmọ mbiba ẹda ukem kad utịn̄ ini iso ẹbọrọ, akpana se mmọ ẹtịn̄de edi ukem. Edi ediwak ini, isidịghe ntre.

Ndusụk owo ẹkụt ke mme etịn̄ ini iso ẹsinam n̄kari. Ẹdọhọ ke idịghe mme n̄kpọ oro mme etịn̄ ini iso ẹsikamade ke mmọ ẹsida ẹfiọk nte ini iso owo editiede. Utu ke oro, mmọ ẹsida se owo etịn̄de ye nte enye anamde n̄kpọ ẹfiọk. Ke uwụtn̄kpọ, etịn̄ ini iso emi enyenede mbufiọk ekeme ndibụp owo nsio nsio mbụme onyụn̄ etịm akpan̄ utọn̄ okop se enye etịn̄de onyụn̄ ese nte owo oro anamde n̄kpọ. Ekem, enye eyetịn̄ n̄kpọ aban̄a owo oro nte n̄kpọ eke ẹdọhọde ke enye ke idemesie ọfiọk, ke ini edide se owo oro eketịn̄de onyụn̄ anamde ke enye ada ọfiọk. Ke ini mme etịn̄ ini iso ẹnamde owo ẹnịm ke mmimọ imọfiọk n̄kpọ iban̄a enye, mmọ ẹsibiere ediwak okụk ẹnọ enye ndien owo oro esikpe.

SE BIBLE ỌDỌHỌDE

Mme asiak ntantaọfiọn̄ ye mme etịn̄ ini iso ẹsinam etie nte ke ẹma ẹbebiere nte ini iso nnyịn editiede. Ndi emi edi akpanikọ? Bible ọdọhọ ke nnyịn inyene ndibiere se inịmde ke akpanikọ ye se inamde, ye nte ke se inamde edibiere nte ini iso nnyịn editiede.​—Joshua 24:15.

Ata akpan ntak emi anamde ikọt Abasi ẹkûka ẹbịne mme asiak ntantaọfiọn̄ ye mme etịn̄ ini iso edi ke Abasi asasua kpukpru orụk ubreidiọn̄. Bible ọdọhọ ete: “Kûyak ẹkụt owo ekededi ke otu fo . . . emi ebrede idiọn̄, m̀mê ebre mfọni m̀mê owo ekededi emi omụmde ndomo m̀mê abiaidiọn̄, m̀mê owo emi ọkọkde nduọhọ ọnọ owo m̀mê obụp ekpo m̀mê etịn̄ ini iso m̀mê owo ekededi emi akade okobụp mme akpan̄kpa n̄kpọ. Koro kpukpru owo eke ẹnamde n̄kpọ emi ẹdi mbubiam n̄kpọ ke enyịn Jehovah.”a​—Deuteronomy 18:​10-12.