Anie Anam Mme Owo Ẹbọ Ufen?

Edieke mîdịghe Abasi anam mme owo ẹbọ ufen, nso ndien inam ata ediwak owo ẹsikpa biọn̄, ndusụk owo ẹnyụn̄ ẹdi ọkpọikpọi ubuene? Nso inyụn̄ inam ekọn̄, udọn̄ọ, ye oto-obot afanikọn̄ ẹsiwot mme owo ọkwọkudịm? Bible etịn̄ ntak ita emi mme owo ẹsibọde ufen:

1. Ibụk, Idiọkitọn̄, ye Usua. “Owo [akara] owo tutu ọnọ enye unan.” (Ecclesiastes 8:9) Mbon idiọkitọn̄ emi ẹkerede ẹban̄a idemmọ kpọt ẹsibak mme owo ibak, ẹnyụn̄ ẹnam mme owo ẹbọ ufen.

2. N̄kpọntịbe Unana Idotenyịn. Mme owo ẹsibọ ufen ke ntak emi “n̄kpọntịbe unana idotenyịn” esisịmde kpukpru owo. (Ecclesiastes 9:11) Owo ekeme ndidu ke ebiet emi idiọk n̄kpọ etịbede, aksiden ekeme nditịbe nnọ owo ekededi, owo onyụn̄ ekeme ndibọ ufen ke ntak ndudue esie m̀mê eke owo en̄wen.

3. Idiọk Owo Emi Akarade Ererimbot Emi. Bible etịn̄ akpan owo emi anamde mme owo ẹbọ ufen. Enye ọdọhọ ete: “Ofụri ererimbot esịne ke idak odudu andidiọk.” (1 John 5:19) Satan kpa Devil edi “andidiọk” oro. Enye ekedi angel Abasi, edi ‘ikọsọn̄ọke ida ke akpanikọ.’ (John 8:44) Mme angel en̄wen ẹma ẹtiene Satan ẹsọn̄ ibuot ye Abasi ẹnyụn̄ ẹnam se ikọdọn̄de mmọ; mmọ ẹdi mme demon. (Genesis 6:​1-5) Toto ke ini oro Satan ye mme demon esie ẹkesọn̄de ibuot do, mmọ ẹsịn ntịme etieti ke isọn̄ emi ẹnyụn̄ ẹnam mme owo ẹbak ibak. Imenen̄ede ikụt emi ke eyo nnyịn emi. Idahaemi, Devil asan̄a ye akwa ifụtesịt onyụn̄ ada “kpukpru mme andidụn̄ isọn̄ otụn usụn̄,” ndien emi anam mme andidụn̄ isọn̄ ẹnyene mbọm. (Ediyarade 12:​9, 12) Satan edi ata idiọk andikara. Esinenem enye ndikụt mme owo ẹbọde ufen. Ntre, Satan anam mme owo ẹbọ ufen, idịghe Abasi.

KERE ISE: Ndi idịghe ata idiọk mbuka owo kpọt esinam mbon emi mînyeneke se ẹduede ẹbọ ufen? Edi Bible ọdọhọ ke “Abasi edi ima.” (1 John 4:8) Sia Abasi edide ima, enye ikemeke “ndinam se idiọkde” m̀mê ndinam “se mînenke.”​—Job 34:10.

Edi emekeme ndibụp ete, ‘Abasi ediyak Satan aka iso akara ebịghi didie?’ Nte ima iketetịn̄, Abasi asasua se idiọkde, esinyụn̄ abiak enye ndikụt nnyịn ibọde ufen. Bible ọdọhọ ete: “[Ẹtop] kpukpru editịmede esịt mbufo ẹdori enye ke idem, koro enye ekerede aban̄a mbufo.” (1 Peter 5:7) Abasi ama nnyịn, enye onyụn̄ enyene odudu ndinam kpukpru ufen, ufịk, ye utụk ẹtre. Ibuotikọ oro etienede eyetịn̄ nte enye edinamde emi.a