Se Akpanamde Man Etetịm Enem Fi Ndikpep Bible Esinyụn̄ Enen̄ede Adia Ufọn

Joshua ke okot Ibet Abasi; ibibene Jericho ọduọ, ufọk Rahab iduọhọ; Joshua emenede ubọk ke enyọn̄ ọbọn̄ akam

UTOM emi anade ọnọ Joshua idịghe ekpri. Enye enyene ndimen nditọ Israel ndụk Isọn̄ Un̄wọn̄ọ. Edi ana enye an̄wana akan n̄kpọ ekededi oro edidomode ndibiọn̄ọ mmọ. Jehovah ọsọn̄ọ enye idem onyụn̄ ọdọhọ ke enye ayan̄wana akan. Jehovah ọdọhọ enye ete: ‘Nyene uko nyụn̄ kop odudu. Nịm kpukpru ibet Mi. Kot enye uwemeyo ye okoneyo, man ekeme ndinam kpukpru se ẹwetde ke esịt; do ke afo edikụt unen ke usụn̄ fo onyụn̄ ada eti ibuot anam n̄kpọ.’—Josh. 1:7, 8.

Enyene ediwak n̄kpọ oro anade nnyịn n̄ko in̄wana ikan ke “ndiọkeyo emi ọsọn̄de ndiyọ” mi. (2 Tim. 3:1) Imekeme ndikan nte Joshua akakande edieke inamde se Jehovah eketemede enye. Ana isikot Bible kpukpru usen inyụn̄ itịn̄ enyịn ida se ikotde oro in̄wana ikan idomo ekededi.

Ndusụk nnyịn inen̄ekede ifiọk ndikpep n̄kpọ, isinyụn̄ inen̄ekede inem ndusụk nnyịn ndikpep n̄kpọ. Edi sia ndikpep Bible edide ata akpan n̄kpọ, se idude ke ekebe oro “Se Ikemede Ndin̄wam Fi” ayanam fi ọfiọk se akpanamde man etetịm enem fi ndikpep Bible, onyụn̄ enen̄ede adia ufọn.

Andiwet Psalm 119 ọkọdọhọ ke ufanikọ 35 ete: “Nam mi nsan̄a ke usụn̄ oro mme ewụhọ fo ẹtemede, koro enye adatde mi esịt.” Emi owụt ke eyenen̄ede enem fi ndikot Bible. Eyedifiọk ediwak n̄kpọ oro akanam mûfiọkke edieke esịnde idem ekpep Bible.

Kpa ye oro mfịna fo mîdịghe ndida nditọ Israel ndụk Isọn̄ Un̄wọn̄ọ, emenyene mfịna emi anade an̄wana akan. Ntre, edieke ekpepde Bible onyụn̄ etịn̄de enyịn anam se ekpepde nte Joshua akanamde, afo n̄ko oyokụt unen onyụn̄ anam n̄kpọ ye eti ibuot.

SE IKEMEDE NDIN̄WAM FI

Bọn̄ akam mbemiso ekpepde Bible. Bible edi Ikọ Abasi idịghe ikọ owo. Jehovah akanam ẹwet Bible ke ufọn fo. Ntre ke ini oyomde ndikot Bible, ben̄e Jehovah an̄wam fi ọfiọk se okotde, eti se okotde, onyụn̄ anam se okotde.—Ezra 7:10.
Sibụp idemfo mbụme. Ke ini okotde Bible ye mme n̄wed esop Abasi, bụp idemfo ete: ‘Se n̄kotde emi ekpep mi nso aban̄a Jehovah? Asan̄a nso ye ofụri se isịnede ke Bible? Didie ke n̄keme ndida n̄n̄wam mbon en̄wen?’
Tie kere se ekpepde. Ama okot ekpri, tuak da kere se okotde. Bụp idemfo ete: ‘Se n̄kotde emi anam etie mi didie ke idem? Nso inam etie mi ntre? Didie ke emi akpakan̄wam mi ke ini edem? Didie ke ekeme ndin̄wam mi idahaemi ye ke ini iso? Didie ke n̄keme ndida se n̄kotde emi ndu uwem?’ (Job 23:5; Ps. 49:3) Ke ini afo etiede ekere se okotde, se ise m̀mê emekeme ndinam an̄wan̄a ntak emi Jehovah akakpande ikọt esie ndinam ndusụk n̄kpọ. Kere se ikpeketịbede ekpedi owo oro afo osụk okotde mbụk esie do ikanamke se enye akanamde oro.—Deut. 32:28, 29.
Ke ini okotde mbụk, da nte ke odu ke itie emi se okotde oro eketịbede. Ke uwụtn̄kpọ, da nte ke omodu ini nditọete Joseph ẹmụmde enye ẹnyam ẹnọ nditọ Ishmael. (Gen. 37:18-28) Nso ke okụt, nso ke okop, nso ufuọn̄ idụk fi ibuo? Nam nte ke afo edi mbon oro okotde mbụk mmọ. Nso ke mmọ ẹkere, etie mmọ didie ke idem? Edieke anamde emi, se ekpepde eyenen̄ede an̄wan̄a fi.
Da mme n̄kpọ emi esop Abasi ẹsion̄ode nam ndụn̄ọde. Kpep nte akpadade mbon oro ẹdude ke usem mbufo anam ndụn̄ọde, edide mbon oro ẹma ẹkemịn̄ m̀mê mbon oro ẹdude ke jw.org. Kûyak bụt anam fi ndidọhọ ẹwụt fi nte akpadade mmọ anam ndụn̄ọde. Watch Tower Publications Index m̀mê N̄wed Ndụn̄ọde Mme Ntiense Jehovah ekeme ndin̄wam fi okụt se ẹkewetde ẹban̄a nsio nsio n̄kpọ ye nte ẹnamde ediwak ufan̄ikọ ke Bible an̄wan̄a. N̄wetndian Ikọ ke Edikabade Eke Obufa Ererimbot ekeme ndin̄wam fi ọfiọk n̄kpọ aban̄a mme obio ke Bible, mme ini emi n̄kpọ eketịbede, nte ẹkesidomode n̄kpọ ke eyo Bible, ye mme n̄kpọ ntre.
Se m̀mê emekeme nditi mme akpan n̄kpọ emi ekpepde. Neme se ekpepde ye mbon en̄wen. Ndi omokụt se idin̄wamde fi ke an̄wautom? Edieke anamde mme n̄kpọ emi, udûfreke mme akpan n̄kpọ oro ekpepde, oyonyụn̄ ekeme ndida mmọ n̄n̄wam mme owo.