Beri Edem ke Jehovah ke Ini Esịt Etịmerede Fi

1. Ntak emi anade ida se Jesus eketịn̄de ke akpan n̄kpọ?

JESUS ọkọdọhọ ntem ke prọfesi emi enye eketịn̄de aban̄a mme akpatre usen: ‘Ẹkpeme idem mbak editịmede esịt uwem emi edinam esịt mbufo ẹkabade ẹdobi.’ (Luke 21:34) Ọfọn inen̄ede ida se enye eketịn̄de oro ke akpan n̄kpọ. Ntak-a? Sia imetiene isobo ediwak mfịna emi ẹtịmerede mme owo esịt.

2. Nso ikpọ mfịna isịm nditọete nnyịn?

² Ndusụk ini, ediwak mfịna emi ẹsitịmerede owo esịt ẹsisịm nnyịn ke ukem ini. Yak inọ ndusụk uwụtn̄kpọ. Brọda kiet emi ekerede Johnb ọdọn̄ọ idiọk udọn̄ọ emi ẹkotde multiple sclerosis. N̄wan esie ama ọkpọn̄ enye ke mmọ ẹma ẹkedọ ndọ ke isua 19, ekem nditọ esie iban iba ẹtre ndinam n̄kpọ Jehovah. N̄kpọ emi ama anam brọda oro ofụhọ etieti. Afanikọn̄ eke brọda efen emi ekerede Bob ye Linda an̄wan esie edi isio ye eke John. Ẹma ẹsio mmọ mbiba ke utom, okonyụn̄ ana mmọ ẹwọrọ ẹkedụn̄ ke ufọk emi ekpride akan enye emi mmọ ẹkesidụn̄de. N̄kpọ efen ama adiana. Dọkta ama ọdọhọ Linda ke enye enyene udọn̄ọ esịt emi ediwotde enye nte ini akade, ekem Linda ama afiak enyene udọn̄ọ efen emi akabiatde editịbe esịt idem esie.

3. Philippi 4:6, 7 owụt ke Jehovah ekeme ndinam nso nnọ nnyịn?

³ Imenịm ke Jehovah emi edide Andibot nnyịn ye edima Ete nnyịn ọdiọn̄ọ nte esitiede nnyịn ke idem ke ini esịt etịmerede nnyịn. Enye onyụn̄ oyom ndin̄wam nnyịn iyọ mme mfịna emi isobode. (Kot Philippi 4:6, 7.) Ediwak mbụk emi ẹwụtde nsio nsio mfịna emi ikọt Abasi ẹkesobode ẹdu ke Bible. Bible onyụn̄ owụt nte Jehovah akan̄wamde mmọ ẹyọ utọ mfịna oro. Ẹyak ineme uwụtn̄kpọ ifan̄.

“ELIJAH EKEDI OWO EMI N̄KPỌ ESITỤKDE NTE NNYỊN”

4. Nso mfịna ke Elijah okosobo, ndien didie ke enye akada Jehovah?

⁴ Ikememke ke Israel ini Elijah akanamde n̄kpọ Jehovah, enye ama onyụn̄ enyene ikpọ mfịna. Edidem Ahab ekedi kiet ke otu ndidem Israel emi ẹkekpọn̄de Jehovah ẹkekpono abasi efen. Enye ọkọdọ Jezebel emi ekesikponode Baal, onyụn̄ edide ibak. Mmọ mbiba ẹma ẹnam utuakibuot Baal atara ọyọhọ ofụri idụt oro, ẹnyụn̄ ẹwot ediwak prọfet Jehovah, edi Elijah ama ọbọhọ mmọ. Nte enye ekeberide edem ke Jehovah ama anam enye ọbọhọ n̄ko ini idiọk akan̄ okodude ke Israel. (1 Ndi. 17:2-4, 14-16) Elijah ama onyụn̄ eberi edem ke Jehovah ini enye, mme prọfet Baal, ye mbon emi ẹkesituakde ibuot ẹnọ Baal ẹkesobode man ẹwụt enye emi edide ata Abasi. Enye ama ọdọhọ nditọ Israel ẹnam n̄kpọ Jehovah. (1 Ndi. 18:21-24, 36-38) Elijah ama okụt ediwak n̄kpọ emi ẹkewụtde ke Jehovah ke ekpeme onyụn̄ an̄wam enye ke ini afanikọn̄ oro.

5-6. Akpa Ndidem 19:1-4 owụt ke eketie Elijah didie ke idem? Didie ke Jehovah okowụt ke imama Elijah?

⁵ Kot 1 Ndidem 19:1-4. Edi ndịk ama anam Elijah ini Jezebel Ọbọn̄ An̄wan ọkọdọhọde ke imọn̄ iwot enye. Enye ama efehe aka Beer-sheba. N̄kpọ oro ama etịmede enye tutu enye eben̄e Abasi ete ayak imọ ikpa. Nso ikanam etie enye ntre ke idem? Elijah ikọfọnke ima, enye okonyụn̄ edi “owo emi n̄kpọ esitụkde nte nnyịn.” (Jas. 5:17) Ekeme ndinyụn̄ ndi editịmede esịt ye ekaha isan̄ akanam. Etie nte Elijah ekekere ke ofụri se imọ inamde man in̄wam mme owo ẹkpono Jehovah akatatak, ke n̄kpọ ndomokiet ikpụhọkede ke Israel, ke imọ kpọt isụk ika iso inam n̄kpọ Jehovah. (1 Ndi. 18:3, 4, 13; 19:10, 14) Ekeme ndikpa nnyịn idem nte prọfet Abasi oro ekekerede n̄kpọ ntre. Edi ama an̄wan̄a Jehovah se ikanamde etie Elijah ntre ke idem.

⁶ Jehovah ikasuaha inọ Elijah ini Elijah eketịn̄de nte etiede enye ke idem. Utu ke oro, enye ama an̄wam Elijah man enye afiak okop odudu. (1 Ndi. 19:5-7) Ekem Jehovah ama owụt Elijah akwa odudu esie man an̄wam enye okpụhọde ekikere. Jehovah ama ọdọhọ enye ke imọ isụk inyenyene owo 7,000 ke Israel emi ẹkesịnde ndituak ibuot nnọ Baal. (1 Ndi. 19:11-18) Mme n̄kpọ emi ke Jehovah akada owụt Elijah ke imama enye.

NTE JEHOVAH EDIN̄WAMDE NNYỊN

7. Didie ke nte Jehovah akan̄wamde Elijah ọsọn̄ọ nnyịn idem?

⁷ Ndi emenyene mfịna emi etịmerede fi esịt? Nnyịn ndidiọn̄ọ ke ama an̄wan̄a Jehovah nte eketiede Elijah ke idem ọdọn̄ nnyịn esịt tutu! Emi anam inịm ke se itịmerede nnyịn esịt an̄wan̄a Jehovah. Enye ọdiọn̄ọ se nnyịn ikemede ndinam ye se nnyịn mîkemeke ndinam, enye akam ọdiọn̄ọ se ikerede ye nte etiede nnyịn ke idem. (Ps. 103:14; 139:3, 4) Edieke iberide edem ke Jehovah nte Elijah ekeberide, Jehovah ayan̄wam nnyịn iyọ mme mfịna emi ẹnamde esịt etịmede nnyịn.—Ps. 55:22.

8. Didie ke Jehovah edin̄wam fi ọyọ mfịna emi etịmerede fi esịt?

⁸ Editịmede esịt ekeme ndinam fi ekere ke mfịna fo idikụreke, ndien oro ekeme ndinam idem emem fi. Edieke utọ n̄kpọ emi ọwọrọde fi, ti ke Jehovah ayan̄wam fi ọyọ mfịna emi etịmerede fi esịt do. Didie ke enye edin̄wam fi? Enye ọdọhọ fi etịn̄ se ifịnade fi ye nte etiede fi ke idem ọnọ imọ. Enye oyonyụn̄ eyere fi ini afo atuade eseme oyom un̄wam. (Ps. 5:3; 1 Pet. 5:7) Ntre sibọn̄ akam ke ubọk ke ubọk tịn̄ mfịna fo nọ Jehovah. Enye iditịn̄ke ikọ nnennen nnennen ye afo nte ekesitịn̄de ye Elijah, edi enye ayada Bible emi edide Ikọ esie onyụn̄ ada esop esie etịn̄ ikọ ye afo. Mme mbụk emi okotde ke Bible ẹkeme ndidọn̄ fi esịt ẹnyụn̄ ẹnam fi enyene idotenyịn. Nditọete fo ẹkeme ndisọn̄ọ fi idem n̄ko.—Rome 15:4; Heb. 10:24, 25.

9. Didie ke ata eti ufan ekeme ndin̄wam nnyịn?

⁹ Ini Jehovah ọkọdọhọde Elijah ọkpọn̄ ndusụk utom ọnọ Elisha, enye akada oro anam Elijah enyene nsan̄a emi edin̄wamde enye ọyọ editịmede esịt ekededi. Kpa ntre n̄ko, ke ini itịn̄de nte etiede nnyịn ke idem inọ ata eti ufan, enye ekeme ndin̄wam nnyịn iyọ se ededi emi etịmerede nnyịn esịt. (2 Ndi. 2:2; N̄ke 17:17) Edieke ekerede ke imọ inyeneke owo emi ikemede nditịn̄ nte etiede imọ ke idem nnọ, bọn̄ akam dọhọ Jehovah an̄wam fi okụt eyenete emi ọsọn̄de idem ke esop, emi edikemede ndin̄wam fi ọyọ.

10. Didie ke nte Jehovah akan̄wamde Elijah anam inyene idotenyịn? Didie ke Isaiah 40:28, 29 ekeme ndin̄wam nnyịn?

¹⁰ Jehovah ama an̄wam Elijah ọyọ mfịna emi eketịmerede enye esịt onyụn̄ aka iso anam n̄kpọ esie ke ediwak isua. Nte Jehovah akan̄wamde Elijah anam inyene idotenyịn. Imekeme ndinyene ediwak mfịna emi ẹtịmerede nnyịn esịt, ẹnamde idem emem nnyịn, ẹnyụn̄ ẹnamde ikûkere n̄kpọ ọfọn aba. Edi edieke iberide edem ke Jehovah, enye ọyọnọ nnyịn odudu ika iso inam n̄kpọ esie.—Kot Isaiah 40:28, 29.

HANNAH, DAVID, YE ANDIWET PSALM KIET ẸKEBERI EDEM KE JEHOVAH

11-13. Nso ke editịmede esịt akanam ikọt Abasi ita ke eset?

¹¹ Mbon en̄wen ke Bible ẹma ẹtiene ẹnyene ikpọ mfịna emi ẹkenamde esịt etịmede mmọ. Ke uwụtn̄kpọ, Hannah ama ọyọ esuene unana eyen ye isụn̄i emi n̄wan ufụp esie ekesisụn̄ide enye. (1 Sam. 1:2, 6) N̄kpọ oro ama anam Hannah ofụhọ tutu enye atua eyet, inyụn̄ ikemeke ndidia udia.—1 Sam. 1:7, 10.

¹² Ndusụk ini esịt ama esinen̄ede etịmede Edidem David. Se nsio nsio mfịna emi enye ekenyenede mi. Esịt ama esinen̄ede obiom enye ke ntak ediwak ndudue emi enye akanamde. (Ps. 40:12) Absalom eyen esie emi enye akamade etieti ama ọsọn̄ ibuot ye enye, nsọn̄ibuot oro ama onyụn̄ owot Absalom. (2 Sam. 15:13, 14; 18:33) Kiet ke otu n̄kpere n̄kan ufan esie ama ọkpọn̄ enye akada ye eyen esie. (2 Sam. 16:23–17:2; Ps. 55:12-14) Ediwak psalm emi David ekewetde ẹwụt nte idem ekememde enye, ye nte enye akakade iso ọbuọt idem ye Jehovah.—Ps. 38:5-10; 94:17-19.

¹³ Ekem ko, owo kiet emi eketienede ewet psalm ama ọtọn̄ọ ndifịbe uwem ndiọi owo. Etie nte enye okoto ubon Levi kiet emi ekekerede Asaph, okonyụn̄ anam utom ke “akwa edisana ebiet Abasi.” Esịt ama etịmede andiwet psalm oro tutu enye ikopke inemesịt aba inyụn̄ iyụhọke ye se enye enyenede aba. Enye ama akam ọtọn̄ọ ndikere ke edidiọn̄ emi owo ọbọde ke ndinam n̄kpọ Abasi ikemke.—Ps. 73:2-5, 7, 12-14, 16, 17, 21.

14-15. Nso ke uwụtn̄kpọ owo ita ke Bible ẹkpep nnyịn ẹban̄a se ikpanamde man Jehovah an̄wam nnyịn?

¹⁴ Ikọt Jehovah ita emi isụk itịn̄de iban̄a do ẹkeberi edem ke Jehovah man an̄wam mmọ. Mmọ ẹma ẹbọn̄ akam ke ofụri esịt ẹnọ enye ẹnyụn̄ ẹtịn̄ se itịmerede mmọ esịt ẹnọ enye. Mmọ ikedịpke enye se inamde esịt etịmede mmọ. Mmọ ikesinyụn̄ itreke ndika ebiet emi ẹkesisopde idem ẹtuak ibuot ẹnọ Jehovah.—1 Sam. 1:9, 10; Ps. 55:22; 73:17; 122:1.

¹⁵ Jehovah ama okop owo mmọ kiet kiet mbọm onyụn̄ an̄wam mmọ. Enye ama anam esịt ana Hannah sụn̄. (1 Sam. 1:18) David ekewet ete: “Edinen owo okụt ediwak afanikọn̄, edi Jehovah anyan̄a enye osio ke kpukpru mmọ.” (Ps. 34:19) Nte ini akakade, andiwet psalm oro ama okụt ke Jehovah ‘ama omụm enye ubọk nnasia,’ ọnọ enye item ima ima man enye ọfiọk se akpanamde. Enye ama ọkwọ ete: “Edi amaedi ami, ọfọn mi ndisan̄a n̄kpere Abasi. Ami mmada Jehovah, Akakan Ọbọn̄ Andikara, ke ebiet ubọhọ mi.” (Ps. 73:23, 24, 28) Nso ke ikpep ito uwụtn̄kpọ owo ita emi? Ndusụk ini, iyesinyene ikpọ mfịna emi ẹditịmerede nnyịn esịt. Edi iyekeme ndiyọ edieke itiede ikere nte Jehovah an̄wamde mbon en̄wen, ibọn̄de akam inọ enye, iberide edem ke enye, inyụn̄ inamde se ededi emi enye ọdọhọde inam.—Ps. 143:1, 4-8.

BERI EDEM KE JEHOVAH MAN EKEME NDIYỌ SE ITỊMEREDE FI ESỊT

16-17. (a) Ntak emi mîkpanaha itre ndidian idem ye Jehovah ye ikọt esie? (b) Nso idin̄wam nnyịn ifiak ikop odudu?

¹⁶ Akpan n̄kpọ efen emi uwụtn̄kpọ owo ita oro ke Bible ekpepde nnyịn edi ke inaha itre ndidian idem ye Jehovah ye ikọt esie. (N̄ke 18:1) Nancy emi esịt ekenen̄erede etịmede ini ebe esie ọkọkpọn̄de enye ọdọhọ ete: “Ediwak usen, ikesidọn̄ke mi ndikụt owo ndomokiet m̀mê nditịn̄ ikọ ye owo ndomokiet. Nte n̄kadian̄arede idem n̄kpọn̄ mme owo, ntre ke n̄kenen̄ede mfụhọ.” Esịt ama ọtọn̄ọ ndinem Nancy ini enye okoyomde usụn̄ an̄wam mbon en̄wen emi ẹkenyenede mfịna. Enye ọdọhọ ete: “Ini mbon en̄wen ẹtịn̄de mfịna mmọ ẹnọ mi, mma nsikpan̄ utọn̄ n̄kop. Mma ndikụt ke adan̄a nte n̄kopde mmọ mbọm, ntre ke n̄ketre ndifịna idem mban̄a mfịna mi.”

¹⁷ Edieke isidụkde mbono esop, emi ayan̄wam nnyịn ifiak ikop odudu. Ke ini idụkde mbono esop, imesinọ Jehovah ifet en̄wen ‘ndin̄wam nnyịn nnyụn̄ ndọn̄ nnyịn esịt.’ (Ps. 86:17) Do ke Jehovah esida edisana spirit esie, Ikọ esie, ye ikọt esie ọsọn̄ọ nnyịn idem. Ndidụk mbono esop esinam “isịn udọn̄ inọ kiet eken.” (Rome 1:11, 12) Sista kiet emi ekerede Sophia ọdọhọ ete: “Jehovah ye nditọete mi ẹken̄wam mi n̄ka iso nyọ. N̄kpọ efen emi ekenen̄erede an̄wam mi ekedi mme mbono esop nnyịn. Mmokụt ke nte nnen̄erede nsịn idem n̄kwọrọ ikọ nnyụn̄ ndụk mbono esop, ntre ke n̄keme ndiyọ se ededi emi etịmerede mi esịt.”

18. Nso ke Jehovah ekeme ndinam nnọ nnyịn ini idem ememde nnyịn?

¹⁸ Ini idem ememde nnyịn, yak iti ke Jehovah in̄wọn̄ọke kpọt ke iyanam mfịna etre ke nsinsi ke ini iso, edi ke enye ọn̄wọn̄ọ n̄ko ndin̄wam nnyịn iyọ mfịna emi etịmerede nnyịn esịt idahaemi. Enye anam inyene odudu ‘ndinyịme nnyụn̄ nnam’ se ededi emi enye ọdọhọde man ikeme ndiyọ ini idem ememde nnyịn, ye ini etiede nte ke idotenyịn idụhe aba.—Phil. 2:13.

19. Nso ke Rome 8:37-39 anam inịm?

¹⁹ Kot Rome 8:37-39. Apostle Paul anam ikụt ke inyeneke se ikemede “ndidian̄ade nnyịn ke ima Abasi.” Didie ke ikeme ndin̄wam nditọete nnyịn emi ẹdomode ndiyọ mme mfịna emi ẹtịmerede mmọ esịt? Ke ibuotikọ oro etienede, iyeneme nte ikemede ndikop nditọete nnyịn mbọm nnyụn̄ n̄n̄wam mmọ ke ini mmọ ẹyọde mfịna emi etịmerede mmọ esịt, ukem nte Jehovah esinamde.