Ndi Ama Ọfiọk?

Nso ke mme akama-ukpọhọde ke eyo Bible ẹkesinam?

KE EYO Bible, akama-ukpọhọde ekesise enyịn ke ufọk m̀mê in̄wan̄ owo efen. Ikọ Hebrew ye Greek oro ẹkabarede “akama-ukpọhọde” ẹkeme ndida mban̄a esenyịn m̀mê owo emi esede aban̄a ufọk.

Ini Joseph eyen Jacob ekedide ofụn ke Egypt, enye ama akabade edi andise mban̄a ufọk eteufọk esie. Eteufọk esie emi ekedide eyen Egypt ama akam “ayak kpukpru inyene esie esịn Joseph ke ubọk.” (Gen. 39:2-6) Ekem ko, ini Joseph ke idemesie akakabarede edi udiana andikara ke Egypt, enye ama emek owo ese aban̄a ufọk esie.—Gen. 44:4.

Ke eyo Jesus, mme enyene ikpọ in̄wan̄ ẹkesiwak ndidụn̄ ke ikpọ obio emi oyomde usụn̄ ọkpọn̄ in̄wan̄ mmọ. Oro akanam mmọ ẹsimek owo ese enyịn ke se mbonutom ẹnamde ke in̄wan̄ mmọ kpukpru usen.

Nso utọ owo ikodot ndidi akama-ukpọhọde? Columella eyen Rome emi ekesiwetde n̄wed ke eyo mme apostle ọkọdọhọ ke ofụn emi ẹyomde ndimek esenyịn m̀mê akama-ukpọhọde ana edi “ofụn emi ama akanam utom ebịghi onyụn̄ ọdiọn̄ọde utom etieti.” Akana enye edi owo emi “mîyakke mbonutom ẹnam n̄kpọ nte ẹmade-ma inyụn̄ inaha enye ọsọsọn̄ ido.” Enye ama ọdọhọ n̄ko ete: “Ata akpan edu emi ẹyomde utọ ofụn oro enyene edi ke enye inaha anam nte imọdiọn̄ọ n̄kpọ emi enye mîdiọn̄ọke, ana enye onyụn̄ edi owo emi ọdọn̄de-dọn̄ enye ndidiọn̄ọ n̄kpọ efen efen.”

Ikọ Abasi ada uwụtn̄kpọ akama-ukpọhọde ye se akama-ukpọhọde ekesinamde etịn̄ aban̄a ndusụk n̄kpọ emi ẹsinamde ke esop Christian. Ke uwụtn̄kpọ, apostle Paul ama ọdọhọ mme Christian ẹda nsio nsio ẹnọ emi Abasi ọnọde mmọ “ẹnam n̄kpọ ẹnọ kiet eken nte nti mme akama-ukpọhọde mfọnido Abasi eke owo mîdotke.”—1 Pet. 4:10.

Jesus ke idemesie ama etịn̄ aban̄a akama-ukpọhọde ke uwụtn̄kpọ emi enye ọkọnọde ke Luke 16:1-8. N̄ko, ke prọfesi emi aban̄ade idiọn̄ọ edidu Jesus nte Edidem, Jesus ama ọdọhọ mbet esie ke imọ iyemek “ofụn emi anamde akpanikọ onyụn̄ enyenede ọniọn̄,” m̀mê “akama-ukpọhọde emi anamde akpanikọ.” Akpan utom emi akama-ukpọhọde oro edinamde edidi ndika iso n̄kpep mbet Christ Ikọ Abasi ke mme akpatre usen. (Matt. 24:45-47; Luke 12:42) “Akama-ukpọhọde emi anamde akpanikọ” ke osion̄o mme n̄wed ye mme n̄kpọ Ikọ Abasi emi ẹnamde mme owo ẹnen̄ede ẹbuọt idem ke Abasi; enye onyụn̄ anam mme owo ke ofụri ererimbot ẹkeme ndinyene. Esịt enem nnyịn nte isịnede ke otu mbon emi ẹdade mme n̄wed emi ẹn̄wam.