Ndiwụt Unana Asari ke Utom Ukwọrọikọ Nnyịn
1 “Abasi iten̄eke owo enyịn,” ntre ke Peter ọkọdọhọ, edi “adadara owo ekededi eke abakde Enye onyụn̄ anamde nti ido.” (Utom 10:34, 35) Inam utom ukwọrọikọ nnyịn mfịn ye ọyọhọ ifiọk aban̄ade akpanikọ oro ẹwetde in̄wan̄în̄wan̄ mi. Ke ntre, edi akpan n̄kpọ ete nnyịn isịn ofụri ukeme ndikan ubiọn̄ọ ekededi oro akpakpande nnyịn ndida eti mbụk nsịm kpukpru owo.
2 Ke ini ikwọrọde ikọ ke ufọk ke ufọk ke ndusụk ebiet, idịghe esen n̄kpọ ndikụt mme owo ẹmi mîsemke m̀mê mîkopke usem oro ẹdade ke esop nnyịn. N̄kpọ ubiọn̄ọ otode usem akpan ndusụk owo ndibọ ufọn ọyọhọ ọyọhọ nto etop Obio Ubọn̄ oro nnyịn ikwọrọde. Ndusụk ke otu mmọ ẹmi ẹdi mbon inan, ẹmi ẹsidade usem idiọn̄ọ ẹnyene nneme. Nso ke ẹkeme ndinam man ẹn̄wam ẹkan n̄kpọ ubiọn̄ọ eke usem oro akpande nnyịn ndida eti mbụk nsịm mme owo ẹmi uforo uforo?
3 N̄ka ọmọnọ babru S-70a, Sign-Language Follow-up Slip, ẹsọk kpukpru esop ke Nigeria. Uduak babru emi edi ndikụt nte ke ẹnọ mme owo ẹmi ẹsidade usem idiọn̄ọ ifet ndibọ etop Obio Ubọn̄ ke usem mmọ.
4 Edieke afo mûfiọkke usem idiọn̄ọ ndien okụt owo emi edide inan ke efakutom, afo ekpenyene ndiwet n̄kpọ in̄wan̄în̄wan̄ nyọhọ kiet ke otu mme babru ẹmi. Ẹkpenyene ndinam emi idem edieke owo oro mîwụtke udọn̄ ke akpanikọ. Eyedi afo udukemeke kpukpru ini ndinyene enyịn̄ utọ owo oro, edi afo ekpenyene ndiwet adres ye usem oro enye ọfiọkde. Ẹkeme ndisịn babru emi ke ekebe ibat utom an̄wautom ke Ufọkmbono Obio Ubọn̄. Ewetn̄wed oyosion̄o mme babru ẹmi, ese mmọ ndikụt ete ke ẹnen ẹnyụn̄ ẹdi se ẹkemede ndikot, ndien ọnọ mmọ ẹsọk N̄ka m̀mê n̄kpere-n̄kan esop emi ẹsikabarede usem idiọn̄ọ. Mmọ ẹyedomo ndinọ akabade usem idiọn̄ọ ndika n̄kese owo inan oro.
5 Nso edieke anam idiọn̄ọ mîdụhe ikpere ikem ndika n̄kese owo inan oro? Ke utọ idaha oro, N̄ka ọyọtọn̄ọ ndiwet leta nnọ ẹsọk owo inan oro onyụn̄ esịn enyịn̄ esie ke n̄wed mbon inan nnyịn. Enye ndien ekeme nditobo mme n̄wed ke Ikọmbakara ọnọ owo inan oro ebe ke esop.
6 Ẹnọ mmọ ufiop ufiop ikot ndidi mme mbonoesop Christian. Ẹsitie owo kiet kiet ye mbon inan ke nsio nsio ini. Ẹwet mme n̄kpọ ẹnịm ke mme mbonoesop ẹnyụn̄ ẹbuana mmọ ye mbon inan ẹnyenede udọn̄. Dọhọ mmọ ẹtiene ẹbuana ke mme mbonoesop. Mmọ ẹkeme ndiwet mme ibọrọ mmọ ke akpan ikpehe ekikere ẹnyụn̄ ẹnam owo okot ibọrọ mmọ.
7 Nso efen ke mbiowo ẹkeme ndinam? Mbiowo ẹkeme ndinọ kiet ke otu mme asiakusụn̄ oro ẹtịmde ẹdot, emi enen̄erede enyene udọn̄ ndisika n̄kese owo inan emi enen̄erede owụt udọn̄. Edieke owo inan oro etịmde ọfiọk n̄wed, ẹkeme ndikpep n̄kpọ, ẹkamade benetap ye babru. Ndusụk mmọ ẹkeme ndibọ ukpep ẹkamade vidio oro, Ifiọk Oro Adade Osịm Nsinsi Uwem ke Usem Idiọn̄ọ Mbon America. Mmọ eken ẹkeme ndibọ ufọn nto edikpep ekededi ke otu ndiye uduot n̄kpri n̄wed Nso ke Abasi Oyom Oto Nnyịn? m̀mê Dara Uwem ke Isọn̄ ke Nsinsi!
8 Asuanetop kiet kiet ekpenyene ndidu ke edidemede ndida mme babru edifiak n̄kese emi nte oyomde. Edieke esop mînyeneke babru S-70a, ẹkeme ndiwet ntọt oro ẹyomde ke ekpri ubak babru ẹnyụn̄ ẹda ẹkesịn nte ẹtịn̄de ke enyọn̄ emi. Ebede ke ndisịn ọkpọsọn̄ ukeme ndida eti mbụk nsịm kpukpru owo inamke n̄kpọ se usem mmọ edide, nnyịn iyowụt ima Abasi nnyịn, Jehovah, “emi oyomde kpukpru [orụk, NW] owo ẹnyene edinyan̄a, ẹnyụn̄ ẹsịm ifiọk akpanikọ.”—1 Tim. 2:4.