Fiak Tiene Udọn̄ Oro Afo Okokụtde
1 Ke ini inamde utom ke ufọk ke ufọk, nnyịn isiwak ndinyene esisịt ini ndibiat ye owo oro enyenede udọn̄. Ke ediwak idaha isinam ataata utom unọ ukpep ke ini inamde mme mfiakn̄ka inyụn̄ inịmde mme ukpepn̄kpọ Bible. (Matt. 28:19, 20) Man inọ ukpep uforo uforo ke mfiakn̄ka, oyom nnyịn ifiak idụn̄ọde se nnyịn ikenemede ke akpa ediwaha ndien ekem itịm idem inọ n̄kaiso nneme.
2 Edieke afo ekenemede aban̄a unana iwụk ke ndutịm ubon, afo emekeme ndida se idude ke ibuot 29 ke n̄wed “Ndidu Uwem ke Nsinsi.” Afo emekeme ndidọhọ:
◼ “Isan̄ oko nnyịn ima ineme iban̄a ọniọn̄ oro odude ke nditiene item Bible man inyene inem inem uwem ubon. Afo ekere ke nso idi ukpọhọde ndinam mme ubon ẹdiana ọtọkiet mfịn?” Bet ibọrọ. Tịn̄ tụk ikpehe ekikere 27 ke page 247, nyụn̄ kot N̄wed Mbon Colossae 3:12-14. Tịn̄ mme ikọ efen efen ndiwụt nte ata ima ekemede ndimụm mme ubon ndian ọtọkiet. Nam an̄wan̄a nte edikpep n̄wed Ndidu Uwem ke Nsinsi ke nde ke nde ekemede ndin̄wam ke ndikọk mme mfịna.
3 Edieke afo ekenemede aban̄a mbiara idaha ererimbot ke akpa ediwaha fo, afo emekeme ndikaiso ke nneme ke ndidọhọ:
◼ “Mmonịm ke afo eyenyịme ke ẹyom ikpọ ukpụhọde edieke edide nnyịn tutu amama iyedụn̄ ke emem. Bible owụt ete ke Satan edi akpan ntak mfịna nnyịn. Ediwak owo ẹyịk ntak emi Abasi ayakde enye akaiso ke ata anyanini ntre. Afo ekere didie?” Bet ibọrọ. Kụbọde ka page 20, ikpehe ekikere 14 ye 15, ke n̄wed Ndidu Uwem ke Nsinsi, nyụn̄ nam an̄wan̄a ntak emi owo mîsoboke Satan kan̄a. Ekem kot N̄wed Mbon Rome 16:20, emi owụtde se nnyịn ikemede ndidori enyịn mban̄a ke n̄kpet n̄kpet ini iso.
4 Edieke afo ekenemede aban̄a mme edidiọn̄ oro ẹdinyenede ke idak ukara Obio Ubọn̄, ke ini afiakde aka, emekeme ndidọhọ:
◼ “Obio Ubọn̄ Abasi eyeda mme utịbe utịbe edidiọn̄ ọsọk isọn̄ ye ubonowo. Ẹwụt mme edidiọn̄ emi in̄wan̄în̄wan̄ mi ke page 12 ye 13. Nso ke afo okụt emi afo amade? [Bet ibọrọ.) Kere nte editiede ndidụn̄ ke utọ ererimbot oro.” Kot ikpehe ekikere 12. Edieke ẹwụtde udọn̄, bụp mbụme oro ke ikpehe ekikere 13, nyụn̄ neme ibọrọ. Wụt nte ke ibuotikọ emi ọbọrọ ekese mbụme ẹban̄ade mme edidiọn̄ Obio Ubọn̄ ye nte ke afo eyema ndineme mmọ ke edifiak n̄waha fo efen.
5 Afo emekeme nditọn̄ọ ukpepn̄kpọ ke ndidọhọ:
◼ “Ediwak owo ẹnyene ibọrọ ke mme mbụme Bible mmọ ebe ke ndikama n̄wed emi.” Kụbọde ka se isịnede, nyụn̄ bụp ete: “Ewe ibuotikọ mi ke afo ama akan?” Bet ibọrọ, kụbọde ka ibuotikọ oro omụmde udọn̄ mmọ, nyụn̄ kot akpa ikpehe ekikere. Nam an̄wan̄a nte mme mbụme oro ẹdude ke idak page kiet kiet ẹsiode mme akpan n̄kpọ ke ikpehe ekikere kiet kiet ẹwụt. Nam wụt ke ndineme ikpehe ekikere kiet m̀mê iba efen, ndien ekem diomi ndifiak n̄waha.
6 Ndifiak ntiene udọn̄ oro ẹkewụtde ke n̄wed Ndidu Uwem ke Nsinsi owụt udọn̄ oro nnyịn inyenede ndinam utom nnyịn mma ọyọhọ ọyọhọ. (2 Tim. 4:5) Nnyịn imekeme ndin̄wam mbon oro ẹkpan̄de utọn̄ ẹnọ nnyịn ndinyanade mbịne nsinsi uwem.—John 17:3.