Eti Mbụk Enyenede Mbon Nsụkesịt
1 Nnyịn idu uwem ke ini emi ubiereikpe ekperede. (Ezek. 9:5, 6) Edi usọp usọp n̄kpọ nte ẹnọ mbon nsụkesịt ke kpukpru ebiet ntọt man otodo mmọ ẹkeme nditịm idem nnọ se idide. Ke ima-mfọnido esie, Jehovah ọmọnọ ikọt esie utom ete ‘ẹbụk eti mbụk ẹnọ mbon nsụkesịt.’ (Isa. 61:1, 2) Mme magazine nnyịn ẹn̄wam nnyịn nditan̄a eti mbụk emi ntatara ntatara.
2 Enyọn̄-Ukpeme ye Awake! ẹnọ ọkpọsọn̄ udia eke spirit oro ọsọn̄ọde nnyịn idem onyụn̄ onụkde nnyịn ndinam n̄kpọ. Enyọn̄-Ukpeme ọnọ mbon nsụkesịt ndọn̄esịt ye eti mbụk nte ke Obio Ubọn̄ Abasi eyesọp ndinam isọn̄ akabade edi paradise. Awake! ọbọp mbuọtidem ke un̄wọn̄ọ Andibot aban̄ade emem emem obufa ererimbot oro enyenede ifụre. Ndisuan n̄wedmbụk ẹmi ntatara ntatara edi kiet ke otu nsọpn̄kan usụn̄ ndida eti mbụk nsọk mbon nsụkesịt. Nso mme akpan n̄kpọ ndida nnyene nneme ke nnyịn ikeme ndisio n̄wụt ke mme nsiondi eke ndondo emi?
3 Afo emekeme ndinọ “Enyọn̄-Ukpeme” eke May 1 ebe ke ndiwụt ibuotikọ oro “Ndibọ Ufọn Nto Edikot Bible ke Usen ke Usen” nnyụn̄ mbụp mbụme emi:
◼ “Afo ekere ke nso ufọn ke nnyịn ikeme ndibọ nto edikot Bible? [Bet ibọrọ.] Bible ke idemesie, ke N̄wed Mbon Rome 15:4, n̄wam nnyịn ndikọk ibuot ke mbụme oro. [Kot N̄wed Mbon Rome 15:4.] Ata ediwak owo ke n̄kann̄kụk nnyịn ẹnyene Bible, edi ibat ibat owo ẹsifak ifet ẹkot enye ofụri ini. Nnyịn inịm ke akpanikọ ite ke ẹkeme ndikụt n̄kukụre idotenyịn oro enyenede nsọn̄ọ kaban̄a ini iso ke Bible, ndien nnyịn iyebọ ufọn edieke ikotde enye.” Tịn̄ mme ikọ efen efen oro ẹdotde, ndien ekem bọ editobo.
4 “Enyọn̄-Ekpeme” eke May 15 enyene akama-nduaidem ibuotikọ oro ẹkotde: “Obufa Uwem Eyedu Ọnọ Mme Eteete Nnyịn.” Afo emekeme ndidemede udọn̄ ye ntọn̄ọikọ emi:
◼ “Ediwak owo ẹsiwak ndiyịk nte mme eteete mmọ ẹketiede. Sia mmọ ẹma ẹkekpan̄a mînyụn̄ idụhe aba, ata ediwak owo ẹbiere ẹte ke nnyịn tutu amama idifiọkke. Nte afo emekere ke usụn̄ ekededi odu oro nnyịn idisan̄ade idiọn̄ọ mme eteete nnyịn tutu amama?” Bet ibọrọ. Kot John 5:28, 29, nyụn̄ nam an̄wan̄a nte Abasi ọn̄wọn̄ọde ndinọ mmọ obufa uwem ke paradise isọn̄.
5 Afo emekeme ndinọ “Awake!” eke May 8 ebe ke ndibụp mbụme:
◼ “Afo ekere ke nso ke oyom man uwem enen̄ede enem ndidu?” Bet ibọrọ. Dụri ntịn̄enyịn ka ibuotikọ oro “What Is the Meaning of Life?” (Nso ke Uwem Ọwọrọ?), page 26, nyụn̄ kot mme ikọ Solomon ke Ecclesiastes 2:11. Ekem, wụt item esie ke ibuot 12, ufan̄ikọ 13. Dọhọ enyeneufọk ọbọ editobo.
6 Edieke akamade mme magazine anam utom, du ke mben̄eidem ndidụri ntịn̄enyịn n̄wụt mme n̄kpọ ẹdemerede udọn̄ ẹdude ke mme nsiondi eke ndondo emi. Nnyịn ikpenyene ndidu ke mben̄eidem kpukpru ini ndinọ mme n̄wed nnyịn, ifiọkde ite ke mbon en̄wen ke ubon oro ọkọrọ ye mme ufan ẹmi ẹkade ndise mmọ ẹkeme ndikot mmọ. (1 Tim. 6:18) Eti mbụk oro nnyịn idade isọk mbon nsụkesịt ekeme ndinyan̄a uwem mmọ.—1 Tim. 4:16.