Ẹtoro Jehovah Kpukpru Ini
1 Ibat ibat n̄kpọ ẹdu ẹmi ẹdide ata akpan n̄kpọ oro ẹdotde nnyịn inọ ntịn̄enyịn kpukpru ini. Nnyịn imesịn edidia udia, edikot ibifịk, ye edide idap ke otu mmọ. Mmọemi ẹdi akpan n̄kpọ edieke anade nnyịn ikaiso idu uwem ke n̄kan̄ obụkidem. Apostle Paul ekesịn edikwọrọ eti mbụk ke ukem otu oro ke ini enye akakpakde ete: “Yak nnyịn iwa uwa ekọm inọ Abasi kpukpru ini.” (Heb. 13:15, sịghisịghi ubọkn̄wed edi eke nnyịn.) Ntre, nditoro Jehovah n̄ko oyom ntịn̄enyịn ofụri ini nnyịn. Enye edi n̄kpọ oro nnyịn ikpan̄wanade ndinam kpukpru usen, itorode Ete nnyịn eke heaven kpukpru ini.
2 Ke ini mbon en̄wen ẹkedomode ndiwọn̄ọde ntịn̄enyịn esie n̄ka ebiet en̄wen, Jesus ama ọbọrọ ete: “Mmenyene ndikwọrọ eti mbụk Ubọn̄ Abasi.” (Luke 4:43) Ke ini utom ukwọrọikọ esie ke isua ita ye ubak, kpukpru n̄kpọ oro enye akanamde ke usen kiet kiet ẹma ẹnyene ebuana nnennen ke ndusụk usụn̄ ye edinọ Abasi ubọn̄. Nnyịn imọfiọk ite ke Paul ekenyene ukem ekikere emi, ke ikerede iban̄a se enye eketịn̄de ke 1 Corinth 9:16: “Idifọnke-fọn inọ mi edieke mmen̄kwọrọke gospel.” Ẹma ẹsịn udọn̄ ẹnọ mme anam-akpanikọ Christian eken ẹte ẹben̄e idem kpukpru ini nditịn̄ ntak idotenyịn eke mmọ ẹnyenede nnọ mbon en̄wen. (1 Pet. 3:15) Mfịn mme enyene-ifịk asiakusụn̄ tọsịn ke mme itie ikie ye ediwak miliọn mme asuanetop esop ke ẹdomo ndikpebe utọ nti uwụtn̄kpọ oro.
3 Ke ini nnyịn itiede ikere nsịnifịk ofụri esịt oro Jesus Christ, kpa Uwụtn̄kpọ nnyịn, okowụtde, onụk nnyịn nditiene nde-ikpat esie ketket. (1 Pet. 2:21) Ndusụk ini nnyịn imekeme ndikop mmemidem ke ini nnyịn isobode mme mfịna uwem ofụri usen. Didie ke nnyịn ikpada mme ifet oro ẹbererede ke usen ke usen itoro Jehovah ke ini nnyịn inyenede utom idịbi udia ofụri ini? Nnyịn inyụn̄ ikemeke ndifụmi mme mbiomo ubon oro ẹyomde ekese ini nnyịn. Ata ediwak uyen ẹnyene ndika n̄wed ke usen ke usen emi edide akpan n̄kpọ. Ndusụk owo ẹkeme ndikere ke owo ikemeke nditoro Jehovah an̄wan̄wa kpukpru usen. Ndusụk ini, ndusụk owo ẹkeme ndiyak ofụri ọfiọn̄ kiet ebe ye unana edibuana eti mbụk ke usụn̄ ekededi.
4 Jeremiah ekedi owo kiet oro mîkekemeke nditre nditịn̄ ikọ. Ke ini eketrede nditịn̄ ikọ ke enyịn Jehovah ke esisịt ini, enye ama okop nte ikan̄ oro enye mîkekemeke ndiyọ asakde enye ke esịt. (Jer. 20:9) Ke ini okosobode se iketiede nte ata ọkpọsọn̄ nsọn̄ọn̄kpọ, Jeremiah kpukpru ini ama esiyom usụn̄ nditịn̄ etop Jehovah nnọ mbon efen. Nte nnyịn imekeme ndikpebe uwụtn̄kpọ uko ye iwụk esie ke ndiyom mme ifet nditoro Andibot nnyịn ke usen kiet kiet?
5 Nnyịn nditịn̄ mban̄a Jehovah ikpenyeneke nditre ke nnennen ini oro ẹtịmde ẹnọ edinọ ikọ ntiense ye mme asuanetop eken ke efakutom esop. Ofụri se nnyịn iyomde edi owo oro edikpan̄de utọn̄. Nnyịn imesisobo ye mme owo kpukpru usen—mmọ ẹsidi ufọk nnyịn, nnyịn imesinam utom ye mmọ ke itieutom, nnyịn imesida ke udịm ye mmọ ke ufọkurua, nnyịn imesidep n̄kpọ ye mmọ ke ufọkurua, mîdịghe idụk n̄kpọisan̄ mbio obio ye mmọ. N̄kukụre se oyomde edi ufan ufan ekọm ye mbụme oro anamde owo ekere n̄kpọ m̀mê ikọ oro edinamde ẹtọn̄ọ nneme. Ediwak owo ẹkụt ke emi edi usụn̄ unọ ikọ ntiense oro enen̄erede enyene uforo ọnọ mmọ. Ke ini nnyịn inyenede ediwak ifet nditịn̄ nnọ mbon efen mban̄a eti mbụk, ekpedi unana eti ibuot nnyịn ndiyak ofụri ọfiọn̄ kiet ebe ye unana edinọ ikọ ntiense mban̄a Obio Ubọn̄.
6 Tutu amama ifet editoro Jehovah idinanake. Nte andiwet psalm okowụtde, kpukpru n̄kpọ eke ẹduọkde ibifịk ẹkpenyene nditoro Jehovah, ndien ke akpanikọ nnyịn imoyom ẹbat nnyịn ẹsịn. (Ps. 150:6) Edieke esịt nnyịn onụkde nnyịn ndinam ntre kpukpru ini, nnyịn iyeda mme ifet oro ẹbererede ke usen ke usen nditịn̄ mban̄a Jehovah ye Ikọ esie.