Kpukpru Owo Ẹkop Inemesịt ke Obufa N̄wed Ẹsiode ke Mbono District
Obufa N̄wed Osio Ifiọk Abasi Owụt
1 Ke akpatre mbono district nnyịn, nnyịn ikokop inemesịt ke ofụri ndutịm oro didie ntem! Ke uwemeyo Saturday idatesịt nnyịn ama ọyọhọ ọduọhọ ke ini ikokopde ntọt oro aban̄ade obufa n̄wed oro, Ifiọk Oro Adade Osịm Nsinsi Uwem, ye mme ntọt oro ẹketienede emi enyenede ebuana. Ediwak biliọn owo ke isọn̄ ẹyom ifiọk oro Abasi kpọt ekemede ndinọ—ifiọk aban̄ade Abasi ye Eyen esie, kpa Jesus Christ.—N̄ke 2:1-6; John 17:3.
2 Etịn̄ikọ eketịn̄ in̄wan̄în̄wan̄ aban̄a mme ikpehe n̄wed oro didie ntem! Mme enyịn̄ ibuotikọ oro ẹmụmde udọn̄, mme ataata uwụtn̄kpọ, edineme akpanikọ in̄wan̄în̄wan̄, mme mbụme oro mîwakke n̄kukọhọ, ndien, ke utịt ibuot kiet kiet, ekebe oro ẹkotde “Domo Ifiọk Fo Se” ẹsịne ke otu mme ikpehe oro ẹdidemerede udọn̄ kpukpru mbon oro ẹkotde enye. Edi nditọ ukpepn̄kpọ Bible nnyịn akpan akpan ẹyebọ ufọn ke adan̄aemi mmọ ẹbọde mme akpan ukpepn̄kpọ Bible usọp usọp.
3 Ke ini ẹkenọde mme akpatre utịn̄ikọ ke Saturday ye Sunday, ẹma ẹsịn udọn̄ ẹnọ nnyịn ndikama obufa n̄wed emi nnịm ukpepn̄kpọ ubon. Eyedi nnyịn idahaemi imemehe ye se isịnede ke enye. Eyịghe idụhe nte ke mbufo n̄ko ẹmeneme mme akpan n̄kpọ ndinyene ke ekikere ke ini ẹnọde obufa n̄wed emi ke an̄wautom.
4 Mme Akpan N̄kpọ Ndidụn̄ọde: Afo emekeme nditi nte ke ini ekenemede ibuotikọ oro “Ntak Emi Ubonowo Oyomde Ifiọk Abasi,” etịn̄ikọ ama odori nsọn̄uyo ke ediwak akpan n̄kpọ, esịnede se itienede emi: (1) Ke ini akamade n̄wed emi ndinịm mme ukpepn̄kpọ, iwụtke eti ibuot ndida mme n̄kpọ oro ẹwọrọde ẹkpọn̄ se ẹnemede ndisịn, ẹmi ẹkemede ndifụk mme akpan n̄kpọ; kam wụk ntịn̄enyịn ke nditịn̄ se n̄wed oro ọsọn̄ọde ke ibuot kiet kiet. (2) Mme ibuot ẹdi ukeuke ke udomo man otodo afo ekeme ndisiwak ndikụre kiet ke kpukpru ini afo ekpepde n̄kpọ. (3) Ke utịt ibuot kiet kiet, mme mbụme ẹdude ke ekebe oro ẹkotde “Domo Ifiọk Fo Se” ẹyenọ ibio ibio ndụn̄ọde.
5 Kama ke Mme Ukpepn̄kpọ Bible: Ata ibat ibat mme asuanetop ẹmebụp m̀mê ọfọn ndikpụhọde mme ukpepn̄kpọ Bible mmọ n̄ka obufa n̄wed emi. Edieke edide ama aka anyan ke n̄wed oro ekpepde idahaemi, ọkpọfọn ndikụre ukpepn̄kpọ ke n̄wed oro. Mîdịghe ntre, ẹtoro ẹte afo okpụhọde ada n̄wed Ifiọk. Edieke afo akadade ediye uduot ekpri n̄wed m̀mê tract ọtọn̄ọ ukpepn̄kpọ Bible, wụt obufa n̄wed oro ke ini odotde nyụn̄ kama enye ke ukpepn̄kpọ. Ntọt efen efen kaban̄a nte ẹdidade n̄wed Ifiọk inam n̄kpọ eyedu ke Utom Obio Ubọn̄ Nnyịn ke mme ọfiọn̄ ẹdide.
6 Jehovah ọnọ obufa n̄wed emi man an̄wam nnyịn ikpep mbon en̄wen iban̄a ifiọk oro adade osịm nsinsi uwem. Oyom nnyịn idahaemi itịm idem mfọn mfọn inyụn̄ inyene ọyọhọ ebuana ke utom oro osụhọde ndinam.