Edidụk Mme Mbonoesop Kpukpru Ini—Akpan N̄kpọ Kaban̄a Nsọn̄ọnda Nnyịn
1 Apostle Paul akpak nnyịn ete ‘isọn̄ idem ke ikọ mbuọtidem.’ (Titus 1:9, 13) Ke mme mbonoesop nnyịn imesineme nti ekikere ẹsinyụn̄ ẹteme nnyịn ete isịne ofụri n̄kpọekọn̄ eke spirit man nnyịn ikpekeme “ndin̄wana ye n̄kari Satan.”—Eph. 6:11; Phil. 4:8.
2 Mme Mbonoesop Ẹnọ Se Nnyịn Iyomde: Edidụk mme mbonoesop kpukpru ini edi akpan n̄kpọ kaban̄a nsọn̄ọnda nnyịn. (1 Cor. 16:13) Ke mme mbonoesop ẹsibọn̄ akam ndikọm nnyụn̄ ntoro Abasi, adianade ye ediben̄e enye n̄kpọ ke ibuot esop ye se esop oyomde. (Phil. 4:6, 7) Nditiene n̄kwọ mme ikwọ Obio Ubọn̄ esinam nnyịn idu ke eti idaha onyụn̄ anam nnyịn ikeme nditịn̄ mme ekikere nnyịn ye nte etiede nnyịn ke idem nte nnyịn ituakde ibuọt inọ Jehovah. (Eph. 5:19, 20) Ebuana nnyịn ọtọkiet ke Ufọkmbono Obio Ubọn̄ mbemiso mme mbonoesop ẹtọn̄ọde ye ke ẹma ẹkesuana esinọ nnyịn nsịnudọn̄, anam nnyịn ikọri, onyụn̄ anam nnyịn ikop inem.—1 Thess. 5:11.
3 Ke April emi ekebede akpan utịn̄ikọ an̄wa oro, “Utịt Nsunsu Ido Ukpono Emekpere” ama anam mbon oro ẹmade akpanikọ ẹnen̄ede ẹnyene ke ekikere nte edide usọp usọp n̄kpọ mmọ ndinam n̄kpọ man ẹwọn̄ọ ke Akwa Babylon. (Edi. 18:4) Ke ọfiọn̄ June ye July, nso n̄kpọ nduaidem ke ekedi ntem ndikụre ibuotikọ ukpepn̄kpọ ita ke Enyọn̄-Ukpeme ẹkeban̄ade uyama un̄wana oro anamde usụn̄ ndinen owo ayama! (N̄ke 4:18) Kere se nnyịn ikpakatabade edieke ekpedide nnyịn ima ifụmi ndidụk mme mbonoesop oro.
4 Nte Ẹtim Man Inam Utom Nnyịn Ima owụtde ke page 72, Ufọkn̄wed Utom Ukara Abasi edi ndutịm oro ẹnamde kaban̄a edinọ ofụri esop ukpep oro akade-kaiso. Idahaemi, ikpehe kiet ke ndutịm emi an̄wam nnyịn nditịm mmehe ye mbụk eyomfịn eke esop emi ebe ke ndikama n̄wed Proclaimers. Nnyịn iyomke nditaba ifet edibọ ukpep emi.
5 Esoputom nnyịn otịm nnyịn idem nditịm nnyene uforo ke utom ukwọrọikọ. Ẹma ẹwụt emi ke mbonoesop oro nnyịn ikọbọde ntọt kaban̄a edibuana ke ntatara edisuan Mbụk Obio Ubọn̄ Nọ. 34. Edidiọn̄ Jehovah ke utom emi ama awak etieti, nte ẹkụtde ke n̄wọrọnda utịp ẹtode ofụri ererimbot. (Men 2 Corinth 9:6, 7 domo.) Ẹma ẹnọ mbon oro ẹsidụkde mme mbonoesop kpukpru ini nsịnudọn̄, mmọ ẹnyụn̄ ẹn̄wam ke ndinọ ubịnikọt emi ibetedem.
6 Ke Ukpepn̄kpọ N̄wedesop, ẹnam ekikere nnyịn kaban̄a nte ini edide usọp usọp ọkọri ebe ke mme n̄kpọ oro nnyịn ikpepde ito Ikọ Abasi ye un̄wam n̄wed Ata-Utịt Ediyarade. Ke emi mme n̄kpọntịbe ẹdade itie usọp usọp ke ererimbot mi, oyom nnyịn ifiọk edisu oro mme ntotụn̄ọ prọfesi eke Ediyarade ẹsude.
7 Nịm Edidụk Mme Mbonoesop Kpukpru Ini Akpa: Ke ediwak idụt ẹmi nditọete nnyịn ẹsụk ẹsobode mme idomo, mmọ ke ẹsụk ẹfiọk adan̄a nte edide akpan n̄kpọ mmọ ndisop idem ọtọkiet ke urua kiet kiet. Ke uwụtn̄kpọ, ke Burundi, Rwanda, Liberia, ye Bosnia ye Herzegovina, mbufa owo ẹwakde utịm ikaba m̀mê ikata ẹkan mme asuanetop ẹsidụk mme mbonoesop. Ke usụn̄ emi ke Jehovah an̄wam nditọete ndisọn̄ọ nda ke spirit kiet.—Phil. 1:27; Heb. 10:23-25.
8 Owo ekededi oro ekesifụmide edidụk mme mbonoesop kpukpru ini ekpenyene ndinam n̄kpọ idahaemi ndikpụhọde edu emi. (Eccl. 4:9-12) Man isọn̄ọ ida, nnyịn imoyom nsịnudọn̄ edem mbiba ito mbon oro ẹkọride ẹsịm ọyọhọ idaha, emi ẹnọde ebe ke edidụk mme mbonoesop ofụri ini.—Rome 1:11.