Tịm Idem nọ Nyụn̄ Dara Mme Mbonoesop
1 Nte otu nditọete, nnyịn ke ọniọn̄ imesisop idem kpukpru ini kaban̄a mme mbonoesop nnyịn eke urua ke urua. (1 Tim. 4:15, 16) Didie ke nnyịn ikeme ndidara nnyụn̄ mbọ n̄kponn̄kan ufọn nto mmọ?
2 Ẹkpenyene ndisio ini nnịm kpukpru ini nnọ editịm idem nnọ mme mbonoesop. Ndusụk owo ẹkeme ndisịn ini okponde akan ke nditịm idem n̄kan mbon efen. Nte ededi, inamke n̄kpọ m̀mê nnyịn inana ini adan̄a didie, owụt eti ibuot ndiyom ndusụk ini man itịm idem inọ mme mbonoesop. Nditịm idem ọtọkiet nte ubon esinen̄ede enyene ufọn.—Eph. 5:15, 16.
3 Kaban̄a Ufọkn̄wed Utom Ukara Abasi: Domo ndisan̄a ikpat kiet ye ndutịm edikot Bible eke urua ke urua. (Josh. 1:8) Dụn̄ọde mme n̄kpọ oro ẹdikpepde, nyụn̄ kama mme n̄wed oro ẹyomde man etiene etịn̄ikọ ese. Kere mme usụn̄ oro afo ekemede ndida mme ntọt ẹmi nnam n̄kpọ ke utom ukwọrọikọ.
4 Kaban̄a Esoputom: Se ndutịm oro ẹwụtde ke Utom Obio Ubọn̄ Nnyịn. Kot mme ibuotikọ oro ẹdinemede. Edieke ẹdinemede n̄kpọ ẹto ibuotikọ odude ke Enyọn̄-Ukpeme m̀mê mme n̄wed efen, yom n̄wed oro nyụn̄ kot enye n̄ko. Edieke ẹdinamde ẹwụt nte ẹnemede nneme ke utom ukwọrọikọ, bemiso dụn̄ọde emi man afo odu ke mben̄eidem ndikama mmọ ke utom ukwọrọikọ fo.
5 Kaban̄a Ukpepn̄kpọ Enyọn̄-Ukpeme: Bemiso kot ofụri ukpepn̄kpọ oro, esịnde idiọn̄ọ ke mme ibọrọ mbụme. Ndikot mme itien̄wed Abasi oro ẹsiakde ẹsịn eyen̄wam ndinam enen̄ede an̄wan̄a fi. Nditie n̄kere nte ukpepn̄kpọ oro ekemde ye se afo ama ọkọfọfiọk eyenam ifiọk fo okpon. Diomi ndinyene ebuana ke ukpepn̄kpọ ebe ke nditịm mbio mbio ibọrọ nnọ ke nsụhọde n̄kaha ikpehe ekikere kiet m̀mê iba. Emi edi akpan usụn̄ ndida ‘nyarade idotenyịn’ nnyịn.—Heb. 10:23.
6 Kaban̄a Ukpepn̄kpọ N̄wedesop: Akpa, se nte se ẹdikpepde awakde; se enyịn̄ ibuotikọ oro ye n̄kpri ibuotikọ. Ekem, nte afo okotde, nịm idiọn̄ọ ke mme akpan ekikere. Dụn̄ọde mme ufan̄ikọ Bible oro ẹdade ẹsọn̄ọ. Domo ndibọrọ mme mbụme ke ikọ idemfo. Ke ama okotịm idem ọnọ ukpepn̄kpọ, dụn̄ọde enye ke ekikere fo. Domo nditi mme akpan n̄kpọ ye mme usụn̄ ẹnemede.—2 Tim. 2:15.
7 Dara Mme Mbonoesop: Man adara mme mbonoesop ọyọhọ ọyọhọ, edi akpan n̄kpọ ndidu ke eti ini man otodo abuana ke akam ediberede, emi ẹben̄ede spirit Jehovah. Afo n̄ko ọyọbọ ufọn oto mme inem inem ikwọ Obio Ubọn̄. Edieke afo mûnyeneke nditọwọn̄ m̀mê mme ntak efen nditie ke edem ke ufọkmbono, nte ido edide afo eyekụt ete ke edieke afo etiede ke n̄kan̄ iso, ibat ibat n̄kpọ ẹmi ẹwọn̄ọrede ntịn̄enyịn ẹdidu ndien afo ọyọbọ ekese ufọn oto ndutịm emi. Mme ete ye eka oro ẹnyenede nditọwọn̄ oro ẹdiyomde ẹmen ẹwọrọ an̄wa ke ini mbonoesop akade iso ẹkeme ndisụhọde udomo oro ẹwọn̄ọrede ntịn̄enyịn owo ebe ke nditie n̄kpere usụn̄ ye ke n̄kan̄ edem.
8 Domo ndikụbọde mme itien̄wed Abasi oro ẹkotde. Emi eyen̄wam fi eti se afo okokopde. Ndineme se afo ekpepde nnọ ubon ye mme ufan fo eyenam mme ntọt ẹmi ẹsọn̄ọ ẹdu fi ke ekikere. Ndida mme ekikere ẹmi nsịn ke edinam eyenam mme mbonoesop ẹnen̄ede ẹnyene ufọn ẹnyụn̄ ẹnyene inem, ndien mmọ ẹyenen̄ede ‘ẹdemede nnyịn ẹnọ ima ye nti utom.’—Heb. 10:24, 25.