Fiak Ka Man Akanyan̄a Ndusụk Owo
1 Edi uduak Abasi nte “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.” (1 Tim. 2:4) Nso ke nnyịn ikeme ndinam man in̄wam? Nam mme mfiakn̄ka ye uduak edikpep akpanikọ. Nso ke afo editịn̄? Mme ekikere ẹmi ẹtienede mi ẹkeme ndin̄wam fi.
2 Ke ini awahade ebịne owo emi ọkọbọde n̄wed oro “Yak Obio Ubọn̄ Fo Edi,” emekeme ndifiak ntịn̄ mban̄a ndise oro ke page 4 ye 5 onyụn̄ obụp enyeneufọk ete:
◼ “Ke ama akakaiso odụn̄ọde n̄wed oro n̄kọkpọn̄de nnọ fi onyụn̄ ekere aban̄a un̄wọn̄ọ Abasi kaban̄a paradise isọn̄, didie ke afo ekere aban̄a mme utịbe utịbe un̄wọn̄ọ ẹmi Abasi ọn̄wọn̄ọde ọnọ ubonowo?” Ke ama okokop ibọrọ enyeneufọk onyụn̄ etịn̄ ibio ibio aban̄a emi, afo emekeme ndidụri ntịn̄enyịn n̄ka ibuot 6 onyụn̄ eneme aban̄a usụn̄ nte nnyịn ikpanamde n̄kpọ iban̄a ifet nsinsi uwem ke idak mfọnmma ukara. Kere ban̄a ikpehe ekikere 1-3 ye kpukpru itien̄wed ẹmi ẹsiakde ẹsịn ke mme ikpehe ekikere oro.
3 Edieke afo akakamade ntọn̄ọikọ odude ke page 12, ikpehe ekikere 5, ke n̄wed “Reasoning” ada ọnọ n̄wed “Obio Ubọn̄ Edi,” emekeme nditọn̄ọ nneme ke ndidọhọ ete:
◼ “Ke ini n̄kedide mi isan̄ oko, nnyịn ima ineme iban̄a nte Obio Ubọn̄ Abasi edide ata idem n̄kpọ. Nnyịn ima ineme iban̄a se Obio Ubọn̄ Abasi edinamde, utọ nte edisio n̄kpa ye mfụhọ mfep, ye edinam isọn̄ akabade edi paradise. Mbụme odude idahaemi edi: Nso ke ana nnyịn inam man idot ndibọ mme edidiọn̄ ẹmi? Didie ke afo ọkpọbọrọ mbụme oro?” Bet ibọrọ. Kụbọde ka page 174 ye 175 nyụn̄ neme mme ekikere oro ẹdude ke ikpehe ekikere 1-4, ọsọn̄ọde owụt ufọn ndinam ubiere nte mme akpa Christian man ẹnam n̄kpọ Jehovah. Nam an̄wan̄a nte ukpepn̄kpọ Bible ofụri ini edin̄wamde enye anam n̄kpọ Jehovah.
4 Afo emekeme ndifiak n̄ka ebiet okonịmde n̄wed oro “Ndimek Mfọn N̄kan Usụn̄uwem” ye ido edisobo ye owo enyeemi:
◼ “Isan̄ oko mma ndụri fi ntịn̄enyịn n̄wụt un̄wọn̄ọ Abasi oro edinamde uwem nnyịn enyene uduak. Mma ntịn̄ n̄ko nte ke nnyịn imekeme ndinyene mfọnn̄kan usụn̄uwem idahaemi ebe ke ndida mme idaha Jehovah nsịn ke edinam ke uwem nnyịn. Didie ke emi edi akpanikọ? N̄kpama ndida minit ifan̄ kpọt nneme ye afo mban̄a ndusụk akpan n̄kpọ ke page 9, ikpehe ekikere 11, aban̄ade ntak emi edida mme edumbet Abasi ndu uwem edide mfọnn̄kan usụn̄uwem.” Kụbọde mme itien̄wed nyụn̄ buan mmọ.
5 Afo emekeme ndifiak n̄ka ebiet emi okonịmde n̄wed oro “Uyen Fo—Ndibö se Itimde Ifön Ikan nto Enye” ke ndidọhọ ete:
◼ “N̄koyom ndifiak ndi man ndiwụt fi ntak emi nnyịn ikemede ndisak iso nse ini iso ye mbuọtidem.” Neme ibuot 2, ikpehe ekikere 24-28 ye enye. Wụt ete ke Andinam nnyịn enyene udọn̄ ke ini iso esie. N̄kaiso edineme se idude ke n̄wed oro eyenọ ndinen item Jehovah kaban̄a ufọn esie. Nọ ekikere ban̄a edikpep Bible ke mfọn.
6 Ti ete ke uduak ẹnamde mme mfiakn̄ka edi man itọn̄ọ mme ukpepn̄kpọ Bible. Ẹtịm obufa n̄wed oro, Ifiọk Oro Adade Osịm Nsinsi Uwem, akpan akpan kaban̄a edida nnịm mme ukpepn̄kpọ. Ke ini ifiakde ika ebiet emi ikonịmde n̄kani n̄wed inyụn̄ inen̄ede itọn̄ọ ukpepn̄kpọ, ọkpọfọn ndidụri ntịn̄enyịn n̄ka obufa n̄wed emi. Nnyịn iyekop ekese idatesịt nte mbon oro ẹkpepde n̄kpọ ẹkpepde ndikot Jehovah kaban̄a edinyan̄a.—Utom 2:21.