Ntịmidem—Ukpọhọde Edikụt Unen
1 Ndibem iso ntịm idem nnọ utom ukwọrọikọ eyen̄wam ndikan edimen̄e ekededi emi owo ekemede ndinyene ke ndibuana ke an̄wautom. Nte afo asan̄ade ekpere enyịnusụn̄, afo eyefiọk se oyomde nditịn̄ nnọ mme enyeneufọk. Afo unyeneke ndikop ndịk mban̄a mme n̄kpọ-ata ẹmi ẹdide emekeme ndisobo. Ke ama ọkọnyọn̄ ukwọrọikọ edisịm ufọk, afo eyekop nsịnudọn̄, ke ọfiọkde ete ke ama esịn eti ukeme ke utom ukwọrọikọ. Ih, ọyọhọ ọyọhọ ntịmidem edi ukpọhọde edifori usọ ukwọrọikọ ye eke unọ ukpep nnyịn.
2 Paul ama ọsọn̄ọ etịn̄ aban̄a ntịmidem ke ndikpak nnyịn ete ‘ida mben̄e-idem ndikwọrọ gospel emem isịne nte ikpa-ukot.’ (Eph. 6:15) Emi esịne editịm ekikere ye esịt nnyịn ọkọrọ ye edinyene nnennen idaha ekikere ye edu unyịme. Ke ini nnyịn itịmde idem ndibuana akpanikọ ye mmọ en̄wen, eyeda mbun̄wụm Obio Ubọn̄ ẹdiọn̄ utom nnyịn, anamde nnyịn ikop inemesịt.—Utom 20:35.
3 Nte Ikpetịmde Idem inọ Utom Ukwọrọikọ: Nnyịn ikpenyene ndimek nneme oro ememde ọnọ nnyịn, eyedi ke otu mbon oro ẹnọde ekikere ke n̄wed Reasoning m̀mê mmọ oro ẹdude ke akpatre page Utom Obio Ubọn̄ Nnyịn. Tịm kere ban̄a itien̄wed Abasi oro odiomide ndikama, ebierede m̀mê mme ikọ m̀mê ubak udịmikọ ewe ke afo edisọn̄ọ etịn̄ man anam akpan n̄kpọ ọwọrọ ada. Ufọn idụhe ndimomụm nneme oro nsịn ke ibuot; utu ke oro, otịm ọfọn ndinyene ekikere oro ke ibuot, sịn enye ke ikọ idemfo, nyụn̄ tịn̄ enye ke usụn̄ oro ekerede ke eyedemede udọn̄ andikpan̄ utọn̄ nnọ fi.
4 Dụn̄ọde n̄wed oro oyomde ndinọ, nyụn̄ mek ndusụk akpan n̄kpọ ndida nnyene nneme ẹmi ẹdemede udọn̄. Mek n̄kpọ emi ekerede ke eyedi n̄kpọ udọn̄ ọnọ mme owo ke efakutom mbufo. Kere ban̄a nte ekemede ndikpụhọ nneme fo ekekem ye nsio nsio enyeneufọk—erenowo, n̄wan, akani owo, m̀mê uyen.
5 Nte afo ama odomo ndinyene mme ini ukpep? Sop ibuot ọtọkiet ye mbonubon m̀mê mme asuanetop en̄wen man ẹneme m̀mê nneme ewe ẹkeme ndinyene uforo, ndien ekem ẹnam ndomonse uyo ọwọrọ man kpukpru owo ẹtịm ẹnyene mmọ ke esịt. Domo ndinam mme ata idaha ye mme ubiọn̄ọ oro ẹkemede ndisobo ke efakutom n̄wụt. Utọ ukpep oro eyefori udọn utịn̄ikọ fo, ọkọri uforo fo ke ukwọrọikọ, onyụn̄ ọbọp mbuọtidem fo.
6 Ke adianade ye editịm ye edikpep nneme fo, afo n̄ko ekpenyene ndibụp idemfo ete, ‘Nte ọfọn̄ oro ndiomide ndisịne odot ye utom ukwọrọikọ? Nte mmenyene se nyomde ke ekpat n̄wed mi, esịnede n̄wed oro ndiomide ndikama? Nte enye odu ke eti idaha? Nte mmenyene n̄wed Reasoning mi, tract, n̄wetnnịm n̄kpọ eke ufọk ke ufọk, ye benetap?’ Ndutịm oro ẹbemde iso ẹkere ẹban̄a eyetịp esịn ke utom usen oro otịmde enyene uforo akan.
7 Ndondo oro inamde ofụri se nnyịn ikemede ndinam man idu ke mben̄eidem, nnyịn ikpenyene ndibọn̄ akam nyom spirit Jehovah ndin̄wam nnyịn ikụt unen. (1 John 5:14, 15) Nditịm nnọ ntịn̄enyịn ke ntịmidem eyesụn̄ọ ke nnyịn ndinyene akwa idatesịt ke utom nnyịn, nte nnyịn ‘inamde utom nnyịn ima.’—2 Tim. 4:5.