Nte Afo Amanana Ini Akaha?
1 Paul ọkọnọ item ete nnyịn ‘iyọhọ kpukpru ini ke utom Ọbọn̄.’ (1 Cor. 15:58) Ẹsịn udọn̄ ẹnọ nnyịn ndinyene ndutịm nnọ ukpepn̄kpọ idemowo, ndibuana kpukpru ini ke utom ukwọrọikọ, ndidụk mme mbonoesop kpukpru ini, nnyụn̄ ntịn̄ enyịn ke ndise mban̄a mme utom esop. Ke adianade do, ana nnyịn in̄wam mbon en̄wen oro ẹyomde un̄wam nnyịn. Ye ata ekese ndinam, ekeme nditie nnyịn mfịghe mfịghe ke idem ndusụk ini, ikerede ke ana iyom mme usụn̄ ndisụhọde mbiomo utom nnyịn.
2 Mme idaha ẹdu ẹmi ẹkemede ndiwụt ọniọn̄ ye eti ibuot ndisio ndusụk edinam mfep m̀mê ndisụhọde udomo mmọ. Ndusụk owo ẹsikere ẹte ke oyom mmimọ inam kpukpru n̄kpọ oro mbon en̄wen ẹyomde ẹto mmimọ. Unana edida ukem ukem ke afan̄ emi ekeme ndisụn̄ọ ke mfịghe oro ekemede ndinọ unan ke akpatre.
3 Da Ukem Ukem: Ukpọhọde edida ukem ukem ọkọn̄ọ ke ndida item Paul eke ‘edidomo mfiọk se ifọnde ikan’ nsịn ke edinam. (Phil. 1:10) Oro ọwọrọ in̄wan̄în̄wan̄ ete nnyịn iwụk ntịn̄enyịn ke mme n̄kpọ oro ẹnen̄erede ẹdi akpan n̄kpọ ndien, edieke ini ye mme idaha ẹyakde, ise iban̄a ndusụk n̄kpọ ẹmi mîtịmke idi akpan n̄kpọ. Ke akpanikọ mbiomo ubon ẹda iso ke otu mme n̄kpọ oro ẹdide akpan n̄kpọ. Ẹnyene ndise mban̄a ndusụk mbiomo idịbi udia. Nte ededi, Jesus ekekpep ete ke mme ebeiso n̄kpọ nnyịn ẹkpenyene ndikọn̄ọ ke edumbet oro nte nnyịn ibem iso iyom Obio Ubọn̄. Ana nnyịn ibem iso inam mme n̄kpọ oro ẹdiyakde nnyịn iyọhọ uyakidem oro nnyịn iyakde inọ Jehovah.—Matt. 5:3; 6:33.
4 Ke inyenede emi ke ekikere, nnyịn iyekụt ite ke imosio mme edinam idemowo ekededi oro mîdịghe akpan n̄kpọ, mme ebeubọk edinam unọ idem nduọkodudu, ye mme ediomi edinam n̄kpọ nnọ mbon en̄wen ẹmi mîdịghe akpan n̄kpọ ifep. Ke ndidiomi edinam nnyịn ke urua kiet kiet, nnyịn iyesio ini oro ekemde inịm inọ ukpepn̄kpọ idemowo, ndibuana nte odotde ke utom ukwọrọikọ, edidụk mme mbonoesop, ye mme n̄kpọ en̄wen ekededi ẹmi ẹtịmde ẹnyene ebuana ye utuakibuot nnyịn. Ẹkeme ndibahade ini osụhọde nnọ mme mbubehe eken, etiene udomo oro mmọ ẹtịpde n̄kpọ ẹsịn ke nnyịn ndisịm akpan utịtmbuba eke edidi mme Christian ẹdade ukem ukem ẹmi ẹnịmde Obio Ubọn̄ akpa.
5 Kpa ye oro, ekeme ndisụk ntie nnyịn ke idem nte mbiomo nnyịn osụk efefịk nnyịn. Ke edide ntre, oyom nnyịn inam n̄kpọ iban̄a ikot oro Jesus ọnọde: “Ẹtiene Mi, kpukpru mbufo ẹmi ẹkpade mba ẹnyụn̄ ẹbiomde edidobi mbiomo, ndien Ami nyenọ mbufo nduọk-odudu.” (Matt. 11:28) N̄ko, dori enyịn ke Jehovah, “emi obiomde mbiomo ọnọ nnyịn ke usen ke usen” onyụn̄ ọnọde owo mba odudu. Enye ọn̄wọn̄ọ ete ke imọ ididehede iyak edinen owo esehede. (Ps. 55:22; 68:19; Isa. 40:29) Nnyịn imekeme ndinyene mbuọtidem nte ke eyeyere akam nnyịn, anamde edi mmemmem n̄kpọ ọnọ nnyịn ndiyọ ke ifịk ifịk uwem utom ukara Abasi.
6 Ke adan̄aemi inịmde ke akpanikọ nte ke iyenyene ekese ndinam ke ndibịne mme udọn̄ n̄kpọ Obio Ubọn̄ oro ẹdotde, nnyịn imekeme ndikop idatesịt ke ndifiọk nte ke utom nnyịn idiwọrọke idi ikpîkpu ke Ọbọn̄.—1 Cor. 15:58.