N̄wam Mmọ Ẹfiak Ẹnam Utom
1 Ke ọfiọkde n̄kpọndịk eke spirit oro ekemede nditịbe nnọ ekemmọ Christian esie, apostle Paul ama ewet ete: “Ini ekekem nte [mbufo ẹkpedemerede] ke idap: koro edinyan̄a ekpere nnyịn ke emi, akan nte ekekperede ke ini nnyịn [ikonịmde] ke akpanikọ.” (Rome 13:11) Paul ekekere aban̄a nditọete esie oro ẹkeyetde idap ke n̄kan̄ eke spirit; enye ama ekere aban̄a edidemede mmọ man ẹfiak ẹnam utom.
2 Ke akpanikọ ẹkeme ndidọhọ nte ke okoneyo akani ererimbot emi ọmọn̄ ebe efep ndien usiere obufa ererimbot enen̄ede ekpere. (Rome 13:12) Nnyịn imenyene eti ntak ndikere mban̄a nditọete nnyịn ẹmi ẹma ẹketre ndibuana ye nnyịn nte mme ọkwọrọikọ eti mbụk. Isua utom emi ekebede, ke Nigeria ikpọn̄, se ibede mme asuanetop 1,500 ke ẹkenam ẹfiak ẹnam utom. Didie ke nnyịn ikeme ndin̄wam mbon eken oro mînamke utom aba ẹfiak ẹnam n̄kpọ ẹnọ Jehovah?
3 Se Mbiowo Ẹkemede Ndinam: Ekese owo oro mînamke utom aba ikpọn̄ke akpanikọ; mmọ n̄kukụre ẹtre ndikwọrọ ikọ ke ntak mmemidem, mme ọkpọkpọ mfịna, uma-inyene, m̀mê mme editịmede esịt eken ke uwem. (Luke 21:34-36) Ke ẹkemede, otịm ọfọn ndin̄wam mmọ mbemiso mmọ ẹtrede ndinam utom. Ewetn̄wed esop ekpenyene ndinam ada Ukpepn̄kpọ N̄wedesop ọfiọk ke ini asuanetop etrede nditọt ibatutom kpukpru ini. Ẹkeme ndinam ndutịm nnọ edinam utom ubọkerọn̄. Mmọ ẹkpenyene ndibiere akpan ntak mfịna ye nte ẹkemede ndinọ un̄wam.—Se Enyọn̄-Ukpeme eke September 15, 1993, page 20-23.
4 Nte Mbon Eken Ẹkemede Ndin̄wam: Ekese nnyịn imọdiọn̄ọ owo oro mînamke utom aba. Ekeme ndidi owo oro okotịmde ekpere nnyịn ke ini edem. Nso ke nnyịn ikeme ndinam ndin̄wam? Ntak mûnamke ibio ibio ediwaha n̄kese? Dọhọ enye ke imataba ebuana esie. Tie ufan ufan ye in̄wan̄în̄wan̄. Tịn̄ nte ekerede aban̄a ye unana edidọhọ ke enye ọdọn̄ọ ke n̄kan̄ eke spirit. Bụk mme ifiọkutom oro ẹbọpde-bọp m̀mê nti n̄kpọ eken oro esop anamde. Tịn̄ ye ifiopesịt nọ enye ban̄a Mbono District “Mme Isụn̄utom Emem Abasi,” nyụn̄ sịn udọn̄ nọ enye ndidụk. Ndifiak mbuana ye esop ekeme ndin̄wam enye n̄kan n̄kpọ efen ekededi. Dọhọ ke iyasan̄a ye enye ika mme mbonoesop. Nam mbiowo ẹfiọk nte enye akanamde n̄kpọ.
5 Ke ini owo emi mînamke utom aba afiakde odụk mme mbonoesop, eyedi editie enye ke idem etikwo etikwo ke ini osobode mbon oro enye ọkọdiọn̄ọde ke ini edem. Kûbụp ete, “M̀mọ̀n̄ ke afo okodu?” Utu ke oro, dara enye. Buan enye ke nneme. Da enye wụt mbon ẹmi enye mîkọdiọn̄ọke. Tie ye enye ke mbonoesop, okụtde ete ke enye enyene n̄wedikwọ ye n̄wed oro ẹkpepde. Sịn udọn̄ nọ enye ndifiak ndi, nyụn̄ nọ un̄wam edieke oyomde.
6 Sia ẹnyenede ufiop ufiop ima ẹnọ mbon oro ẹsopde usụn̄, Jehovah ye Jesus ẹsidara ke ini mme utọ mbon oro ẹfiakde ẹkop nsọn̄idem ke n̄kan̄ eke spirit. (Mal. 3:7; Matt. 18:12-14) Nnyịn imekeme ndinyene ukem idatesịt oro edieke nnyịn ikụtde unen ke ndin̄wam mbon en̄wen ẹfiak ẹnam n̄kpọ Jehovah.