Nnyịn ‘Ikwọrọ Ikọ Abasi’
1 Ukem nte Bible etịn̄de aban̄a “ukperedem ini,” ekese owo mfịn ẹnyene sụk “enyọn̄-enyọn̄ ido uten̄e Abasi.” (2 Tim. 3:1, 5) Emi edi koro mme adaiso ido ukpono ẹmekpu ndinọ otuerọn̄ mmọ ata ndausụn̄ eke spirit. Mme ọkwọrọ ederi Christendom idaha inọ Bible. Mmọ ẹmek ndikwọrọ mme ikpîkpu ukpepn̄kpọ mbon akwaifiọk ye mme ekpep ukpepn̄kpọ ido ukpono mîdịghe ẹtịn̄ ẹban̄a mme n̄kpọ n̄kaowo ye eke ukaraidem utu ke ndikwọrọ Ikọ Abasi. Ediwak mme adaiso ido ukpono inịmke Bible ke akpanikọ. Mmọ ẹsiwak ndinyịme ukpono ndem ke otu mme andibuana utu ke ndisọn̄ọ nyịre ke in̄wan̄în̄wan̄ ukpepn̄kpọ Bible. Ekese mme ọkwọrọ ederi ikam isikotke ọkpọkpọ enyịn̄ Abasi, ndien mmọ isịnke ubiọn̄ọ ndomokiet ke edisio oro ẹsiode enye ẹfep ke edikabade Bible eyomfịn.
2 Kpa nte ekedide ye mme adaiso ido ukpono ke eyo Jesus, mme ọkwọrọ ederi mfịn ẹkwọrọ ikọ ke ikpîkpu. (Matt. 15:8, 9) Enye edi ukem nte prọfet Amos ekebemde iso etịn̄. Akan̄ odu, “idịghe akan̄ udia, inyụn̄ idịghe nsat-itọn̄ mmọn̄, edi eke edikop ikọ Jehovah.” (Amos 8:11) Ke akande n̄kpọ efen ekededi, mme owo ẹyom udia eke spirit odude ke Ikọ Abasi.
3 Nte Ẹkpeyụhọde Udọn̄ eke Spirit Mme Owo: Paul eketeme Timothy ete ọsọn̄ọ eyịre ke “Edisana N̄wed Abasi, emi ekemede ndinam [owo] ọwọrọ ọniọn̄ ọbọ edinyan̄a,” enye ke ntre ama owụk enye ete ‘ọkwọrọ ikọ Abasi’ ọnọ mbon en̄wen. (2 Tim. 3:14, 15; 4:2) Nte Mme Ntiense Jehovah, ana nnyịn isọn̄ọ iyịre ke se Bible ekpepde ke ini ikwọrọde ikọ, ke ntem ikpebede Uwụtn̄kpọ nnyịn, Jesus, emi ọkọdọhọde ete: “Ukpep-n̄kpọ eke nnọde idịghe Okịm, edi edi eke Andidọn̄ Mi.” (John 7:16) Nnyịn ida Ikọ Abasi nte isọn̄ kaban̄a ukpepn̄kpọ nnyịn koro nnyịn ifiọkde ke enye esịne ọniọn̄ Abasi, ndien iyom mme owo ẹfiọk ebiet emi ntọt oro nnyịn ibuanade ye mmọ otode.—1 Cor. 2:4-7.
4 Mme owo ẹnyene ndibem iso n̄kop akpanikọ otode Bible man ẹkpep ẹban̄a Jehovah ẹnyụn̄ ẹkọn̄ mbuọtidem ke enye. Paul ama ewet nte owụtde ifiọk ete: “Mmọ ẹdinyụn̄ ẹnam didie ẹbuọt idem ye Enye emi mmọ mîkokopke iban̄a? Mmọ ẹdinyụn̄ ẹnam didie ẹkop, ke ọkwọrọ-ikọ mîdụhe?” (Rome 10:14) Ebede ke ndikwọrọ Ikọ Abasi, nnyịn in̄wam mbon en̄wen ẹnyene mbuọtidem ebe ke nnennen ifiọk. Utọ ifiọk oro ekeme ndien esikpụhọde uwem mme owo anam ọfọn akan. Ewetn̄wed owo England oro Charles Dickens ekewet aban̄a Bible ete: “Enye edi mfọnn̄kan n̄wed oro akanam odude m̀mê edidude ke ererimbot, koro enye ekpep fi ata nti ukpepn̄kpọ emi ekemede ndida edibotn̄kpọ ekededi edide owo emi odomode ndinam akpanikọ usụn̄.”
5 Mbon oro ẹkopde biọn̄ akpanikọ eke spirit ẹdi ẹdifiọk ẹte ke odudu Ikọ Abasi ọnọ enye ibetedem. Ko ke 1913, ẹma ẹnọ Frederick W. Franz, nte akparawa ufọkn̄wed ntaifiọk, ekpri n̄wed emi ẹkotde Where Are the Dead? Ke ama okokot ibọrọ Bible ke mbụme emi ye akwa udọn̄, enye ama ọdọhọ ete: “Akpanikọ edi emi.” Etie ediwak miliọn mme oyom akpanikọ ke idem ukem ntre. Ẹyak nnyịn ika iso ndikwọrọ Ikọ emi ke ntịn̄enyịn ye ifịk ndien ke ntem ibuanade idatesịt edikop mbon en̄wen ẹdọhọde ẹte: “Akpanikọ edi emi.”