Wụt Ata Edikere Mban̄a ke Kpukpru Udọn̄ Oro Okụtde
1 Editan̄a Obio Ubọn̄ ke ofụri ererimbot ọmọn̄ ọsọp edisịm utịt, ke oro ebede ẹyesobo kpukpru mbon oro “mîfiọkke Abasi.” (2 Thess. 1:7-9) Ntem, ata edikere mban̄a uwem mbon en̄wen ke onụk ikọt Jehovah ndida etop Obio Ubọn̄ nsịm adan̄a ediwak owo nte mmọ ẹkekeme.—Zeph. 2:3.
2 Kpukpru ọfiọn̄, ẹsibiat ediwak miliọn hour ke ndiyom mbon oro ẹyomde ndikop ‘mbụk eti n̄kpọ.’ (Isa. 52:7) Ke ndinam n̄kpọ mban̄a mme n̄wed ẹmi ẹnọde idahaemi, ediwak owo ẹtobo m̀mê ẹbọ mme idem Enyọn̄-Ukpeme ye Awake! m̀mê ediye uduot ekpri n̄wed oro Nso ke Abasi Oyom Oto Nnyịn? Ata edikere mban̄a inyenede inọ mbon ẹmi ekpenyene ndinụk nnyịn ndinam n̄kpọ mban̄a kpukpru udọn̄ oro ikụtde.—N̄ke 3:27.
3 Nịm Nnennen N̄wetnnịm N̄kpọ: Ẹyenam ekese edieke afo enịmde ọyọhọ ọyọhọ ye nnennen n̄wetnnịm n̄kpọ kaban̄a udọn̄ ye mme n̄wed oro ẹnịmde. Mme utọ ntọt nte enyịn̄ enyeneufọk ye adres, usen ye ini emi afo akawahade, n̄wed oro ekenịmde, ye ibuot nneme oro ekenemede ayan̄wam fi etịm enyene uforo ke ini afiakde aka. N̄ko, edieke ewetde ndusụk ikọ oro enyeneufọk eketịn̄de ke akpa nneme ekenyenede, afo emekeme nditịn̄ n̄kpọ ntụk mmọ mfọn mfọn nte afo ọtọn̄ọde nneme ke mfiakn̄ka.
4 Sọp Ndinam Mme Mfiakn̄ka: Owo ifan̄ ẹmi ẹkebọde fi n̄wed ọfiọn̄ oko ke afo okodomo ndifiak n̄ka mbịne? Nte ediwak urua ẹmebe ye unana edifiak nsobo ekededi? Ata edikere mban̄a nsinsi mfọnọn̄kpọ mmọ ekpenyene ndinụk fi afiak aka usọp usọp nte ekekeme, ẹtoro ẹte edi ke ufan̄ usen ifan̄, man otodo nneme oro osụk edi obufa ke ekikere. Ebede ke ndifiak usọp usọp n̄ka man ọkọkọri udọn̄ mmọ, afo emekeme ndibiat mme ukeme Satan mbemiso enye “editan̄ ikọ eke ẹsuande ke esịt mmọ efep.”—Mark 4:15.
5 Ntịmidem Edi Akpan N̄kpọ: Uforo fo ke ndinam mme mfiakn̄ka ọkọn̄ọ nnennen nnennen ke nte afo etịmde idem mfọn mfọn. Tịm usụn̄ nneme fo mbemiso akade. Page edem Utom Obio Ubọn̄ Nnyịn eke April 1997 ọnọ ekese nneme oro ẹkemede ndida nnam n̄kpọ ye eti unen ke ini afo ọnọde mme magazine m̀mê ediye uduot ekpri n̄wed Oyom. N̄kpọ efen edi ndinyene ndusụk n̄kpọ ke ekikere ndibuana ke ini afo afiakde aka. Nso ke ekeme nditịn̄ ke ini afo anamde n̄kpọ aban̄a udọn̄? Didie ke ekeme nditọn̄ọ ukpepn̄kpọ Bible?
6 Ke ini anamde n̄kpọ aban̄a nneme oro ekenemede aban̄a se ediyomde man ẹnam isọn̄ asana ẹnyụn̄ ẹnam enye edi eti ebiet ndidụn̄, afo emekeme ndidọhọ ete:
◼ “Ke isan̄ oko n̄kedide, nnyịn ima inyịme ite ke oyom usọp usọp edinam mbemiso ẹkemede ndinam isọn̄ edi paradise emem. Ndi afo emekere ke mme owo ẹnyene n̄kpọ emi ẹyomde man ẹnam utom emi? [Bet ibọrọ.] Mbọk tịm fiọk ntak emi oyomde Abasi esịbe odụk mbubehe owo.” Kot Psalm 37:38. Ekem kụbọde ka ukpepn̄kpọ 5 ke ediye uduot ekpri n̄wed Oyom, nyụn̄ da mme ikpehe oro asatde-sat ke ikpehe ekikere 4-5 ndiwụt nte Abasi edisude prọfesi emi. Ka iso ebe ke ndidọhọ ke iyakama ediye uduot ekpri n̄wed oro inịm ukpepn̄kpọ Bible.
7 Edieke afo ekenemede Obio Ubọn̄ Abasi onyụn̄ enịmde ediye uduot ekpri n̄wed “Oyom” ke akpa ediwaha, ke ini afiakde aka afo emekeme nditịn̄ n̄kpọ ntem:
◼ “Ke ini ikenyenede nneme isan̄ oko, nnyịn ima ikụt ke Obio Ubọn̄ Abasi edi ata ukara oro edikarade ofụri isọn̄. Bible owụt ete ke Christ Jesus edidi andikara esie. Nte afo emekeme ndikụt ufọn ndomokiet ke ndinyene orụk ukara ye adausụn̄ emi?” Bet ibọrọ. Kụbọde ediye uduot ekpri n̄wed Oyom ka ukpepn̄kpọ 6. Ke adade mme akpan n̄kpọ ẹmi asatde-sat oto ikpehe ekikere 6-7 ye ndise oro odude ke page 13, wụt se Obio Ubọn̄ Abasi edinamde ọnọ ubonowo ke ini iso. Kot Daniel 2:44, ndien edieke odotde, sio n̄wed Ifiọk wụt nyụn̄ dọhọ ke imọn̄ itọn̄ọ ukpepn̄kpọ Bible.
8 Edieke afo okụtde owo emi ọdọhọde ke mme ido ukpono ererimbot ẹda mme mfịna ẹsọk ubonowo afo emekeme ndibụp ntem ke mfiakn̄ka:
◼ “Ndi akanam afo emekere nte nnyịn ikemede ndifiọk m̀mê ewe ido ukpono enyene unyịme Abasi? [Bet ibọrọ.] Ediye uduot ekpri n̄wed emi Nso ke Abasi Oyom Oto Nnyịn? ọnọ mme n̄kpọ ẹmi ẹdade ẹdiọn̄ọ ido ukpono akpanikọ.” Kụbọde ka ukpepn̄kpọ 13, nyụn̄ sio mme akpan n̄kpọ ition ẹmi ẹwetde ke sịghisịghi ubọkn̄wed ke ikpehe ekikere 3-7 wụt. Afo emekeme ndika iso ebe ke ndidọhọ ete: “Ke adianade ye edikụt ido ukpono akpanikọ, ana nnyịn ifiọk se Abasi oyomde oto nnyịn owo kiet kiet.” Kot John 4:23, 24. Dọhọ ke iyafiak ineme n̄kpọ emi. Kụbọde ka ukpepn̄kpọ 1 ke ediye uduot ekpri n̄wed emi, nyụn̄ nam nte nnyịn isikpepde n̄kpọ wụt.
9 Ke ini afiakde aka man aka iso ke nneme aban̄ade inemesịt ubon, afo emekeme nditịn̄ n̄kpọ ebietde se itienede emi:
◼ “Ke ini nnyịn ikosobode ke akpa, mma mbuana ukpọhọde inemesịt ubon ye afo, emi edide edida item ẹkụtde ke Ikọ Abasi, kpa Bible, nsịn ke edinam. Ke ini edide edisịm edineme n̄kpọ mban̄a mme udọn̄ ubon eyomfịn, nte afo enịm ke akpanikọ nte ke Bible edi n̄kpọ eset m̀mê eke idahaemi?” Bet ibọrọ. Nọ n̄wed Ifiọk. Kụbọde ka ibuot 2, nyụn̄ kot n̄kpọ emi ẹkotde ẹsịn ke ikpehe ekikere 13. Ke akamade mme akpan n̄kpọ ẹdude ke ikpehe ekikere 3, dọhọ ke imọn̄ itọn̄ọ ukpepn̄kpọ Bible ubon.
10 Ebede ke ndinịm nnennen n̄wetnnịm n̄kpọ, ndinam ntịmidem oro oyomde, ye edifiak usọp usọp n̄ka ndikọri udọn̄ mmọ, nnyịn imekeme ndiwụt orụk ima mbọhọidụn̄ oro edidụride mmọ aka usụn̄ edinyan̄a.—Matt. 22:39; Gal. 6:10.