Ndinọ N̄wed Ifiọk Oro Adade Osịm Nsinsi Uwem
1 Nnyịn kpukpru ini imesikop idatesịt iban̄a n̄wed oro, Ifiọk Oro Adade Osịm Nsinsi Uwem. Mbon esịt akpanikọ ẹma n̄wed emi enye onyụn̄ an̄wam ediwak owo ẹda ẹnọ Jehovah ẹnyụn̄ ẹna baptism. Enye eneme akpanikọ ke in̄wan̄în̄wan̄ usụn̄. Ẹtịm n̄wed emi man an̄wam mme owo ẹsọsọp ẹdifiọk nnennen ifiọk akpanikọ. Ke December nnyịn iyafiak inyene ifet ndinọ n̄wed emi ke efakutom nnyịn. N̄ko, ana nnyịn ifiak ika ibịne mbon oro ẹwụtde udọn̄. Nso ke nnyịn ikeme nditịn̄ man idemede udọn̄ inyụn̄ isịn itiat idakisọn̄ inọ mfiakn̄ka?
2 Emi edi nneme oro ekemede ndidemede udọn̄ owo emi mbuọtidem esie ke Abasi ama ekemem:
◼ “Ediwak owo ẹkekọri ẹkponi ye edinịm Abasi ke akpanikọ, edi mmọ ẹkụt idahaemi nte ke mbuọtidem mmimọ idịghe nte ekesidide. Afo ekere ke nso ikeme ndidi ntak kaban̄a oro? [Bet ibọrọ.] Mbuọtidem nnyịn ke Abasi okop odudu ebe ke ndikere mban̄a mme utịben̄kpọ ekondo. [Kot Psalm 19:1.] Enye emi mbet esie ẹkarade mme n̄kpọ ẹmi ẹdude ke enyọn̄ ọnọ nnyịn n̄ko eti ndausụn̄. [Kot Psalm 19:7-9.] Mme ufan̄ikọ ẹmi ẹsọn̄ọ ẹtịn̄ nte edide akpan n̄kpọ ndikpep kpukpru se nnyịn ikemede mban̄a Abasi ye mme uduak esie. [Dụri ntịn̄enyịn wụt ndise ke page 4-5, nyụn̄ kot uwetn̄kpọ ndise oro.] Edieke afo edimade ndibọ ufọn nto akpan ifiọk emi, n̄kpama ndinọ fi n̄wed emi ke etịbe ₦55.”
3 Edieke afo ekenyenede nneme ye owo oro mîkenyeneke mbuọtidem ke Abasi edi okowụtde ndusụk udọn̄, afo emekeme nditọn̄ọ ebe ke ndikụbọde n̄wed oro n̄ka ndise odude ke page 4-5, ọdọhọde ete:
◼ “Ke ini n̄kedide mi isan̄ oko, nnyịn ima ise ediye ndise eke ndiye n̄kann̄kụk ẹmi. Uwetn̄kpọ ndise emi obụp ete, ‘Nso ke ana afo anam man adara mmọ?’ Didie ke afo ọkpọbọrọ oro? [Bet ibọrọ.] Bible owụt kiet ke otu akpan n̄kpọ oro ẹnamde owo odot in̄wan̄în̄wan̄. [Kot John 17:3.] Ifiọk edi akpan n̄kpọ ọnọ nnyịn ndinyene mbuọtidem ke Abasi. Ata eti usụn̄ emi nnyịn ikemede ndikpep se oyomde nnyịn ifiọk edi ke ndikpep Bible ke nde ke nde.” Kụbọde ka ibuot 1 nyụn̄ wụt ndusụk ekikere oro ẹnọde nsịnudọn̄ ke ikpehe ekikere 1-5. Nam nte ẹnịmde ukpepn̄kpọ Bible an̄wan̄a, nyụn̄ dọhọ ke iyafiak idi kaban̄a nneme efen efen.
4 Ke enyenede ndusụk akama-mfụhọ mbụk n̄kpọntịbe ke ekikere, afo emekeme ndidọhọ ete:
◼ “Eyedi afo ama okop aban̄a [tịn̄ n̄kpọntịbe oro]. Ndi akanam afo emekere m̀mê Abasi enen̄ede ekere aban̄a ukwan̄ikpe ye ndutụhọ oro nnyịn ikụtde ẹmi ẹkande nnyịn ẹkụk m̀mê ẹmi nnyịn ikam isobode ke idem nnyịn? [Bet ibọrọ.] Bible ọsọn̄ọ etịn̄ ọnọ nnyịn ete ke Abasi ama nnyịn ye nte ke enye ayan̄wam nnyịn ibọhọ mme ini nnanenyịn.” Kot mme itie ke Psalm 72:12-17. Kụbọde n̄wed Ifiọk ka page 70, nyụn̄ wụt nte ke enye ọbọrọ mbụme oro ediwak miliọn owo ẹbụpde, Ntak emi Abasi ayakde ndutụhọ odu? Ekem ka iso ebe ke ndidọhọ, “Afo oyokụt ibọrọ Bible ke mbụme oro nte ọnọde ata ndọn̄esịt. N̄kpama ndinọ fi n̄wed emi ke etịbe ₦55 man afo ekeme ndikot mban̄a oro ke idemfo.”
5 Edieke afo afiakde aka man aka iso ke nneme ke ntak emi Abasi ayakde ndutụhọ odu, afo emekeme ndidọhọ ete:
◼ “Isan̄ oko n̄kedide mi, nnyịn ima ineme iban̄a [se ededi oro n̄kpọntịbe oro ekedide]. Mbụme ama edemede aban̄a ntak emi Abasi ayakde ekese ndutụhọ odu ke ererimbot. Nso ubiere ke afo ekedisịm? [Bet ibọrọ.] Edi n̄kpọ nsịnudọn̄ ndifiọk nte ke idịghe Abasi edi ntak mme utọ akama-mfụhọ idaha ẹmi.” Kụbọde ka page 71-72 ke n̄wed Ifiọk, nyụn̄ neme ndusụk ekikere N̄wed Abasi ẹmi ẹsịnede ke ikpehe ekikere 3-5. Dọhọ ke iyafiak idi man inam an̄wan̄a ntak emi nnyịn ikemede nditịm nnịm nte ke Abasi ndiyak ndutụhọ odu ọmọn̄ ọsọp ndisịm utịt.
6 Edieke afo osobode ete m̀mê eka, afo emekeme ndiwụk ntịn̄enyịn ke ubon:
◼ “Ekese ete ye eka ẹnyịme nte ke ediwak mfịna ẹdu ke ndidomo ndimụm uwem inemesịt ubon n̄kama. Nso ke afo okụt nte edide akpan n̄kpọ ubiọn̄ọ? [Bet ibọrọ.] Ata ediwak nnyịn imanam ofụri se ikemede, edi nnyịn nte ido edide imesidara un̄wam oro edinamde nnyịn inyene nti utịp. Bible ọnọ ata eti item. [Kot mme itie ke Colossae 3:12, 18-21.] Bible enyene ata ekese nditịn̄ ke ibuot nneme emi, nte ẹwụtde ke ibuot 15 ke n̄wed emi, emi ibuotikọ edide ‘Ndibọp Ubon Oro Okponode Abasi.’ Enye odụn̄ọde item oro ẹnọde ke Bible owụtde nte ẹkemede ndifịghede mfịghe ndọ ye nte ẹkemede ndiyọ mme mfịna ẹmi nditọ nnyịn ẹsobode. Mmenịm ke akpanikọ nte ke afo ayama ndikot enye.”
7 Edieke afo afiakde aka ndise ete m̀mê eka emi ekerede aban̄a mme mfịna ubon, afo emekeme ndidọhọ ntem:
◼ “Mmọfiọk nte afo, nte ete m̀mê eka, oyom se ifọnde ikan ọnọ nditọ fo. Sia mîdịghe mmemmem n̄kpọ ndikpeme mmọ nsio ke kpukpru n̄kpọ oro ẹdiọkde, afo enyene ndikpep mmọ nte ẹyọde mme mfịna uwem. Afo ekere ke ẹkeme ndinam oro didie? [Bet ibọrọ.] Kiet ke otu ata akpan n̄kpọ emi ete m̀mê eka ekemede ndinọ edi ukpep.” Kụbọde ka page 145-146 ke n̄wed Ifiọk, nyụn̄ dụri ntịn̄enyịn ka eti item Bible, owụtde nte enye edide akpan n̄kpọ ye nte ekemede ndidi edidiọn̄ ke nditiene enye. Dọhọ ke iyafiak idi man inam iwụt nte ẹkemede ndida n̄wed emi n̄kpep ekese mban̄a edinyene inem inem uwem ubon.
8 Ke akpanikọ n̄wed emi edi utịbe utịbe ndutịm otode Jehovah man anam utom editan̄ mbok “awara” ke ukperedem ini emi. (Isa. 60:22) Edieke nnyịn idade enye inam n̄kpọ uforo uforo, nnyịn imekeme ndinọ ifiọk oro ekemede ndin̄wam owo enyene nsinsi uwem.