Mme Ntiense Jehovah—Mme Ata Ọkwọrọ Eti Mbụk
1 Jesus Christ ama ọnọ kpukpru mbet esie mbiomo edikwọrọ eti mbụk, etemede mmọ san̄asan̄a ete ẹkwọrọ eti mbụk Obio Ubọn̄. (Matt. 24:14; Utom 10:42) Mme akpa mbet esie ẹma ẹnịm uwụtn̄kpọ ke emi nte mmọ ẹketịn̄de ẹban̄a Obio Ubọn̄ ye unana edikpa mba—idịghe ke mme itie utuakibuot kpọt edi ke ebiet ekededi oro mmọ ẹkesobode mme owo ke an̄wa ye ke ndisan̄a ke ufọk ke ufọk. (Utom 5:42; 20:20) Nte Mme Ntiense Jehovah mfịn, nnyịn imowụt ke nnyịn idi mme ata Christian ọkwọrọ eti mbụk, ikwọrọde etop Obio Ubọn̄ ke idụt 232 inyụn̄ inịmde se ibede miliọn owo kiet baptism ke isua ita kpọt ẹmi ẹkebede! Ntak emi utom edikwọrọ eti mbụk nnyịn okụtde unen ntre?
2 Eti Mbụk Esịn Idem Aduai Nnyịn: Mme ọkwọrọ eti mbụk ẹdi mme ọkwọrọ ikọ, m̀mê mme isụn̄utom, eti mbụk. Ke ntre, nnyịn imenyene aduai-owo-idem ifet eke edinọ ntọt Obio Ubọn̄ Jehovah—kpa ata n̄kukụre eti mbụk oro ẹkemede ndinọ ubonowo oro odude ke nnanenyịn. Nnyịn imenyene ifiopesịt iban̄a mbemiso ifiọk oro nnyịn inyenede iban̄a obufa heaven oro edidade edinen ido akara obufa isọn̄ emi mme anam-akpanikọ ubonowo ke Paradise oro edide, ẹnamde. (2 Pet. 3:13, 17) Nnyịn idi n̄kukụre mbon oro inyịmede idotenyịn emi, nnyịn imonyụn̄ inyene ọkpọsọn̄ udọn̄ ndibuana enye ye mbon en̄wen.
3 Ata Ima Onụk Nnyịn: Edikwọrọ eti mbụk edi utom unyan̄a uwem. (Rome 1:16) Ntak edi oro nnyịn ikopde akwa idatesịt ke ndisuan etop Obio Ubọn̄. Nte mme ata ọkwọrọ eti mbụk, nnyịn imama mme owo, ndien oro onụk nnyịn ndibuana eti mbụk ye mmọ—mme ubon, mme mbọhọidụn̄, mme ọdiọn̄ọ nnyịn, ye ediwak owo eken nte ikekeme. Ndinam utom emi ke ofụri ukpọn̄ edi kiet ke otu mfọnn̄kan usụn̄ ndiwụt ata ima oro inyenede inọ mmọ en̄wen.—1 Thess. 2:8.
4 Spirit Abasi Ọnọ Nnyịn Ibetedem: Ikọ Abasi ọsọn̄ọ ọnọ nnyịn ete ke ini inamde utom nnyịn eke editọ ye edibọk n̄kpasịp Obio Ubọn̄ ke mmọn̄, edi Jehovah ‘ọnọ ọkọri.’ Oro edi ukem ukem se nnyịn ikụtde adade itie ke esop nnyịn mfịn. (1 Cor. 3:5-7) Spirit Abasi ọnọ nnyịn ibetedem ke utom edikwọrọ eti mbụk nnyịn onyụn̄ ọnọ nnyịn akwa unen.—Joel 2:28, 29.
5 Ke ikerede iban̄a nsịnudọn̄ oro ke 2 Timothy 4:5 ‘ndinam utom ọkwọrọ gospel’ ndien ke ntak ima oro inyenede inọ kpukpru owo, emi akpakam onụk nnyịn ndibuana aduai-owo-idem eti mbụk Obio Ubọn̄ emi ke kpukpru ifet, inyenede mbuọtidem nte ke Jehovah ayaka iso ọdiọn̄ utom nnyịn.