Oyom Mme Mbọhọidụn̄ Nnyịn Ẹkop Eti Mbụk
1 Uduak Abasi edi yak “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.” (1 Tim. 2:4) “Kpukpru owo” ẹsịne kpukpru mbọhọidụn̄ nnyịn. Ndida eti mbụk nsịm mmọ oyom ikpụhọ ida ekekem ke nneme nnyịn inyụn̄ inyene udọn̄ iban̄a se ikemede ndidi n̄kpọ udọn̄ inọ owo kiet kiet oro nnyịn isobode.—1 Cor. 9:19-23.
2 Esop Jehovah ọmọnọ mme n̄kpọutom ẹmi ẹkemede ndin̄wam nnyịn ndisịm esịt mbon oro “ẹkenịmde ẹnọ nsinsi uwem.” (Utom 13:48) Ke ọfiọn̄ July esịm September, nnyịn idinọ otu n̄wed iba m̀mê inan̄ ke ata usụhọde etịbe. N̄wed Mi eke Mme Mbụk Bible esịne ke otu n̄wed ẹmi. N̄wed emi ekeme ndin̄wam n̄kpri ye ikpọ ndifiọk se Bible ekpepde. Ẹyak nnyịn ise nte nnyịn ikemede ndida n̄wed emi nnam n̄kpọ ke July esịm September ke ndise mban̄a mme udọn̄ eke spirit mme mbọhọidụn̄ nnyịn.
3 Afo oyokụt mme ekikere ẹmi ẹkemede ndinyene ufọn ke ini ọnọde n̄wed Mme Mbụk Bible ke idak isọn̄ emi. Ekikere kiet kiet esịne (1) mbụme oro anamde ẹkere n̄kpọ ndida ntọn̄ọ nneme, (2) ebiet ẹkemede ndikụt mme n̄kpọ ndida nnyene nneme ke n̄wed emi, ye (3) itie N̄wed Abasi emi odotde oro ẹkemede ndikot ke ini nneme oro. Afo emekeme ndida mme ikọ idemfo nyọhọ nneme eken oro osụhọde, nte ekemde ye edinam owo oro.
Nte isọn̄ ayakabade paradise tutu amama?—Mbụk 71; Edi. 21:3, 4.
Nte akanam afo emekere nte ẹkemede ndidọn̄ owo oro ọduọkde owo ima ke n̄kpa esịt?—Mbụk 92; John 5:28, 29.
Afo ekere ke nso idotenyịn idu ndin̄wam mbon oro ẹdọn̄ọde? —Mbụk 96; Isa. 33:24.
Nte akanam afo emekere se Jesus Christ anamde idahaemi?—Mbụk 104; Col. 1:13, 14.
Nte idiọkido oyokụre ke ererimbot tutu amama?—Mbụk 114; Ps. 37:9, 10.
Mmanie ke Abasi edikpeme man ẹdụn̄ ke Paradise?—Mbụk 116; 1 John 2:17.
4 Mme N̄wed Eken: Nsio nsio n̄wed eken ẹdu oro ẹsịnde ke san̄asan̄a n̄wed ẹnọde ke July esịm September. Ke ebiet ekededi odotde, ẹkeme ndinọ mme owo oro nnyịn isobode mme n̄wed eken oro ẹdide ubak san̄asan̄a n̄wed ẹnọde. Afo emekeme ndifiak ndụn̄ọde mme ekikere ẹnọde ke page 21-24 ke n̄wed Reasoning m̀mê page 13-16 ke ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible, onyụn̄ etịm mbio mbio nneme oro ẹkemede ndidemede udọn̄ mme owo ẹmi.
5 Uduak nnyịn ke utom ukwọrọikọ kpukpru ini ekpedi nditọn̄ọ ukpepn̄kpọ Bible, edide ke akpa ediwaha m̀mê ke mfiakn̄ka oro etienede. Ke ntak oro, idem ọkpọkọm enyeneufọk ibọhọ n̄wed nnyịn ndomokiet, nnyịn imekeme ndidiomi ndifiak mbịne enye ye ekikere editọn̄ọ ukpepn̄kpọ Bible. Edieke mûkọtọn̄ọke-tọn̄ọ ukpepn̄kpọ ke kiet ke otu mmọ, be dụk ediye uduot ekpri n̄wed Oyom m̀mê n̄wed Ifiọk usọp usọp nte ekekeme.
6 Ke uwụtn̄kpọ Jesus aban̄ade owo Samaria emi ekenyenede edu mbọhọidụn̄, enye ama anam an̄wan̄a nte ke ata mbọhọidụn̄ edi kiet oro owụtde ima ye mfọnido ndin̄wam mbon en̄wen ke nnanenyịn. (Luke 10:27-37) Mme mbọhọidụn̄ nnyịn ẹdu ke nnanenyịn eke spirit. Oyom mmọ ẹkop eti mbụk. Ẹyak nnyịn ibiom mbiomo edibuana enye ye mmọ, ntem iwụtde idem nnyịn nte idide mme ata mbet Jesus Christ.—Matt. 24:14; Gal. 5:14.
7 Nnyịn imọkọm Jehovah kaban̄a Edisana N̄wed Abasi emi ebede ke enye “owo Abasi enyene ọyọhọ ifiọk, onyụn̄ eben̄e idem ke kpukpru nde ndinam eti utom ekededi.” (2 Tim. 3:17) Nnyịn imowụt esịtekọm n̄ko iban̄a mme utọ n̄wed nte n̄wed Mme Mbụk Bible ye mme n̄wed eken oro ẹsịnede ke san̄asan̄a n̄wed ẹnọde. Nnyịn imọdiọn̄ọ ufọn mmọ inyụn̄ ikop inemesịt nte ke nnyịn imekeme ndiyak mmọ nnọ mbon en̄wen ke ọfiọn̄ July esịm September.