Mme Asiakusụn̄ Ẹn̄wam Mbon En̄wen
1 Jesus ọkọdọhọ ete: “Ke akpanikọ idọk okpon, edi mme anam-utom iwakke; ẹben̄e ndien Enyene-idọk, ẹte, Enye osio mme anam-utom ọdọn̄ ẹdi ke idọk Esie.” Sia mbon idọk eke akpa isua ikie ẹkedide ibat ibat ẹkenyụn̄ ẹnyenede akamba efakutom ndikụre, Jesus ekpeketeme mmọ ndida eti mbụk nsịm adan̄a ediwak owo nte ẹkekeme ebe ke ndidọn̄ mmọ ẹsan̄a owo kiet kiet. Utu ke oro, enye ama “ọdọn̄ mmọ ẹsan̄a iba iba.” (Luke 10:1, 2) Ntak ẹsan̄ade iba iba?
2 Mme mbet oro ẹkedi mbufa ikonyụn̄ inyeneke mbufiọk. Ke ndisan̄a ọtọkiet mmọ ẹma ẹkeme ndikpep n̄kpọ nto nnyụn̄ nsịn udọn̄ nnọ kiet eken. Nte Solomon ọkọdọhọde, “owo iba ẹfọn ẹkan owo kiet.” (Eccl. 4:9, 10) Idem ke ẹma ẹkebọ edisana spirit ke Pentecost 33 E.N., Paul, Barnabas, ye mbon eken ẹma ẹsan̄a ye mme ekemmọ andinịm ke akpanikọ ẹka utom ukwọrọikọ. (Utom 15:35) Nso ifet ke anaedi ndusụk mmọ ẹkenyene ntem ndikọbọ ukpep ọkpọkpọ nto mme utọ owo ẹmi ẹnyenede ukeme mi!
3 Eti Ndutịm Unọ Ukpep: Ukem nte esop eke akpa isua ikie, esop Christian eyomfịn edi esop ukwọrọikọ. Enye n̄ko esinọ nnyịn ukpep. Nte owo kiet kiet, udọn̄ ofụri esịt nnyịn ekpedi ndinọ eti mbụk uforo uforo nte ikekeme. Man mme asuanetop efen efen ẹkeme ndikọri uforo mmọ, un̄wam odu.
4 Ke Ufọkn̄wed Utom Obio Ubọn̄ oro ẹkenịmde ndondo emi, N̄ka ama ọtọt ndutịm oro ẹnamde ẹnọ mme asiakusụn̄ ndin̄wam mbon en̄wen ke an̄wautom. Ndi udọn̄ odu kaban̄a emi? Ih, odu. Se ibede mme asuanetop miliọn kiet ẹma ẹna baptism ke isua ita ẹmi ẹkebede, ndien ediwak ke otu ẹmi ẹyom ukpep man ẹtịm ẹnyene uforo ke utom ukwọrọikọ mmọ. Mmanie ke ẹkeme ndida nyọhọ udọn̄ oro?
5 Mme asiakusụn̄ uyọhọ ini ẹkeme ndin̄wam. Esop Jehovah ọnọ mmọ ekese item ye ukpep. Mme asiakusụn̄ ẹsibọ ukpep oro ẹnamde ekekem ye udọn̄ mmọ ke Ufọkn̄wed Utom Usiakusụn̄ eke urua iba. Mmọ n̄ko ẹsibọ ufọn ẹto mme mbono oro ẹnyenede ye mme esenyịn circuit ye district, ọkọrọ ye ndausụn̄ oro ẹbọde ẹto mbiowo. Okposụkedi mîdịghe kpukpru mme asiakusụn̄ ẹnyene mbufiọk nte Paul ye Barnabas ẹkenyenede, mmọ ẹmebọ nti ukpep oro mmọ ẹkopde inemesịt ndibuana.
6 Mmanie Ẹdibọ Ufọn? Ndi mbufa mme asuanetop ye mbon oro ẹnade baptism obufa kpọt ẹdibuana ke ndutịm emi? Idịghe ke baba usụn̄ kiet! N̄kpri ye n̄kani owo ẹdu ẹmi ẹma ẹkediọn̄ọ akpanikọ ke ediwak isua edi ẹmi ẹdimade ndibọ un̄wam ke ndusụk ikpehe utom ukwọrọikọ. Ndusụk owo ẹsinam ọfọn etieti ke ndinịm n̄wed edi ẹnyene mfịna ndinam mme mfiakn̄ka m̀mê nditọn̄ọ mme ukpepn̄kpọ Bible. Mbon eken ẹkeme nditọn̄ọ ukpepn̄kpọ Bible mfefere mfefere edi ẹkụt nte ke nditọ ukpepn̄kpọ mmọ inamke n̄kọri. Nso ibiọn̄ọ mmọ? Ẹkeme ndiyom mme asiakusụn̄ oro ẹnyenede mbufiọk ndinọ un̄wam ke mme afan̄ ẹmi. Ndusụk mme asiakusụn̄ ẹnyene uforo ke ndikọri udọn̄, nditọn̄ọ mme ukpepn̄kpọ Bible, nnyụn̄ mmen mbufa owo n̄wụt esop. Ifiọkutom mmọ ayan̄wam ke obufa ndutịm emi.
7 Ndi afo omokụt nte ndutịm fo mîsiyakke fi ọnọ mme mbono an̄wautom esop ofụri ini ibetedem adan̄a nte akpamade ndinọ? Asiakusụn̄ ekeme ndisan̄a ye afo ke ndusụk ini oro mme asuanetop eken mîdụhe.
8 Ẹyom Eti Edidianakiet: Ikaba ke isua, mbiowo ẹyenam ndutịm ẹnọ mme asuanetop oro ẹyomde ọkpọkpọ un̄wam ndibuana ke ndutịm Mme Asiakusụn̄ Ẹn̄wam Mbon En̄wen. Edieke afo enyịmede ndibọ utọ un̄wam emi, ka bịne asuanetop edide asiakusụn̄ oro ẹnọde an̄wam fi, ẹnam ata ata ndutịm utom, ẹnyụn̄ ẹsọn̄ọ ẹyịre ke enye. Nịm ediomi kiet kiet oro ẹnamde. Nte ẹnamde utom ọtọkiet, se mme uforo uforo usụn̄ ndinọ eti mbụk. Dụn̄ọde ntak emi ndusụk usụn̄ nneme ẹnyenede uforo. Kere ban̄a mme ekikere oro asuanetop edide asiakusụn̄ ekemede ndinọ ke ndifori ukwọrọikọ fo. Nte afo adade mme n̄kpọ ẹmi ekpepde esịn ke edinam, afo ye mmọ en̄wen ẹyekụt n̄kọri ke utom fo. (Se 1 Timothy 4:15.) Ẹnam utom ọtọkiet adan̄a ediwak ini nte ẹkekeme, ẹbuanade ke kpukpru ikpehe utom ukwọrọikọ, esịnede unọ ikọ ntiense ido nneme edi ọnọde ntịn̄enyịn ke akpan ikpehe ekededi oro afo oyomde ọkpọkpọ un̄wam.
9 Esenyịn utom enyene udọn̄ ke n̄kọri oro ẹdinamde. Ke ini ke ini, enye oyodụn̄ọde ye ada Ukpepn̄kpọ N̄wed Esop ndise nte afo ọbọde ufọn oto ndutịm emi. Esenyịn circuit n̄ko ayan̄wam fi ukem ntre ke ini enye edide ndise esop fo.
10 Jehovah oyom ikọt esie ẹbọ ukpep ẹnyụn̄ “ẹben̄e idem . . . ndinam eti utom ekededi.” (2 Tim. 3:17) Se ndutịm Mme Asiakusụn̄ Ẹn̄wam Mbon En̄wen nte eti ndutịm ndin̄wam mbon oro ẹnyenede udọn̄ ndikọri ukeme mmọ ndikwọrọ ikọ. Edieke enyenede ifet ndibuana ke enye, nam ntre ye esịtekọm, nsụhọdeidem, ye idatesịt.