Mme Esenyịn Oro Ẹdade Usụn̄—Esenyịn Utom
1 Esenyịn utom enen̄ede enyene udọn̄ ke kpukpru n̄kpọ ẹmi ẹnyenede ebuana ye n̄kọri utom ukwọrọikọ ke efakutom oro ẹnọde esop. Enye ke ntem enyene akpan udeme ke ndin̄wam nnyịn iyọhọ mbiomo nnyịn ndikwọrọ eti mbụk. Nte ifịk ifịk ọkwọrọ eti mbụk, enye esida usụn̄ ke nditịm kpukpru n̄kpọ ẹnyenede ebuana ye utom an̄wautom. Nte andikpep emi enyenede ukeme, enye esin̄wam mme asuanetop kiet kiet ẹkọri uforo mmọ ke utom ukwọrọikọ.—Eph. 4:11, 12.
2 Ebiowo emi ese enyịn nnennen ke utom mme asan̄autom unamutom ẹnọde ndise mban̄a mme n̄wed, magazine, ye mme efakutom. Edi mbiomo esie ndikụt nte ke mme n̄wed, magazine, ye mme babru utom oro ekemde ẹdu ẹnọ nnyịn ndida nnam utom kpukpru ọfiọn̄. Ini kiet ke isua enye esidụn̄ọde n̄kpọ udọn̄ n̄wed efakutom man ese mme adres ufọk oro ẹkpande nnyịn ndiwaha, onyụn̄ ọnọ nditọete oro ẹdotde ndika mme ufọk oro.
3 Edi mbiomo esenyịn utom ndise enyịn ke nsio nsio usụn̄ ukwọrọikọ, esịnede ndinọ ikọ ntiense ke itie mbubehe, ke efak, ye ke urụk ukopikọ. Enye esidu ke edidemede ndinam nti ndutịm edisop idem nnọ utom ukwọrọikọ ke ofụri urua, esịnede mme usen nduọkodudu. Enye esiwụt ata udọn̄ ke utom edinịm ukpepn̄kpọ Bible. Enye esiyom mme usụn̄ ndinọ mbon oro mînamke utom kpukpru ini ye mbon oro mînamke utom aba un̄wam eke spirit ke utom ukwọrọikọ. Enye enyene ọkpọsọn̄ udọn̄ aban̄a utom mme asiakusụn̄, onyụn̄ ese enyịn ke ndutịm Mme Asiakusụn̄ Ẹn̄wam Mbon En̄wen.
4 Nte andibuana ke Kọmiti Utom Esop, esenyịn utom esinọ ekikere aban̄a ukpụhọde ekededi ke mme otu Ukpepn̄kpọ N̄wed Esop. Ke ini enye edide edise otu emi afo odude, kụt ete omodụk onyụn̄ abuana ye enye ke utom an̄wautom.
5 Kpukpru owo ke esop ẹkpenyene ndibere unyịme unyịme ye ndausụn̄ oro esenyịn utom ọnọde. Emi ayan̄wam nnyịn ikọri uforo nnyịn ke utom unam mbet inyụn̄ inyene akwa idatesịt ke utom nnyịn.