Nnyịn Inyene Ndiwaha Ndien Ndien
1 Ndi afo ama anam n̄kpọ nte ọfọnde ke akpa ini emi owo eketịn̄de ikọ ye afo aban̄a eti mbụk? Mîdịghe ntre, anaedi afo omowụt esịtekọm nte ke Mme Ntiense Jehovah ẹma ẹwaha ẹtiene fi ndien ndien tutu afo enyịme ukpepn̄kpọ Bible ke akpatre. Ọfọn ndikere mban̄a oro ke ini anamde utom ndien ndien ke efakutom oro ẹdemede ẹnọ fi.
2 Uwem mme owo ke okpụhọrede kpukpru ini. Mmọ ẹsisobo mbufa mfịna m̀mê idaha, ẹkop mme n̄kpọntịbe oro ẹtịmerede owo esịt ke n̄kann̄kụk m̀mê ke ererimbot, ẹsobo idiọk idaha ke ndutịm uforo, mîdịghe ẹsobo udọn̄ọ m̀mê n̄kpa ke ubon. Mme utọ n̄kpọ ntre ẹkeme ndinam mmọ ẹyom ndikpep mban̄a ntak nnanenyịn ẹmi. Nnyịn inyene nditịm mfiọk mme n̄kpọ oro ẹfịghede mme owo ke ekikere ndien ekem inam n̄kpọ iban̄a ke ndinọ etop ndọn̄esịt.
3 Emi Edi Utom Edinyan̄a: Kere ban̄a mbonutom edinyan̄a ke ebiet emi afanikọn̄ etịbede. Idem okposụkedi ndusụk ẹkemede ndiyom mme owo ke ikpehe oro ẹkụtde ibat ibat mme andibọhọ, mmọ itekke ke ifịk inyụn̄ itre ke ntak mme ekemmọ anamutom ẹkụtde ediwak mme andibọhọ ke ebiet efen. Owo itreke utom edinyan̄a nnyịn kan̄a. Ke isua kiet kiet, ke ẹkụt ediwak tọsịn mme owo ke mme itie ikie oro ẹyomde ndibọhọ “akwa ukụt.”—Edi. 7:9, 14.
4 “Owo ekededi eke edisemede okot enyịn̄ Jehovah ọyọbọhọ.” (Rome 10:13-15) Mme ikọ ẹmi ẹkpenyene ndinam nnyịn owo kiet kiet ikụt ufọn edikọbọ ke ukwọrọikọ. Tọn̄ọ nte ẹketọn̄ọ ndikụre efakutom nnyịn, nditọwọn̄ ẹkọri ẹnyụn̄ ẹkponi ẹkem nditịm n̄kere mban̄a ini iso mmọ ye uduak uwem. Nnyịn ikemeke ndidiọn̄ọ m̀mê anie edikpan̄ utọn̄ ke akpatre. (Eccl. 11:6) Ediwak mbon ẹmi ẹkedide mme andibiọn̄ọ ke akpa ẹma ẹnyịme akpanikọ. Utom nnyịn idịghe ndibiere ikpe nnọ mme owo, edi ndika iso nnọ mmọ ifet ndikop nnyụn̄ ndi se ẹnyan̄ade ẹsio ke akani ererimbot emi. Nte mme akpa mbet Jesus ẹkenamde, ana nnyịn ‘itiene’ mme owo inyụn̄ idomo ndidemede mmọ udọn̄ nnọ etop Obio Ubọn̄.—Matt. 10:6, 7.
5 Akpanikọ oro nte ke usụn̄ ke osụk eberede ọnọ nnyịn ndikwọrọ ikọ edi uyarade mbọm Jehovah. (2 Pet. 3:9) Nte nnyịn iyakde mbon efen ẹkop etop oro ndien ndien, nnyịn iwụt ima Abasi, ndien ke usụn̄ emi nnyịn itoro enye.