Bọp Uwem Fo Kanade Utom Jehovah

¹ Jesus ekemen mme andikpan̄ utọn̄ nnọ enye odomo ye orụk ọbọp-ufọk iba. Kiet ọkọbọp usụn̄ uwem esie odori ke enyọn̄ itiat nsụkibuot nnọ Christ ndien ama ekeme ndisọn̄ọ nda mbiọn̄ọ oyobio ubiọn̄ọ ye ukụt. Enye eken ọkọbọp odori ke ntan ibụk ibụk ntụtutọn̄ ndien ikekemeke ndisọn̄ọ nda ke ini mfịghe ekedide. (Matt. 7:24-27) Sia idude uwem ke utịt editịm n̄kpọ emi, nnyịn imosobo oyobio ediwak afanikọn̄. Mme n̄kpọ ẹwụtde ke akwa ukụt emekpere ke ẹwụt idem usọp usọp. Nte nnyịn iyeme ime tutu esịm akpatre ye unana n̄kpọ ndisehede mbuọtidem nnyịn? (Matt. 24:3, 13, 21) Enen̄ede ọkọn̄ọ ke nte nnyịn ibọpde uwem nnyịn idahaemi. Ntem edi usọp usọp n̄kpọ ndibụp idem nnyịn, ‘Nte ami ke nsọn̄ọ mbọp uwem Christian mi ndori ke utom nsụkibuot nnamde nnọ Abasi?’

² Edi nso ke ọwọrọ ndibọp uwem nnyịn n̄kanade utom Jehovah? Enye ọwọrọ ndinam Jehovah enyene akpan itie ke uwem nnyịn. Enye abuana ediwụk ekikere ke Obio Ubọn̄ nte akpan udọn̄ nnyịn. Enye abuana ndikop item nnọ Abasi ke kpukpru edinam uwem eke usen ke usen nnyịn. Enye oyom nnyịn isịn ofụri esịt nnyịn ke ukpepn̄kpọ Bible idemowo, eke ubon, ye eke esop ye ke an̄wautom, inamde ẹmi ẹdi mme ebeiso n̄kpọ. (Eccl. 12:13; Matt. 6:33) Utọ edinam n̄kopitem emi esisụn̄ọ ke okopidem mbuọtidem, emi mîdiwụreke ke osobode oyobio afanikọn̄ oro ekemede ndiwọrọ.

³ Edi n̄kpọ inemesịt ndikụt ediwak miliọn owo ke mbuọtidem ẹbọpde uwem ye idotenyịn ini iso mmọ ẹdori ke utom Abasi, ukem nte Jesus akanamde. (John 4:34) Mmọ ẹsọn̄ọ ẹyịre ke mme ndutịm edinam ukara Abasi ẹmi ẹnyenede iwụk ẹnyụn̄ ẹbọ uwak edidiọn̄. Eka kiet ama anam an̄wan̄a nte enye ye ebe esie ẹkekụtde unen ndibọk nditọiren mmọ iba ndinam n̄kpọ Jehovah: “Nnyịn ima iyọhọ uwem nnyịn ye akpanikọ—ikade kpukpru ikpọ mbono, itịmde idem inyụn̄ idụkde mme mbono esop, inyụn̄ inamde utom an̄wautom edi ubak uwem nnyịn.” Ebe esie ama adian do ete: “Akpanikọ idịghe ubak uwem nnyịn, enye edi uwem nnyịn. Kpukpru n̄kpọ eken ẹkọn̄ọ ke enye.” Nte afo ukem ntre emenịm utom Jehovah ke ata ebeiso n̄kpọ ke ubon fo?

⁴ Nyene Ndutịm eke Urua ke Urua Oro Ẹkemede Nditiene: Esop Jehovah aman̄wam nnyịn nditiene eti edinam eke spirit edide eke ofụri ini ebe ke ndidiomi mbono esop ition ke urua. Mme Christian ẹmi ẹbọpde uwem mmọ ẹkanade ke utuakibuot Jehovah ẹdiomi ndutịm ubon ye eke idịbi udia mmọ ke usụn̄ oro ẹkemede ndidụk kpukpru akpan mbono esop ẹmi. Mmọ iyakke mme n̄kpọ ẹmi mîdịghe akpan n̄kpọ ẹbiọn̄ọ mmọ ndidụk kpukpru ini.—Phil. 1:10; Heb. 10:25.

⁵ Mme Christian ẹmi ẹkọride ẹsịm ọyọhọ idaha ẹdiọn̄ọ nte ke ukem nte edide akpan n̄kpọ ndidia udia ke akpan ini kpukpru usen, ntre ke edi akpan n̄kpọ ndinam eti ndutịm kaban̄a ukpepn̄kpọ idemowo ye eke ubon, esịnede nditịm idem nnọ mme mbono esop. (Matt. 4:4) Nte afo emekeme ndisio ini ke nsụhọde n̄kaha minit 15 m̀mê 20 ke usen kiet kiet nnịm nnọ ọkpọkpọ ukpepn̄kpọ? Ukpọhọde idịghe ndiyak mme n̄kpọ eken ẹda ini ẹsiode ẹnịm ẹnọ ukpepn̄kpọ. Nam enye edi eti ido. Emi ekeme ndiyom afo abak edemede akan nte esidemerede idahaemi. Owo 17,000 ẹdide mme andibuana ke ubon Bethel ke ofụri ererimbot ẹsibak ẹdemede ke usenubọk man ẹneme itien̄wed eke usen. Edi akpanikọ, ndibak ndemede ke usenubọk oyom edidụk idap ke eti ini ke okoneyo man ẹkeme nditọn̄ọ ndan̄nsiere nte odotde ye nsọn̄idem.

⁶ Edieke afo edide ibuot ufọk, nam usio-ukot ndidiomi nnyụn̄ nnam ndutịm utom ukara Abasi eke ubon fo. Ndusụk ubon ẹsikot Bible, Yearbook, m̀mê n̄wed efen ọtọkiet nte mmọ ẹduọkde odudu ke ẹma ẹkedia udia mbubịteyo ẹma. Ediwak ete ye eka oro ẹkụtde nte nditọ mmọ ẹkọride ẹkabade ẹdi mme Christian ẹmi ẹsọn̄de idem ke n̄kan̄ eke spirit ẹdọhọ ẹte ke ntak kiet eketịpde ẹsịn ke mmimọ ndikụt unen ekedi ido ubon eke edisio mbubịteyo kiet nnịm kpukpru urua man ẹnam mme n̄kpọ eke spirit ọtọkiet. Kiet ke otu utọ ete oro ọkọdọhọ ete: “Ami n̄kere ke n̄kọri eke spirit nditọ nnyịn ọkọkọn̄ọ akpan akpan ke ukpepn̄kpọ ubon nnyịn kpukpru mbubịteyo Wednesday, emi ikọtọn̄ọde n̄kpọ nte isua 30 ẹmi ẹbede.” Nditọ esie mbita ẹkena baptism ke ini ẹkedide n̄kpri, ndien ke ukperedem mmọ mbita ẹma ẹdụk utom ukwọrọikọ uyọhọ ini. Ke adianade ye ukpepn̄kpọ ubon, ẹkeme ndikop inem ndinanam n̄wụt nte ẹkwọrọde ikọ ke an̄wautom m̀mê mme ikpehe ke mme mbono esop ye nti edinam eken ọtọkiet.

⁷ Ke ndutịm fo eke urua ke urua, nte afo ‘emedep ini’ ọnọ utom ukwọrọikọ Obio Ubọn̄? (Col. 4:5) Ata ediwak nnyịn idu uwem unana ini, inyenede mme mbiomo ubon ye eke esop ndise mban̄a. Edieke nnyịn mînamke ndutịm oro enyenede iwụk man ibuana ke ukwọrọikọ ye ke edinọ ukpep kpukpru urua, edidi ata mmemmem n̄kpọ ọnọ mme n̄kpọ eken ndibaba akpan edinam emi n̄wot. Andinyene akamba itie ubọk enan̄ kiet ọkọdọhọ ete: “Ke n̄kpọ nte 1944 ami mma ndifiọk nte ke n̄kukụre usụn̄ ami ndibuana ke utom ukwọrọikọ ekedi ndidiomi usen kiet nnọ enye. Tutu esịm usen mfịn ami ke nsụk nsosio usen kiet ke urua nnịm nnọ ukwọrọikọ.” Ebiowo Christian kiet okụt nte ke ndinyene akpan ndutịm kaban̄a unọ ikọ ntiense an̄wam enye ndisinyene hour 15 ke ọfiọn̄ ke ẹbaharede ukem ukem ke utom ukwọrọikọ. Edieke enye enyenede mbubehe utom idịbi udia ekededi ke Saturday, enye esidiomi enye ke ama okokụre ukwọrọikọ ke usenubọk. Nte afo ye ubon fo ẹmekeme ndidiomi ke nsụhọde n̄kaha usen kiet kpukpru urua nnọ utom an̄wautom, anamde emi edi ubak usụn̄ uwem mbufo eke spirit?—Phil. 3:16.

⁸ Dụn̄ọde Uwem Fo Ofụri Ini: Odu mme n̄kpọ oro ẹbion̄ọde nnyịn ndibọp uwem nnyịn n̄kanade utom Jehovah. Mbabuat idaha ẹkeme nditịmede ndutịm ukpepn̄kpọ, eke mbono esop, ye eke utom ukwọrọikọ oro ikodiomide ye ntịn̄enyịn. Ndien Asua nnyịn, kpa Satan, ayanam kpukpru se enye ekemede man “ọbiọn̄ọ nnyịn” onyụn̄ abiat ndutịm nnyịn. (1 Thess. 2:18; Eph. 6:12, 13) Kûyak mme n̄kpọ ubiọn̄ọ ẹmi ẹnam idem emem fi tutu afo akpa mba. Nam ukpụhọde ekededi oro oyomde man etiene ndutịm fo ke utom ukara Abasi. Oyom ubiere ye iwụk man inam se inen̄erede idot.

⁹ Ikpanaha nnyịn iyak ndiọi odudu ererimbot ye idiọk odudu anana-mfọnmma ikpọkidem ẹnụk nnyịn ẹkesịn ke mme edinam oro mîdịghe eke spirit oro ẹkemede ndidia ekese ini ye ntịn̄enyịn nnyịn. Oyom ndụn̄ọde idemowo, ẹdade mme utọ mbụme nte: ‘Nte usụn̄ uwem mi idaha aba ukem ukem m̀mê, yak idọhọ, anana iwụk? Nte ami mmọtọn̄ọ ndibọp uwem mi n̄kanade mme n̄kpọ ererimbot ẹmi ẹdibede ẹfep? (1 John 2:15-17) Nsibiat ini didie ke mme ọkpọkpọ edinam, uka isan̄ unọ idem inemesịt, mme edinam mbre mbuba, m̀mê unọ idem inemesịt eken—esịnede edise television m̀mê edidụn̄ọde internet—ke ẹmende ẹdomo ye ini nsibiatde ke mme edinam eke spirit?’

¹⁰ Edieke okụtde ete ke uwem fo amakabade ọyọhọ ye edinam efen efen oro mîdịghe akpan n̄kpọ, nso ke akpanam? Ukem nte Paul ọkọbọn̄de akam ete nditọete esie ‘ẹnam ukpụhọde,’ m̀mê “ẹfiak ẹda mmọ ẹsịn ke nnennen itie,” ntak mûben̄eke Jehovah un̄wam man afiak owụk ekikere inikiet efen ke utom esie? (2 Cor. 13:9, 11, ik. id. NW) Ndien biere ndidu uwem ekekem ye ubiere fo nyụn̄ nam mme edinen̄ede oro oyomde. (1 Cor. 9:26, 27) Jehovah ayan̄wam fi etre ndiwọn̄ọde n̄ka nnasia m̀mê ufien ke utom emi anamde ke n̄kopitem ọnọ enye.—Men Isaiah 30:20, 21 domo.

¹¹ Yọhọ ye Edinam ke Utom Idatesịt Abasi: Ediwak miliọn owo ẹmi ẹsibịnede inemesịt ke mbrenyịn ẹnyụn̄ ẹkụt ke nte uwem asan̄ade ekpere utịt, mme n̄kpọ obụkidem oro mmọ ẹkesịnde ifịk ẹbịne idaha nsinsi inemesịt isọk mmọ. Enye edi “idomo eke mîwọrọke usụn̄.” (Eccl. 2:11) Ke n̄kan̄ eken, ke ini ikọn̄de uwem nnyịn ke Jehovah, ‘inịmde enye ke iso nnyịn kpukpru ini,’ nnyịn iyenyene ata uyụhọ. (Ps. 16:8, 11) Emi edi ntre koro Jehovah ọkọnọ nnyịn uwem. (Edi. 4:10b) Ke ẹsiode enye, Akwa Aduak-Uduak, ẹfep, uwem inyeneke se ọwọrọde. Ndinam n̄kpọ Jehovah anam uwem nnyịn ọyọhọ ye edinam emi odotde onyụn̄ enyenede uduak oro adade mme ufọn eke ebịghide, ih, mme nsinsi ufọn, ọsọk nnyịn ọkọrọ ye mbon en̄wen.

¹² Edi ata akpan n̄kpọ nditre nditie efen efen nnyụn̄ mfre nte ini edide usọp usọp ọnọ ererimbot Satan emi asan̄ade usọp usọp ekpere utịt. Ekikere nnyịn kaban̄a ini iso otụk nte nnyịn idude uwem ke usen ke usen. Mbon eyo Noah, oro mîkenịmke nte ke ukwọ ofụri ekondo eyedi, ‘ikọfiọkke,’ uwem mmọ ke usen ke usen okowụhọ ke mme ọkpọkpọ mbubehe—edidia n̄kpọ, edin̄wọn̄ n̄kpọ, ye edidọ ndọ—tutu “ukwọ edi edimen mmọ kpukpru efep.” (Matt. 24:37-39) Mfịn, mbon oro ẹkọn̄de uwem mmọ ke ererimbot emi ẹyeda enyịn mmọ ẹkụt nte ini iso mmọ abiarade ke ata akamba nsobo oro akanam owo okụtde, “usen Ọbọn̄.”—2 Pet. 3:10-12.

¹³ Do, ka iso ndikọn̄ uwem fo ke odu-uwem Abasi, Jehovah, ye ke ndinam uduak esie. Idụhe orụk mbubehe oro afo ekemede ndinam ke uwem emi oro edinyenede utọ Andinọ Ibetedem emi ẹkemede ndibuọt idem nte Jehovah. Enye ikemeke ndisu nsu—enye oyosu mme un̄wọn̄ọ esie. (Titus 1:2) Enye ikemeke ndikpa—n̄kpọ ekededi oro ẹkọn̄de ke Jehovah itakke. (Hab. 1:12; 2 Tim. 1:12) Uwem n̄kopitem ye mbuọtidem oro nnyịn ibọpde idahaemi edi sụk ntọn̄ọ uwem emi edibịghide ke nsinsi ke idara idara utom Abasi inemesịt nnyịn!—1 Tim. 1:11; 6:19.

[Se Ẹwetde ke Ikpọ Abisi ke page 3]

“Akpanikọ idịghe ubak uwem nnyịn, enye edi uwem nnyịn. Kpukpru n̄kpọ eken ẹkọn̄ọ ke enye.”