Editi N̄kpa Christ ke Ofụri Ererimbot
1 Jehovah ọnọ nnyịn ediwak enọ ke ntatubọk. Ẹtịn̄ ẹban̄a ofụri eti ido ye ima-mfọnido esie in̄wan̄în̄wan̄ nte “enọ Esie emi ayan̄ade edeme.” Ih, “akwa mfọn Abasi” edi utịbe tutu akan ukeme nnyịn nditịn̄ mban̄a.—2 Cor. 9:14, 15.
2 N̄kponn̄kan Enọ Esie: Jesus Christ, nte Andifak ubonowo, edi enọ oro okponde akan ofụri enọ. Ke ndiwụt akwa ima oro enye enyenede ọnọ ererimbot ubonowo, Jehovah ama ọnọ edima ye ikpọn̄îkpọn̄ edibon Eyen esie. (John 3:16) Utọ edidiọn̄ otode Abasi mi emi owo mîdotke odot se ẹtide ke ofụri ererimbot. Ini ewe, ndien didie? Ke mbubịteyo Thursday, April 1, 1999, mme Christian ke ofụri ererimbot ẹyenịm usọrọ Udia Mbubịteyo Ọbọn̄, ẹnịmde Editi n̄kponn̄kan ke otu kpukpru uwa oro akanam ẹwade.—1 Cor. 11:20, 23-26.
3 Christ akakam akpa ke ibuot nnyịn idem “ke adan̄aemi nnyịn isụk idide mme idiọk owo kan̄a,” ndien nnyịn imekeme ndiwụt ọkpọkpọ esịtekọm ebe ke ndinịm Editi n̄kpa esie ye ke ndikot mbon efen ẹdidu ye nnyịn ke akakan usọrọ emi.—Rome 5:8.
4 Ata Akpan Edinam: Edinịm n̄kpa Christ owụt akpan akpan nte ke enye ama omụm itie edikara Abasi akama ye unana ndudue. Enye n̄ko eti nnyịn nte ke nnyịn imekeme ndinyene edisana idaha ke iso Jehovah ebe ke ndinyene mbuọtidem ke uwa Jesus, ntem inyenede idotenyịn edinyan̄a. (Utom 4:12) Ke akpanikọ, emi edi ata akpan n̄kpọntịbe eke isua!
5 Iwụt ima oro inyenede inọ mbọhọidụn̄ nnyịn ke ndikot mmọ ẹdinịm usọrọ Udia Mbubịteyo Ọbọn̄ ye nnyịn. Mme ufọn ufak oro ẹsụk ẹdodu ẹnọ ediwak miliọn owo ẹmi ẹfiọkde akakan ufọn esie. (Phil. 3:8) Mbon oro ẹwụtde mbuọtidem ke uwa Christ ẹkeme ndinyene idotenyịn nsinsi uwem oro enyenede iwụk.—John 17:3.
6 Ini Editi ọnọ nnyịn san̄asan̄a ifet ndiwụt esịtekọm oro inyenede inọ akakan mfọnido Abasi oro owo mîdotke. Emi edi mfọnn̄kan ini ndibuana ifịk ifịk ke ndikwọrọ eti mbụk Obio Ubọn̄ Abasi. Ikpọ ufọn ke ẹna ẹbet kpukpru mbon oro ẹtiede ẹkere akakan enọ mfọn Jehovah emi ayan̄ade edeme ke akam ẹnyụn̄ ẹnamde ndutịm ndidụk usọrọ Udia Mbubịteyo Ọbọn̄ eke isua emi!