Nọ N̄kpan̄utọn̄ ke Ikọ Abasi
1 Idịghe kpukpru ikọ oro owo etịn̄de odot ẹnọ san̄asan̄a n̄kpan̄utọn̄. Edi ke ini Abasi etịn̄de ikọ, akpan ntak odu ndikpan̄ utọn̄. (Deut. 28:1, 2) Ke mfọniso, mme ewetn̄wed odudu spirit ẹma ewet “ikọ Abasi” ẹnịm ke ufọn nnyịn. (Rome 3:2) Mbono district oro edide ọyọnọ mme ọsọn̄urua ifet ndikop nte ẹkotde ẹnyụn̄ ẹnemede mme ikọ emi. Didie ke afo ekeme ndinen̄ede nnọ n̄kpan̄utọn̄?
2 Babak Sịm Kpukpru Usenubọk: Kere nduaidem oro nditọ Israel ẹkenyenede ke ini ẹkedọhọde mmọ ẹkesobo ye Jehovah ke Obot Sinai man ẹkop Ibet esie! (Ex. 19:10, 11, 16-19) Edieke enyenede ukem edu oro aban̄a ndibọ item Jehovah ke mbono district, afo ayanam ndutịm ndibabak n̄kesịm kpukpru usen. Nnyịn ikemeke ndikpan̄ utọn̄ nnọ ofụri ndutịm edieke ikade ke idiọk ini inyụn̄ itịmerede mbon en̄wen nte idomode ndiyom itie. Ndutịm ọtọn̄ọ ke n̄kanika ebede 9 usenubọk ke minit 20 ke Friday ye n̄kanika 9 usenubọk ke Saturday ye Sunday.
3 Idem ndusụk mbon oro ẹbakde ẹkesịm isidụhe ke itie mmọ ibet ini ndutịm ọtọn̄ọde. Ntak edide ntre? Mmọ ẹsibet tutu etieibuot okpokoro asiak ikwọ ediberede mbemiso mmọ ẹtrede nneme ye mme ufan ẹnyụn̄ ẹtọn̄ọde ndika itie mmọ. Nnyịn ikpenyene nditịm mfiọk nte ke ediwak minit mbemiso ikwọ ediberede ikpehe edinam kiet kiet ọtọn̄ọde, etieibuot okpokoro eyetie ke mbot utịn̄ikọ ke adan̄aemi ẹbrede ikwọukwak Obio Ubọn̄ ndida ntọn̄ọ. Emi edi idiọn̄ọ nte ke ini ekem nnyịn nditetie! Do, ke ini ẹsiakde ikwọ ediberede, nnyịn iyodu ke mben̄eidem ndidiana n̄kwọ itoro nnọ Jehovah.
4 Ẹkpan̄ Utọn̄ Nte Ubon Oro Adianade kiet: Ke ini ẹkekotde ikọ Abasi ẹnọ nditọ Israel oro ẹkesopde idem, mme ubon, ẹsịnede “nditọwọn̄,” ẹkenyene ndikpan̄ utọn̄ nnyụn̄ mbọ ukpep. (Deut. 31:12) Owo ikpenyeneke ndiyak nditọwọn̄ ‘nnọ usụn̄ mmọ’ ke mme mbono nnyịn. (N̄ke 29:15) Mme ete ye eka, ẹdiomi ofụri ubon mbufo nditie ọtọkiet—ọkọrọ ye mme uyen. Ndusụk ete ye eka ẹsibet tutu ke ẹma ẹketọn̄ọ ikwọ ndien ẹda nditọ mmọ ẹka itie uken̄idem. Nte ededi, emi idikpepke nditọwọn̄ nte ikwọ ye akam ẹdide ata akpan n̄kpọ ke utuakibuot nnyịn. Ọkpọfọn adan̄a didie akan oro ndiken̄ idem mbemiso ẹtọn̄ọde ikpehe edinam kiet kiet edieke ẹkemede ndinam oro!
5 Ayan̄wam nnyịn ndikpan̄ utọn̄ edieke inen̄erede iduọk odudu kpukpru okoneyo inyụn̄ ifepde ndodobi udia ke uwemeyo. Wụk ntịn̄enyịn ke se etịn̄ikọ etịn̄de. Tre ndiyak ekikere fo oyo. Kụbọde Bible ke ini ẹkotde mme itien̄wed. Wet mme akpan n̄kpọ mbio mbio. Nte ẹnọde utịn̄ikọ kiet kiet, dụn̄ọde se etịn̄ikọ etịn̄de ke ekikere fo, nyụn̄ kere nte afo edidade n̄kpọ oro anam n̄kpọ. Ke utịt usen oro, ẹneme ndutịm oro nte ubon. Mme akpan n̄kpọ ewe ke owo kiet kiet akama? Didie ke ubon mbufo ekeme ndida ntọt emi nnam n̄kpọ nte ọfọnde?
6 Wụt Ukpono nọ Ikọ Abasi: Mme mbono ẹnọ nnyịn eti ifet ndineme nneme ye mme ufan nnyụn̄ ndara ebuana oro ọbọpde-bọp. Ke isịmde ke eti ini, nnyịn iyenyene ini ndineme nneme mbemiso ndutịm ọtọn̄ọde. Nte ededi, ndusụk owo ẹsineme nneme ke ini edinam akade iso, ẹkerede ke ndudue ẹte ke emi idiwọn̄ọkede ntịn̄enyịn owo ke akwa efe mbono. Idem ke ini ẹnịmde akamba mbono, oro edi ini ndikpan̄ utọn̄, kpa nte ke ini idụkde mbono esop ke Ufọkmbono Obio Ubọn̄. Owo ikpenyeneke ndiyak urụk ukopikọ oro ẹkamade-kama ẹsan̄a, ekpri ukwak ubọ etop, ukwak umụm n̄kpọ vidio, ye ukwak usio ndise ẹwọn̄ọde ntịn̄enyịn owo ke ini edinam akade iso.
7 Ke ini Moses ọkọbọde Jehovah Ibet, ‘enye ikataha uyo, inyụn̄ in̄wọn̄ke mmọn̄.’ (Ex. 34:28) Ukem ntre, ididotke ndidia udia m̀mê ndin̄wọn̄ n̄kpọ ke adan̄aemi ikpehe edinam mbono osụk akade iso. Bet “ekem ini,” ibọhọke akpan n̄kpọ aban̄ade nsọn̄idem owo abuana.—Eccl. 3:1.
8 Ke ndusụk mbono, mfịna oro akade iso ndidu edi ediwak nditọete iren ye iban ye idem nditọwọn̄ ndisan̄a n̄kanade mme ufan̄ oro ẹsisan̄ade ẹbe ke ini edinam akade iso. Ẹyedọhọ mme adaidaha ẹdọhọ mme utọ owo oro ẹfiak ẹnyọn̄ọ efe mbono. Mme anamutom unyịmesịt ke nsio nsio itieutom ẹkpenyene nditetie ye otuowo ke ndondo oro ẹkụrede utom mmọ. Mme anamutom unyịmesịt ẹkpenyene ndidu ke itie mmọ, n̄kpan̄ utọn̄ nnọ edinam, ibọhọke ẹnọ mmọ akpan utom ndinam ke ini ndutịm akade iso. Mmọ ikpenyeneke nditie mbiat ini ke itieutom, nneme nneme ye kiet eken ke adan̄aemi edinam akade iso.
9 Nnyịn ididehede iyak ‘utọn̄ nnyịn akabade odobi’ ke ini ikpan̄de utọn̄ inọ Ikọ Abasi. (Heb. 5:11) Ẹyak nnyịn ke ntre ibiere ndiwụt ukpono oro odotde ke ndinọ ọyọhọ n̄kpan̄utọn̄ ke nte ẹnemede ikọ Jehovah ke mbono district nnyịn oro edide.