Uwem Ẹdu ke Itiendịk!
1 Bible anam uduak Jehovah oro an̄wan̄a nte ke ana “kpukpru owo ẹnyene edinyan̄a.” Nte ededi, edi akpanikọ n̄ko nte ke idotenyịn uwem ediwak biliọn owo ẹdude ke isọn̄ ọkọn̄ọ ke edu mmọ ye Jehovah Abasi ye Obio Ubọn̄ esie ebe ke Jesus Christ. Nnennen edu ekeme ndikọn̄ọ n̄kukụre ke “ifiọk akpanikọ.” (1 Tim. 2:3, 4) Ke adan̄aemi inọde ntọt nte ke ibịghike ẹyesọhi kpukpru idiọkido ẹfep ke isọn̄ man ẹnam ufan̄ ẹnọ obufa ererimbot Abasi eke edinen ido, ẹdọn̄ nnyịn n̄ko ẹte inam akpan utom unyan̄a uwem.—Matt. 24:14; 28:19, 20; Rome 10:13-15.
2 Ntak Edide Usọp Usọp Ntre? Jesus ama ọnọ ntọt ete ke “akwa ukụt oyodu, orụk eke akanam mîdụhe toto ke editọn̄ọ ererimbot.” (Matt. 24:21) Ukụt oro edisịm utịt ke Armageddon. (Edi. 16:16) Otuowo oro ẹsakde iso ẹse nsobo edieke mmọ mînamke n̄kpọ iban̄a eti mbụk esịne mme iman, mbọhọidụn̄, nsan̄autom, nsan̄a ufọkn̄wed, ye ọdiọn̄ọ nnyịn oro mînịmke ke akpanikọ. Edi udọn̄ nnyịn edi ndisịm “kpukpru owo” ke ndikpebe Abasi, emi okowụtde ofụri ererimbot ubonowo ima esie ebe ke ndinọ Eyen esie, Jesus Christ, nte ufak kpukpru owo. (John 3:16) Ana nnyịn idomo ifịk ifịk ndinọ kpukpru owo ikot ndifehe n̄ka ebiet ubọhọ Abasi. Ebede ke ndinam utom ukwọrọikọ ọyọhọ ọyọhọ, nnyịn imekeme ndibọhọ ubiomikpe iyịp.—Ezek. 33:1-7; 1 Cor. 9:16.
3 Nso Idi Uduak Nnyịn? Ẹsọn̄ọ ẹtịn̄ nte utom ukwọrọikọ edide akpan n̄kpọ ke ofụri Ikọ Abasi. Nte apostle Paul eketịn̄de, “ima Christ efefịk nnyịn” ndidu uwem ke n̄kemuyo ye mme usụn̄ Abasi. (2 Cor. 5:14) Adianade do, Enyọn̄-Ukpeme esiwak ndisọn̄ọ ntịn̄ mban̄a mbiomo nnyịn ndikwọrọ ikọ. Utom Obio Ubọn̄ Nnyịn aka iso ndinọ ndausụn̄ ke nte ẹkpenamde utom ukwọrọikọ. Mbiowo ẹtịm utom emi ẹnyụn̄ ẹsịn udọn̄ ẹnọ nnyịn ndibuana ke esịt. Mme ekemmọ asuanetop ẹnọ nnyịn ikot ndibuana ye mmọ ke utom ukwọrọikọ. Nnyịn imokop ekese iban̄a nditịm mme nneme nnyịn, ndinọ mme magazine ye mme n̄wed eken, ndinam mme mfiakn̄ka, ndinịm mme ukpepn̄kpọ Bible, nnyụn̄ nda kpukpru ifet nnọ ikọ ntiense. Kpukpru emi an̄wam nnyịn ndiyọhọ uduak edinyan̄a uwem.—1 Cor. 9:22, 23; Eph. 1:13.