Nte Ẹkpekpekde Mbon Efen
1 Apostle Paul ama ọwọrọ etop nte asan̄autom emi enyenede mbukpek. (Utom 19:26, NW) Idem Edidem Agrippa ama ọdọhọ enye ete: “Ke ekpri ini afo eyekpek mi n̄kabade ndi Christian.” (Utom 26:28, NW) Nso ikanam utom ukwọrọikọ Paul akama mbukpek ntre? Enye ama ada mbufiọk ọkọk ibuot ke N̄wed Abasi, anamde mme mfan̄a esie ẹkekem ye mme andikpan̄ utọn̄ nnọ enye.—Utom 28:23.
2 Ke ndikpebe Paul, nnyịn n̄ko ikpenyene ndiwụt mbukpek ke utom ukwọrọikọ nnyịn. Didie? Ebe ke ndiwụt ọniọn̄ ke ini etịn̄de ikọ onyụn̄ akpan̄de utọn̄ ọnọ mbon efen. (N̄ke 16:23) Akpan usio-ukot ita ẹyen̄wam nnyịn ndinam emi.
3 Tịm Kpan̄ Utọn̄: Ke ini owo enye eken etịn̄de ikọ, kpan̄ utọn̄ man enyene unyịme edem mbiba oro ekemede ndida ntịn̄ ikọ. Edieke enye edemerede mfan̄a, domo nditịm mfiọk ntak mfan̄a oro. Ayan̄wam ndifiọk nnennen se enye enịmde ke akpanikọ, ntak enye enịmde oro ke akpanikọ, ye se ikanamde enye enịm. (N̄ke 18:13) Da mbufiọk bụp enye n̄kpọ emi.
4 Bụp Mme Mbụme: Edieke owo enịmde Abasi-Ita-ke-Kiet ke akpanikọ, afo emekeme ndibụp ete: “Nte afo emesinịm Abasi-Ita-ke-Kiet ke akpanikọ kpukpru ini?” Dian ete: “Nte akanam emenen̄ede ekpep se Bible etịn̄de aban̄a ibuot nneme emi?” Emekeme ndibụp n̄ko ete: “Edieke Abasi ekpedide ubak Abasi-Ita-ke-Kiet, nte nnyịn ikpodorike enyịn nte ke Bible ekpetịn̄ in̄wan̄-in̄wan̄ ntre?” Mme ibọrọ oro afo ọbọde ẹyen̄wam fi ndikọk ibuot ye owo oro mban̄a se N̄wed Abasi ọdọhọde.
5 Da Eti N̄kọkibuot: Ntiense kiet ama obụp n̄wan kiet emi ekenịmde ke Jesus edi Abasi ete: ‘Edieke afo akpan̄wanade ndiwụt nte ke owo iba ẹdi ukem, nso itie ebuana ubon ke afo akpada ndinam an̄wan̄a?’ Enye ama ọbọrọ ete: “N̄kpada nditọeka iba.” Ntiense oro ama adian ete: “Ndusụk idem amanaiba emi ẹbietde kiet eken. Edi ke ndikpep nnyịn ndida Abasi nte Ete nnyụn̄ nda imọ nte Eyen, nso etop ke Jesus ọkọnọ nnyịn?” N̄wan oro ama ekpep do ete ke kiet edi akamba onyụn̄ enyene odudu akan. (Matt. 20:23; John 14:28; 20:17) Ẹma ẹda usọ mbukpek ẹsịm esịt ye ekikere esie.
6 Nte ededi, idịghe kpukpru owo ẹsinyene udọn̄ ke akpanikọ, inamke n̄kpọ m̀mê ukwọrọikọ nnyịn owụt eti ibuot onyụn̄ enen adan̄a didie. Edi nte Paul, ẹyak nnyịn inyene ifịk ke ndiyom mbon esịt akpanikọ ke efakutom nnyịn, ikpekde mmọ ndinyịme etop Obio Ubọn̄.—Utom 19:8.