Nọ Ikọ Ntiense nte Eti Mbọhọidụn̄
1 Jesus ọkọdọhọ ete, “ma mbọhọidụn̄ fo nte idem fo.” (Matt. 22:39) Nte eyịghe mîdụhe, afo ‘ọmọfọn ido’ ye mme ekemmọ andinịm ke akpanikọ, edi nte emekeme ndinam ima fo atara esịm mbon oro ẹdụn̄de ẹkpere? (Gal. 6:10) Ke mme usụn̄ ewe?
2 Ebe ke Ndinam Ẹdiọn̄ọ Fi: Nte mme mbọhọidụn̄ fo ẹdiọn̄ọ ẹte ke afo edi Ntiense? Edieke mîdiọn̄ọke, ntak mûkaha ubịne mmọ ke ini utom an̄wautom? Mme utịp ẹkeme ndikpa fi idem! Mîdịghe edieke edinen̄ede enyene ifụre, domo ndinọ mmọ ikọ ntiense ido nneme. Ke ini ọwọrọde an̄wa, afo emekeme ndikụt mmọ ẹnamde utom ke okụre mmọ m̀mê ẹnamde isan̄ ke mme efak. San̄a kpere mmọ nyụn̄ tuak inua imam. Domo nditịn̄ mban̄a se afo enịmde ke akpanikọ, ebiet emi Ufọkmbono Obio Ubọn̄ odude, ye se ẹsinamde do, nyụn̄ nam mmọ ẹfiọk owo efen ekededi oro odụn̄de ke mbọhọ oro emi esidụkde. Nọ mmọ ikot ndidụk mme mbono esop. Biere ndinọ kpukpru owo oro afo ọdiọn̄ọde ikọ ntiense mban̄a eti mbụk.—Utom 10:42; 28:23.
3 Ebe ke Eti Edu Uwem Fo: Ufan ufan edu uwem fo etịn̄ ediwak n̄kpọ aban̄a fi onyụn̄ ekeme ndiberede usụn̄ nnọ edinọ ikọ ntiense. Enye n̄ko ‘anam ukpepn̄kpọ Abasi enyene uku.’ (Titus 2:7, 10) Wụt ata udọn̄ ke idem mbọhọidụn̄ fo. Tie ufan ufan nyụn̄ nyene mbufiọk. Wụt ukpono nọ unen oro mmọ ẹnyenede ndidu ikpọn̄ ye ke ndobo ndobo ebiet. Edieke kiet ke otu mmọ ọdọn̄ọde, wụt edikere mban̄a nyụn̄ nọ un̄wam. Edieke obufa ubon edide edidụn̄ ke mbọhọ oro, waha kọm mmọ. Mme utọ edinam mfọnido oro ẹsinam ẹnyene eti ekikere ẹban̄a fi ẹnyụn̄ ẹnem Jehovah esịt.—Heb. 13:16.
4 Ebe ke Nte N̄kpọ Fo Etiede: Ndidi eti mbọhọidụn̄ abuana ndise mban̄a ufọk fo nnam enye eye. Ebietidụn̄ ye okụre oro ẹsanade ẹnyụn̄ ẹyede ẹnọ ikọ ntiense ke idemmọ. Ebietidụn̄ oro edehede m̀mê emi ẹsuande mme mbiara n̄kpọ ke isọn̄ ọyọwọn̄ọde ntịn̄enyịn ọkpọn̄ etop Obio Ubọn̄. Ntem, enen̄ede edi ata akpan n̄kpọ ndinam ebietidụn̄, okụre, ye mme n̄kpọisan̄ fo ẹsana ẹnyụn̄ ẹdu ke eti idaha.
5 Ndikere mban̄a mbon oro mîdụhe ke esop Christian owụt ima oro enyenede ọnọ mme mbọhọidụn̄ fo. Nso ikeme ndidi utịp? Ekeme ndikam ndi nte ke ntak “nti ido mbufo, emi ẹdikụtde,” ndusụk mmọ ‘ẹyenọ Abasi ubọn̄.’—1 Pet. 2:12.